NA PANGIARANGU RUKUNA NAMA HABARUNGU ¹ La lodu nuna , hi Yesus na luhu welingu la uma hina uhuku la halinggi tamma. ² Halla, hina pauhingu na tau dangu lai Nyuna. Tunaka nu, Nyuna hei nanyaka la tiana hina uhuku, hala na tau dangu ndualaku nanyaka la halinggi tamma. ³ Hala, na dangu na papani wananja nyuda bana wangu pangiarangu, hiwan-Na, Ninya na tau nama habarungu wini na lua pa habarungu, ⁴ ba talanga habarunguna, ninja da wini dama kanabu la halinggi anda, namunja da mabohu hida nga panjapuha. ⁵ Da wini hawiangu da kanabu latana ma pawatungu, na manda dangu tanana, da rianggama patumbu kaba ndana majolung a na tana. ⁶ Djiaba tuna nu, bana hungaka na lodu, ka mbana nanjaka lodu da papamula nuda. Dangu, kabanda ningudu amuda, da pa pamula nuda kameti danyaka. ⁷ ⁷ Da wini dama kanabu la wuku rii madaka, bana tumbuka na rii madaka nuna, hala nggapi nanyaka. ⁸ , nawini hawiangu nama kanabu latana nama hamu hina tu wuana, ningu mapa hangahu wundangu, ningu mapa nomu kambulu wundangu, ningu mapa tailu kambulu wundangu. ⁹ Nggamu nama ningu kahilungu, mata kana rongu." ¹⁰ Halla, dama kikunya damai lai Nyuna hida pa ara-Nya, kanggikina Nyumu bau pabanjaru duanja nyuda hu wanja pangiarangu? ¹¹ Hina hiama ha hi Yesus, Lai nyimi pambada wuangu makaika la papinya na pakawiningu rukuna na pahanganji Surga, taka nyuda ndapa wuanja. ¹² Kanadu, na tau na maningungu, pawuang mayaipa hi lupa na bundu landangu. ¹³ Lailu nuna duka, hi wanggunja nyuda wangu pangiarangu djaka da ngitangu, nyuda ndada ngita a,dangu djaka da rongu, nyuda ndada rongu a, dang ndada djangapu aya. ¹⁴ Rukuda nyuda, padeningu nanyaka na pambada patakanai Yesaya ba wana, Wangu parongu wami, bai rongu taka ndai njadi a pa djangapuya. Dangu, wangu bai ngitang, taka ndai pianya. ¹⁵ Ka batimbi mananyaka na etina na banjaru yiana, da kahiluda da mboduku parongu, hala hida bitanja da matada nyuda. Djaka ndia, da ngitangu wangu mata duda lati, darongu wangu kahiluda, da djangapu wanya wangu etida, hida pambelingu lai Nyungga hala hi pa panjanja. ¹⁶ Taka batuna, pa pakanyurungu haka da matamu ka bau ngitadu da kahilumu bau rongudu. ¹⁷ Ku paninggau na mapadeningu bada danguma da wunangu dangu da tau mapadeningu dama mbuhangu pangitaya na pangitami, taka ndada ngita aya, dangu dama mbuhangu paronguya na parongumi taka ndada rongu aya. ¹⁸ Ba tunaka nu, patinginyawa na ihina na pangiarangu rukuna na tau nama habarungu. ¹⁹ Djaka na ronguyaka na pulungu pahanganji na tau taka ndana pianya, namunyaka hi ma akatu hina wahiya na pambada tondungu da la eti na tau nuna. Na tau yiana djiayaka na wini na pa habarung la halinggi anda. ²⁰ Nimbunyai na pa habarung la tana pinu watu, djiaduyaka na tau na maronguya na pulungu hala hina kataku mbaha etiya, ²¹ taka ba nda ningu a amuna ka ndana torungu apa una. Bana takaka na mapakapidihu na pamayila wangu lailu na pulungu nuna, ka kanabu madua nanyaka. ² ²² Nawini na ma kanabu la huanga rii madaka djiaya na tau na maronguya na pulungu nuna, bada gidikunyaka na pinu tana dang na mangabangu pawulu na kaduahakya na pulungu nuna lupa hi ndana wua. ²³ Taka, na tau na pa habarung winina la tana nama hamu, yiana djiaya na tau nama ronguya na pulungu nuna dangu na pinya. Nyuna maka nama tu palanga takangu wuana, ningu mapa 100 wundangu, hawingu 60, hiwiangu 30. ²⁴ Hi Yesus ba paninja nyuda wangu pangiarang hau rupa, hala Wanna, na Pahanganji Surga ngiarana hama djiangu na tau nama habarungu wini hamu la wuakana. ²⁵ Djiaba tuna nu, batalanga katuda halanaka na tau, namunyaka na muhuna hina habarunya wini witu la huanga gandum, hala hina laku. ²⁶ Bana tumbuka napa tondungu dangu bana tuka wuana, hinaka hi ngitaya na witu. ²⁷ Hala, kamai danyaka da atana na mangu wuakangu hida pa aranya, Umbu, nda wini hamu aya na pa habarumu la wukamu? Hala ka nggi paweli naka nuna na witu? ²⁸ Hala hi wananja, na haatu muhu nama palakuya.'hala, hi wadanya da atana, mala hu mbuhangu nu kama laku pa pa uhinya? ²⁹ Hala, wanaka na maramba, matangu! Kanadu, batalanga pa uhimiya na witu, napa na tambuta pakariangudu. ³⁰ Mata bianja kada tumbu pakariangu lundu takanya na rehi muti. Dangu, la rehi muti, kaku paninja dama habarungu, kada pauhi mangilu pakunya na witu nuna hala kahondu yubuluya ka tunuya. Hala, na gandum ka tuya la dandakunggu. ³¹ Halaka hi Yesus hina paninja pangiarangu hau Rupa lai nyuda, wananja, Na pahanganji Surga nuna hama djangu karohu sesawi na papiti tau hina tondunya la wuakana. ³² Na karohu nuna ma rihi pakudu ya welingu la mbu hala wini, taka djaka na tumbuka, marihi la pa bokuluya welingu la mbu hala rii, na jadi hareti pingi ai lupa da mabohu la awangu hi damai patu hibuda la laina. ³³ Halla hi Yesus hina hili paninja nyuda pangiarang hau, na pahanganji Surga nuna hama djangu na ragi, hala hina pitiya tau kawini hina tuya la angu tepung terigu tailu mbua huruna na danguna lundu hina kada ndabanya ragi na tepung. ³⁴ Mbu halana yiana hi Yesus na paniya la tau dangu wangu pangiarangu, ndana jadi a nyuna pa pani danja da tau dangu djaka ndana wangu pangiarangu. ³⁵ Taka ba tuna nu, ka padeningu hala nanyaka na pa mbada pani nama laku li la wunang, Nyungga ku bunggahu ngarunggu wangu pangiarangu, Kupani halaha dama kawiningu piti welingu ba hina na jadi na pinu tana. ³⁶ Halaka, hi Yesus na matanya na tau dangu hala hina tama la uma. Dangu, da makiku-Nya hida mai lai Nyuna hala hiwada,"Paluaha nggamanya lai nyuma rukuna napangiarang witu lawuaka." ³⁷ Dangu, nahiamna, na Tau nama habarungu wini mahamu djiaya na Ana Tau, ³⁸ taka na wuaka nuna djiaya na pinu tana yiana. Na wini nama hamu djiaha na ana-ana pahanganji, taka na witu djiaya na ana-ana nai ma akatu, ³⁹ hala na muhu nama habarunya djiaya na Iblis, taka na rehi muti djiaya na hupu njapu rehi, dangu dama tanggu muti djiaha da Malaikat. ⁴⁰ Jadi hama djangu na witu na pa pauhing hala hi tunuya la epi, tuna nuduka nama tumbu napa la hupu njapu rehi. ⁴¹ Na Ana Tau napa na paliawaha da Malaikat-Na, hida pauhinja da watu tunjuru hamangmai da tau dama palakuya nama akatu la pahanganji-Na, ⁴² dangu hida ndauha ha la epi. La pangia lai nu nama ninya djiaya na hi padudurung dangu na pangihingu ngandu aka. ⁴³ Halaka, na tau nama padeningu hina hambila hama mata loduya la pahanganjina na Amada nyuda. Nggamu nama ningu kahilungu, mata kana rongu." ⁴⁴ "Na pahanganji Surga hama tuna na pawulu na maninya la unu tana la wuaka, hina ngitaya tau, hala hina kawini belinya. Dangu, lailu hanangu na, ka beli nanyaka, hina dangga halanja da manguna, halla hina keiya na wuaka nuna. ⁴⁵ La handadikuna, na Pahanganji Surga hama djangu na tau danggangu nama himbu hada mama nandangu. ⁴⁶ Bana hauninguka hada mambotu wilina, ka beli nanyaka hina dangga halanja da manguna, hala hina keiya nuna na hada." ⁴⁷ Tuna numbui, Na Pahanganji Surga hama djangu jala na pawala la tehiku, hina pauhing matu-matu iyangu. ⁴⁸ Bana mbinuka na jala nuna, ka yila danyaka la halinggi hida uhuk, hala hida pauhinja da iyang hamu la kaliku-kaliku bakul, hala da manda hamu hida warunja. ⁴⁹ adi, tuna nuduka napa nama tumbu la hupu japu rehi. Da malaikat da luhu la pakawariya nama akatu welingu la tau mapadeningu, ⁵⁰ Halla da tau akatu hida warunja la epi. La pangia lai nu djiaya na hi padudurung dangu na pangihingu gandu aka. ⁵¹ Mbada pihamu minyaka yiana? Hala hiwada-Nya nyuda. ⁵² Hala, hi Yesus hiwananja nyuda, Lailu nuna, nimbihu dama pingu Taurat dama mbada jadi makikung la pahanji Surga, nyuna hama djangu na mangu umangu nama paluhu pawuluna nama bidi dangu mama ndai welingu la pawuluna. YESUS NDA PAKATAKU AYA LAKUATAK WIKI-NA Mrk.6:1-6;Luk.4:16-30 ⁵³ Bana hala ndaba haka na pangiarangu nuda hi Yesus, kalaku nanyaka welingu lai nu. ⁵⁴ Dangu, bana takaka la kuatak wiki-Na, Nyuna hina pa piakangu la sinagoge-sinagoge da nyuda ka hangataru danyaka hala hi wada, la nggika na galangu ningu manggana dangu pambiha wangu na Tau yiana? ⁵⁵ Kanda djia aya ni na ana na tukang ai? Kanda djia aya hi Maria ba wadanya na ina-Na, dangu da angu dedi-Na ba djiaha hi Yakobus, Yusuf, Simon, dangu hi Yudas? ⁵⁶ kanda djia aha da anawini-Na dama ninja lai nyuta? Halla, ka nggi biaka na ngala ninja mbuhala da yiada ehi nina na Tau? ⁵⁷ Dangu, kahidu da-Nyaka eti. Batunaka nu, ka wanajaka nyuda hi Yesus, na haatu Wunang nda djia aya ka ndapa tembiya, hinggiluna la kuatak wikina dangu la uma wikina. ⁵⁸ Hala, ka ndana pandoi apa tanda mbihana lai nu kaba ndada parahaya dupa nyuda.