¹ Bana halaka hi Yesus pawuanja pareta la tau hakambulu madua dama kiku-Nya, hina laku Nyuna welingu lai nu lapa papiakangu dangu la pabuabarungu la kutak-kuataku da nyuda. YESUS DANGUI YOHANES PARUNUNGU ² Nahu, ba talanga, la hukunguyai hi Yohanes, na ronguya na paramana hi Kristus, halla nyuna hina pangandingu kareuku la tau dama kikunya, hala hida paara-Nya, ³ "Malla djiakau kanyumu nama namunya, djaka ndia hi panedimanya nama namunyapa?" ⁴ Hi Yesus na hiamaha hi wananja," Beliwa kai paninya hi Yohanes nggaraya na parongumi dangu na pangitami, ⁵ nama poki na ngitaka, nama kaliparu na panggaka, nama hidu killa na langaka, nama kawanga na ronguka, nama meti papa luriyaka, dangu nama mayila pa buabarunguyaka Injil. ⁶ Pa pakanyurungu yaka na tau na manda tunjuru lailu Nyungga. ⁷ Dangu, ba taliu laku daka nyuda, ka pakiringu nanyaka hi Yesus pa paniwanya la tau dangu na rukunai Yohanes, Nggarayaka na pambuhangu pangitami la marada tialangu? Na hareti ai au pakuada ngilu? ⁸ Nggarayaka na palua pangitami? Na haatu tau nama paki katari taluanahu? Nyuda dama paki katari taluanahu ninja la uma hanganji maramba. ⁹ Hi lua lainu nggarayaka na pambuhangu pangitami? Haatu wunangu? Nahu, hiwanggunggai, nyuna na rihi bokulupa welingu la haatu wunangu. ¹⁰ Kanadu, ba nyuna duka na tau na palangu la patulihu:'Tangaruya! Nyungga kuparahanya na papaliawa -Nggu kana mangilu-Nggau. Nyuna nama palanyapunya na anda-Mu lahangga-Mu. ¹¹ Ku pakaluakanya nama padeningu lai Nyumu, welingu lai nyuda dama dedi weling la kawini, ndedi ningua pangita marihi bokulu welingu lai Yohanes parunungu. Taka, nama rihi pakudu la pahanganji Surga, na rihi bokulupa welingu lai nyuna. ¹² Piti welingu lai Yohanes parunungu lundu nahu, na pahanganji Surga na ngalangu mayila parodukungu, dangu da tau dama karau etida da palakuya wangu paruka liarang. ¹³ Kanadu, mbu halada da wunangu dangu na Hukung Taurat na paniya lundu takanya na rehi nai Yohanes. ¹⁴ Dangu, nyimi djakai mbuhangu pakatakuya, nyuna djiamayaka hi elia nama namunya. ¹⁵ Nggamuya nama ningu kahilungu kana rongu, dangu na ronguma badi! ¹⁶ Halla, wangu gara kabadi ku pabandinya na tau yiana? Nyuda hama djangu na ana kiada kudu dama uhuku la pangia tau madangu, dama pa aungu anguda, ¹⁷ halla hi wada, maha puinggai taleli, taka ndai rianja a. Ma ludunggai ludu manauru, taka ndai hawina a. ¹⁸ Namaina hi Yohanes ndana ngangu a, dangu ndana unungu a, halla hi wada, runuku naya wandi akatu. ¹⁹ Djiaba tuna, bana takaka na Ana Tau hina ngangu na unungu, hala hiwada nyuda,' tangaruya, na haatu tau nama manganga eti dangu nama mauku, nama angungu tau mapa uhingu hillu katiku dangu tau njala.' Taka batuna, na manggana na padeninya wangu pa pandoinda.' PAI ²⁰ Halla hi Yesus ka pakiringu nanyaka pa paakanja da paraingu-paraingu na pambada ngia papa lakuna tanda pahangatarungu kaba ndada manjariadu. ²¹ " Harui minyaka,Khorazim! Harui minyaka, Betzaida! Kanadu, djaka na tanda pahangatarungu nama mbada tumbu lai nyimi djaka na tumbu la Tirus hamangu mai la Sidon, nyuda mbada manjaria manjaria mandai madaka hida paki katari handuka dangu auu. ²² Djia batuna, Ku pakaluakanggau la lodu buatangu, Tirus dangu la Sidon, da rihi makapa pa dukuya welingu lai nyimi. ²³ Dangu, nyimi, kapernaum, pa pajanggakai taka la awangu? Ndi a, nyimi pa pawawakai taka la pangia tau meti, kanadu djaka da tanda pahangatarungu dama mbada tumbu lai nyimi nuda djaka da tumbu la Sodom, na paraingu nuna daingu ninya lundu la lodu nahu. ²⁴ Djiaba tuna, Ku pakaluakanggai napa la rehi buatangu, na tanah Sodom na rihi makapa la padukuya welingu lai nyimi." ²⁵ Wana hi Yesus la rehina nu," Nyungga ku pamangaranggau Nyumu, Ama, Mirina na awangu dangu na tana, kanadu bau kawininya mbu halana welingu ka tau manggana dangu mapingu, halla hu paka luakanya la anakida kudu. ²⁶ Dou, Ama, kaba djiaya nuna duka nama parakangu la lahangga-Mu. ²⁷ Mbu halana na pambada wuana-Ngga na Amanggu. Dangu, nda ningua haatu tau ma tandayai Ana,la hambeli nai Ama; nda ningua haatu tau matanda yai Ama la hambeli nai Ana dangu nimbihu na tau na pawukunai Ana lapa paluahanya. ²⁸ Mainguwa lai Nyungga, mbu halana nama njili dangu nama duku ngandi botu, halla kaku wuanggau mahalimu. ²⁹ Dukuyawa na ai itu napa pandouiNggu, dangu ajaruwa welingu lai Nyungga kanadu Nyungga baku malai malijangu dangu Ku keandar eti, halla kapeku lanyapuna na ndiawamu. ³⁰ Kanadu, na ai itu napa pandoi-Nggu nuna na muda a dangu na ngandi-Nggu na halimu a."