YESUS DJIAYA NA MIRINA NA LODU SABAT Mrk. 2: 23-28;Luk. 6:1-5 ¹ La rehi nuna, la lodu Sabat hi Yesus na laku li ningu la wuaka gandum, hala ka manju danyaka da makiku-Nya, hala ka muti danyaka karohu gandumu, hida ngangu. ² Taka batuna, ka ngitangu danyaka da tau Farisi, halla hi wada-Nya, ngitaha dama kiku-Nggau da palakuyaka na manda uku papalaku la lodu Sabat. ³ Taka hi Yesus na hiamaha nyuda hiwananja, Ndai kali mbaha aya na pawana hi Daud dangu dama karianya bada manjuka, ⁴ Nggiki na bana tamaka la Uma Allah hala hina ganja da kanguta maraku da manda uku la panganja, tuda numbui da tau karia na, ba ndumada da ratu ha uda lati? ⁵ Djaka ndia, ndedi hi kali mbaha aya da la Hukung Taurat, kanadu la lodu Sabat, da ratu la Uma Allah bada panggaya na Sabat taka ndada njala a? ⁶ Taka batuna, Ku pa kaluakanggai nama rihi lapa bokulu welingu la Uma Allah ba ninyaka lai yohu. ⁷ Taka, djakai pinyaka na pawuku na yiana: na pawuku-Nggu djiaya na panamungu nda djiaya na maraku a, nyimi ndai hili huku anyapa na manda njala. ⁸ Kanadu, na Ana Tau ba Mirina na lodu Sabat duya. ⁹ Bana laku ka welingu lai nu hi Yesus, na taka la sinagoge da nyuda. ¹⁰ Tangaruya, ninya na haatu tau mini na makayaki hapapa lima na. Hala, hida pa aranyai Yesus, hi wada,Malla na peku kata pa panjangu la lodu Sabat? Mata kapeku panjala yai Yesus wada. ¹¹ Hala, Nyuna hiwananja nyuda, gamuya lai nyimi nama ningu heu mbimbi na, hala na mbimbi nuna na kanabu huda la ruakapu la lodu Sabat, kandana yapa aya hina paditaya? ¹² Na rihi pawilingupa na tau welingu la heu mbimbi! Lailu nuna, ka uku duka la pa pandoi mahamu la lodu Sabat. ¹³ Hallai, Yesus hi wananya na tau nuna, padjuala ya na limamu. Ka padjuala nanyaka na lima na nuna na tau, ka panjangu hamu nanyaka ka djangu yaka na lima na na hapungu. ¹⁴ Taka, da tau Farisi da beli welingu lai nu hida pahamangu la palawanya Nyuna, nggiki hamana ka pametiya Nyuna bawada. ¹⁵ Taka, hi Yesus, bana pinyaka yiana, ka marau nanyaka welingu lai nu. Na danguma nama karianya hala Nyuna hina pa panjanja nyuda mbu halada, ¹⁶ hala hina panamunja nyuda ka ambu da pani duya lai nggamu ka ambu ningu ma pinya nyuna. ¹⁷ Mata yiana kana padeninguwa garaya na pambada panina nama li lai Wunang Yesaya: ¹⁸ Tangaruya , na ata papindi-Nggu, na panamu-Nggu, hina paluahanya nama padeningu la banjaru-banjaru dangu. ¹⁹ Nyuna ndana pabiatangu a, dang ndana wara a, dangu nda djia ningu a maronguya na kareuku-Na la anda. ²⁰ Na au nama mbata ndana buata aya, dang na humbu nama mbuhang pa mbada ndana pada aya,lundu na pataluya nama padeningu, ²¹ la tamu-Na, na banjaru dangu hina monongu." ²² Halaka na haatu tau na parunuku wandi akatu, bana poki dangu na kambiu, da ngandiya lai Yesus. Halla, hi Yesus napa panjanya hina njadi pangita dangu pakareuku nuna na tau poki dangu makambiu. ²³ Mbu halana na tau na hangataru hala hida pa arangu, " Ana nai Daud ya badi Nyuna yia? ²⁴ Taka, bada ronguka da tau Farisi kawadaka nyuda, Na Tau yiana ndana njadi a pa wangga wandi akatu djaka nda angu nanya hi Beelzebul, na kapala ngahu akatu. ²⁵ Hi Yesus na pimanya nama ninya la kanandinguda halla hiwananja, nimbihuna na pahanganji nama paiha-paihangu na lawanya na wiki ma ana, hi tokunya. Dangu, nimbihuda kuatak djaka ndia uma dama paiha-paihangu na lawangu wiki ma ana. Djaka tuna nu, ka nggiki mandungu naka na pahanganjina? ²⁶ Dangu, djaka na heitang kana wangga hama heitanguna, ka paiha-ihangu nayaka hina lawangu wikina. Taka djaka tunaka nu nghiki hama mandungu naka na pahanganji na? ²⁷ Dangu, Nyungga djaka kuwanggaya na wandi-wandi akatu wanya hi Beelzebul, ka dangui nggamuika napa da anamu bada wangga ha nyuda? Ba tuna kanu ka njadi danya hakim amuka una. ²⁸ Taka nahu, djaka paki Nggunya Ngahu nai Allah, baku wanggaya na wandi-wandi akatu, na Pahanganji nai Allah mbada ninyaka lai nyimi. ²⁹ Malla, kanggiki hama tama bianaka la uma tau marihi pa kaparu lapa wahi ha dapa pahamuna djaka ndana hondu mangiluya na tau nama rihi kaparu nuna? Halla, hina wangu patama la pawahiha da ihi uma na. ³⁰ Nggamu beaya na manda angu ngga Nyungga, lawa nangga Nyungga. Nggamu biaya na manda kahau dangga Nyungga, na paiha-ihangu. ³¹ Rukuna nuna, nahu Ku paninggai nimbihu da njala bana pa akangu la tau pa ainguha, taka na pa akangu bau hangganya na Ngahu ndapa ai anya. ³² Dangu, djaka nggamuya nama paniwangu la palawa wanya na Ana Tau njadi pa ainya, taka nggamuya nama paniwang palawa wanya na Ngahu Matua ndapa njadi a pa ainya, hamu kai la rehi nahu dangu mai la rehi nama namunya." ³³ Djaka na hamu na pingina, na hamu mai duna na wuana. Taka, djaka ndana hamu na pingina, ndana hamu mbui duna na wuana. Kanadu, na pingina bata tandaya welingu la wuana. ³⁴ Ha, wala nai ular mbeni, ka nggiki hama njadi mika nyimi ma akatu la pa paniya na mahamu? Kaba welina la eti du hina pabanjaru wanya la ngaru. ³⁵ Na tau hamu na paluhuya na mahamu welingu la pawuluna na mahamu, hala na tau akatu na paluhuya nama akatu welingu la pawuluna nama akatu. ³⁶ Nahu, Nyungga wanggu nggai nimbihu na na kareuku na manda ningu lingungu, na pa paniwana na tau,nyuda napa da tunya hiamana la rehi buatangu. ³⁷ Kaba welingu la kareuku dumu hi padeninggau, dangu welingu la kareuku mamui, hi hukunggau. ³⁸ Halla, wadanyaka hi Yesus pariada da tau Farisi dangu da mapingu Taurat ba tau mapiraha, Ngguru, mbuhangu manya pa ngitangu tanda welingu lai Nyumu. ³⁹ Halla hi wananja bana hiamaha hi Yesus, tau la rehi nahu ma akatu dangu manjuraku yiada da karai tanda. Nda ningu a tanda pa wuanggai nyimi, lahambeli tanda nai wunang Yunus. ⁴⁰ Kanadu, hama djangu hi Yunus ba ninya la kambu iyangu bakul ba tailu mbua lodu tailu mbua ruduna, tuna numbui duna na Ana Tau tailu mbua lodu tailu mbua ruduna la kambu tana. ⁴¹ Da tau niniwe hida ndualaku pakariangu dangu da tau la rehi nahu la rehi buatangu hala hi hukunja kanadu nyuda ba ndada manjaria du bada ronguya na pabuabaruna hi Yunus. Dangu, ngitaya, na rihi bokulupa welingu lai Yunus nama ninya lai yohu ⁴² Na Ratu welingu la selatan na ndualak karianja da tau la rehi nahu la lodu buatang dangu hi hukunja kanadu nyuda da mai welingu la hupu tana lapa patinginya na manggana nai Salomo. Dangu, ngitaya, nama rihi bokulupa welingu lai Salomo nama ninya lai yohu. NA ⁴³ Djaka na luhuka na ngahu akat welingu la tau, hina laku li la pangia manda ningu waingu hina himbu ngia pangiangu na, taka ndana ngalangu a. ⁴⁴ Hala, wanaka, Ku kabeli badi la umanggu, la ngia paluhunggu.' Hala, bana takaka, kanda ningu apa ihina nuna na uma, pa mbada kangiri yaka, dangu mbada lanyapu naka. ⁴⁵ Halla, ka laku nanyaka na ngahu akatu nuna hina karianja da pihu ngahu akatu hawiangu da marihi akatu welingu lai nyuna, hala hida tama hida ngiangu lai nu. Ba tunaka nu, kana rihika panda hamu na ndumana na tau nuna welingu lamangilu na. Djia mbuyai nama tumbu la tau nama akatu yiana. ⁴⁶ Batalanga pabanjaru duananjapa da tau dangu hi Yesus, ngitaya, na ina dangu da angu dedi-Na ndualak padua danya lahambeli, ka kareuku dua-Nya wada. ⁴⁷ Ninya na haatu na mapaninya, ngitaha, na inamu dang da angu dedi-Mu ndualak danya la hambeli, ka kareuku duanya Nyuna wadanggau. ⁴⁸ Djiaba tuna, na hiamaya na tau na mapani-Nya hi wananya, gamuha da ina-Nggu dangu gamuha da angu dedi-Nggu? ⁴⁹ Halla, hina padjualaha da limana la tubada dama kikunya, hi wanai Yesus, yiadaha da ina-Nggu dangu da angu dedi-Nggu! ⁵⁰ Kanadu djaka gamuya na mapalakuya na pawukuna na Ama-Nggu la Surga, nyuna ya na angu Nggu paluhu, na anawini-Nggu, na ina-Nggu.