¹ Tomayaka nababaru, ammi bollujaka da imam kapala tou peangu taloada nouwu, adda meara bottahuya nalara hamatida-Nya hi Yehu. ² Mang jiayaka hidda pinya hi Yehu, hidda iddinanya adda harakananya nagubernur Pilatus. ³ Tounaka hi Yudas, nam harakanya hi Yehu ahamati-Ya, hillu manehalnanyak hikeri habalinaja dariti dam tillu mabulu pearakuda ta imam kapala jakka tatou matua pangadang, ⁴ winnak,''Nyouwa jalagunyaka akku haraka tekkanya natou damma eingu halana.''Jiadinguka, widdanyak hi dudda,''Gannanya nahatikki dengamunya lahi nyiama?''Hapeamunyaka dummu!'' ⁵ Mangaka, hi Yudas patullakunajaka hei daommah ta roangu Bait Alla. Manga nouwu halakunanyaka anna lippi tearung wikkina. ⁶ Jiadinguka, da imam kapala dudda dadekiha dariti mang widdak,''Danna kallumang abijjaluha dariti ta umma biaha, dariti heiyi riti hi raaha jiaya.'' ⁷ Jiayaka, hidda bottahuya tapangadang hei dariti, hidda hi waija tana hiwoluwaija rati pingi patanudanya natou tama. ⁸ Jiayaka nam hamulangu, na tana nou hippa ngaranya' Tana Raa' lappakung laddu ya. ⁹ Atonoukanaka, paleti kawodungnanyaka napawinnang hi Nabi Yeremia; ¹⁰ Dawaija dariti bihi dam tilumabuluda, adda hi waija tana tamma pepi arrung, mearana napa langa pareahana hi Moiri lahi nyouwa.'' ¹¹ Dedinanyaka hi Yehu tahagana na Gubernur, mang na Gubernur hinna tuturu-Ya ,''Jiawuka Ouwu na Rajana natou Yahudi?'' Napagaping hi Yehu winna, ''oa'a nahatikkimu jiayak.'' ¹² Jiadinguka, adda tuduaya adda pakituwai-Nya da imam kapala jakka mabokul pa'ati, Dunna danna malli pagapimaja. ¹³ Mang hadanni winna-Nya hi Pilatus,''Touna nouwu Ouwu Dammu rangumaha damma dokku danguha dahala-Mu dapapa deituda-Gu?'' ¹⁴ Jiadinguk, hi Yehu danna malli pagapimanya hi Pilatus, damalli hangimangu hatududa-Nya napa kaderi-Na jiayaka na Gubernur napa hearanan. V 15 Tounaka ya, atomaya narayadanya naladu bakul, naha langa damangu na Gubernur anna pabeabahuha datou dam tahang, einya nam hatouna naha wukkuda dudda kapabeabahuya awidda. ¹⁶ Taladu nou weiga, einya nam dokku pangaranguya naoalida nam tahang hi Barabas nahawiddang. ¹⁷ Jiayaka, atanga pakehanguda datou dangu, tuturnajaka hi Pilatus dudda,''Geara hinguya nahawukkumi nyiami akku pabeabahuya, hi Barabas atau hi Yehu, napatikki jua Kritu nahawiddang?'' ¹⁸ Alanga peanajaka hi Pilatus adda iri, jiayaka hidda harakanya hi Yehu lahi dunna. ¹⁹ Tanga ngoduna hi Pilatus tapinu Gala pengadilan, pangiding liinanyaka na araweina lahi dunna,''Abbu jianga gikki noukamunya natou damma hala hinna, winnanyak. Langa ittangguka mawillagu ta ladu weiga tadalu nipigu mulana Dunna.'' ²⁰ Jiadinguka, da imam kapala jakka dam bokul pa'ati hukka taba pakullihudanya nam dangu adda kareiya hi Barabas mang kahamatiya hi Yehu awidda. ²¹ Patuturnanyaka na Gubernur lahi dudda,''Gearaya nahakabuatimi ha dam touma duaha kakku pabeabahuya nam hatouna? Mang dudda pagapingdanyak,''Barabas!''widdak. ²² Mang winnalijaka hi Pilatus,''Atonoukanaka, Gikkinougunya hi Yehu nahatiki jua tadalu ngarana hi Kritu?'' Ngara dukada dudda widdak, ''Harikkaya Dunna!'' ²³ Patuturnanyaka hi Pilatus,''Ga nam? Gannanya naha wolu-Na dam kallung?''Jiadinguka, taba kadoakada, ''Harikkaya Dunna!''awidda. ²⁴ Adanna hilu piakuka hi Pilatus anna bottahuya, ataba kacuhingunaka, deki weinanyaka mang hinna bahaha dalimmana tahaga tou dangu jakka panewinanyaka,''Nyouwa dakku deitumaya na raana na Touw nei. Neiyi patagu wikkiminya dummi!'' ²⁵ Ngara dukada pagaping danyaka,''Naraa-Na madeituya nyiama jakka da anama!'' widdak. ²⁶ Jiayaka, hi Pilatus hinna pabeabahuya hi Barabas mang adda mengaka pakoaja kabuya hi Yehu, hi Pilatus harakana-Nyaka adda harikkaya. ²⁷ Mang nouw, maraidanyaka da tentara hi Yehu ta ummana na gubernur, hidda kabua bollung ngaradukada dapasukan Romawi adda korrunya hi Yehu. ²⁸ Hidda hellinaja dakoapi-Na hi Yehu mang hidda pakena-Nya koapi ungu. ²⁹ Dangananya nakadu rowa waling ta rii, dataunanya taka tikuna hi Yehu, mang datauna-Nya hapangu na ai pallu talima lawana-Na, jakka hidda karadda tahaga-Na, mang hidda jerik pipia-Ya,''Waikiyaka, na Raja tou Yahudi widda-Nyak!'' ³⁰ Dappa doini-Ya, dadekiya na aiouw adda palu wainanya taka tiku-Na. ³¹ Damengaka pajerikuya adda yeki-Ya, dahelinya nakoapi ungu waling ta ihina hi Yehu, mang hidda pakena balinanya nakoapi wiki-Na, mang maraidanyaka adda lippi harikka-Ya. ³² Dalohunguka dudda da tentara, reggadanyak hi Simon nam waling ta Kirene. Jiayaka hidda pakahuya anna deituya na ai harikka-Na hi Yehu. ³³ Manga adda tomaka tapadoungu nam ngarang Golgotana,'' Padou Riimamati'' , ³⁴ woadanyaka anggur na papaha'urung kapidduna anna inung, anakamanyaka, Dunna danna weakumang pa'inunya. ³⁵ Daharikkayaka hi Yehu, habaidanyaka nakoapi-Na adda waingu undi. ³⁶ Manga nouwu, ngodudanyaka adda awahu-Ya napa doungu nouw. ³⁷ Jakka tepildanyak nahatuli tapinu katiku-Na nahilu pajerik waida-Nya,nam winna''NEI JIADIYAKA HI YEHU, NA RAJA TOU YAHUDI.'' ³⁸ Taladu nouwu eijellaja dam touma duaha datou hala dapaoalina hi Yehu aharikkaya. Hatou talawana-Na jakka hatouwu talalei-Na. ³⁹ Natouw nam linoung nouwu, hukka taba yurana-Nya, hidda kaddukuja dakatikuda, ⁴⁰ mang hiwidda-Nya,''Ouwu hijiakadi-Wu nam buggahuya na Bait Alla jakka nam pakiddi baliya tadalu tillu boladdu, pahalamat wikki-Muya! A'ana maraba Alla tekkadi-Wu, purunguya wali ta aiharikka nanni!'' ⁴¹ Toujellada dudda da imam kapala jakka da ahli Taurat, dambokul pa'ati adda pamarihaku-Ya hi Yehu adda olukuya, mang hiwidda, ⁴² Natou hawanguk nabiha anna paluputtuya jiadinguka na ihi wiki-Na danna bihamang anna paluputtuya .Jakka Dunna a Raja Israel tekakayaka, kanna purunguya waling ta ai harikka mang dudda katta pikki parhayaya Dunna, widda. ⁴³ Dunna na parhayaya hi Alla, jemmanya ka'ittaya hi Alla anna palupputu-Ya, jakka ahawukkudina-Nya hi Alla.Dunna alanga winna wikidingu,'Nyouwa jiawaka Anana hi Alla, awinna'''. ⁴⁴ Datou hala daoali harikkada-Nya da pamarihak jella-Ya. ⁴⁵ Tomayaka napa nammu jam waina, kapettang nanyaka na tana ngaradukana naloada nouw, lappak atomaya napa hiwa jam waina. ⁴⁶ Napa hiwa jam waina, hi Yehu hounanyak anna patiwung,''Eli,Eli,lama sabakhtani?''Alla-Gu, Alla-Gu, ga Ouwu himmu dijjak meahakaga Nyouwa?'' winna na ihina. ⁴⁷ Mang dudda hawanguk dam dedi hei lauwu, adda rangu tanoudanyaka,'' Natou nei kamaikananya hi Elia widda-Nyak.'' ⁴⁸ Dapalli waimanyaha nam hatouna anna palai,nadekiya nawalla ai, hinna lu'urunya wei anggur manyilu, hinna pinya ta ai ouwu, mang hiwoananya hi Yehu kanna inunya awiddanya. ⁴⁹ Jiadinguka hawanguk dudda widda"Maiyaya ka'ittaya a'amminya hi Elia anna palupputu-Ya." ⁵⁰ Mang patiwungkina-Nyak hi Yehu anna harakanya nadeawa-Na. ⁵¹ Ittadanyak na toddana naroangu Bait Alla anna majirrak waling nim deaha lappakangu nuttu wawa, manga nakka goyak napinu tana, ngaradukada dawatu hoadi hidda beara. ⁵² Darati mamati datawehha, jakka dokumen dangu oataha datou mati dam keri makallungu damma kiddi bali. ⁵³ Mang adda lohunguka waling taratida, anna kiddik balika hi Yehu wali ta rati, tamadanyaka tapa doungu makalung manga hidda patekkang wikkida tatou dangu. ⁵⁴ Jiayaka na kapala pasukan jakka damaraina patetidanyaka hi Yehu adda kerimamai-Ya, mang adda ittayaka anna dangu nam jaji jakka na oppung, mange'atdanyak manga widdak, "Mapadeninguya, Dunna jiayaka na Anana hi Alla! " ⁵⁵ Eija hei lau damma doku danguha damma winni adda pateti dikirou-Nya hi Yehu, walipang ta Galilea adda keri-Ya kamma woanya pa'angu jakka pa'inung awidda. ⁵⁶ Eija hei dudda hi Maria Magdalena, hi Maria na Inana hi Yakobus jakka hi Yusuf, jakka na inada da lakeada da anana hi Zebedeus. ⁵⁷ Tomayaka anna ridungu na tana, aminya natou poati waling Ta Arimatea hi Yusuf nahawiddang, dunna murit jellananya hi Yehu. ⁵⁸ Nahalaku lahi Pilatus anna kareiya nakamati-Na hi Yehu. Mang jiayaka hi Pilatus hinna woangu pareaha kahapurunya nakamati-Na hi Yehu kapikki woananya hi Yusuf awinna. ⁵⁹ Jiayaka hi Yusuf hinna dekiya nakamatina hi Yehu, napadedanya anna kaborrunya regi kaba kaka poloh, ⁶⁰ mang hinna pamaturuya ta ko'a watu ta rati bua hawolu namilikuna nappa hakkana nam dokku majallunguya. Mang nouw, nadekinya na watu bakul hinna keggalunya hi Yusuf anna toadiya nabinna watu rati, mang hinna halaku. ⁶¹ Mang nou lauw eija hi Maria Magdalena, jakka hi Maria oali ngarana adda ngodu tahaga rati-Na hi Yehu. ⁶² Tomayaka naladdu adda menga pahadia anadinya naladdu miggu, ngaradukada da imam kapala jakka datou parihi pakeha bolludajaka tahagana hi Pilatus. ⁶³ Panewi danyak dudda widdak, Marabba, nyiama manamuyaha yanaga anna morrikuha nei hi kabohuk, winna anna panewi, atillu boladdu kaguka tarati kiddi bali-Gunyak winna. ⁶⁴ Atonoukanaka, woangu pareaha kapikki jawaya narati tadalu tillu boladdu, hidda ammi oataja damuritu-Na adda lappa keadu-Nya, manga kiddi balina-Nyak waling tatou mati hiwidda oata adda panewi tatou dangu. Jiayaka nei peala nam reihi marihak waling taka wungana. ⁶⁵ Panewinanyak hi Pilatus winnajak dudda, nyiami eingu mataggu jawa. Huyaya kammi jawaya keriya nahawimming. ⁶⁶ Manga, halakudanyak adda jawaya narati hidda maraingu kalompuk matagu jawa, mang hidda pakahiluya natoadina nawatu rati.