¹ Namengaka papanewi bolludanya nei Yehu, winnajaka damuritu-Na, ² ''Nyiami mipeanyaka dubba laddukinaka na paska, nouya peala na Anana hi Moiri aharakanya kapikki harikkaya awidda- Nya. ³ Manga nou, ngara dukada daimam kapala jakka dam bokul peangu pakehadajaka ta umma padouna naimam bakul hi Kayafas. ⁴ Mang jiayak dudda hidda hakongkul kapikki appaya hi Yehu awidda, adda wainya napatipuda kapiaku-Nya ahamati-Ya awidda. ⁵ Atonouana widda adda panewi, ''Abbi appa nouma-Nya atangaya nawolu ulla, abbi karingak peala joanga tou dangu.'' ⁶ Tangaya aeinya hi Yehu ta Betania, taummana hi Simon nam katobu, ⁷ amminya nam hatouna namawinni anna toma-Nya eimemmanya nam hangi kubana naminya nam dokku mahaluya nahiina, mang nou hinna burina-Nya taka tiku-Na hi Yehu anna kalapa waina-Nya, atanga ngodu-Na anna angu. ⁸ Adda ittayaka nei weiga nam winni,dudda damurit banidanyak mang widdak, ''Gahiwoluwai hingukanya nei? ⁹ Hiwidda noungu, nei naminya mapa hingu oataya adagakanyak, kapikki barija riti dam milla.'' ¹⁰ Jiadinguka, hi Yehu, napeanya atahouda, jiayaka hiwinnaja,''Ga nyiami himmi pahahadukkaliya nei nam mawinni? Jakka jiapananya nammu nahawoluna makallu oatanguya lahi Nyouwa. ¹¹ Jakka jiapananya eipangalanya natou milla talihimi, jiadinguka daddi mipatekka hingumanya nahawolumi lahi Nyouwa. ¹² Anna buriya naminya nei nam winni taihi-Gu, ngara mearanaka anna tanuga Nyouwa peala. ¹³ Kakku tikkigiminya nam padening nyiami, langa kabayaka baru anna tomayang na Injil appatomanya tapinu tana, jiadinguka agananya naha langa woluna nei nam winni jiaya baru napapanewi pangalang dunna.'' ¹⁴ Manganou, hatou namurit waling dam tou habulu maduaha, hi Yudas Iskariot nahawiddang, halakunanyaka ta imam kapala, 15 mang winnak,''Nyiami gannanya nahawoamiga akku harakakagiminyak Dunna talimami? Jiayak dudda hidda hapakat woagu tilumbulu bella ommah hiwiddanya. ¹⁶ Jiayaka nouweiga, ealunanya nakaloaga kallung kakku pikki harakanya hi Yehu awinna. ¹⁷ Tangaya naladdu kawunga angu roati dam eiongu ragi, a'ammija damuritu lahi Yehu adda patutur, awidda, Bayaka peala mang him-Mu buhang pa'angu kamma pikki hadia-Gu pa'angu paska-Mu?'' ¹⁸ Nappa gaping hi Yehu winnaja, Tamaya ta praingu, lahi geara ammading, mang kapikki wimminya, winna na Guru, ''Narahi-Gu nadaggituk wimminya. Nyouwa attu-Ga ta umamu jakka damuritu-Gu kamma pikki angu paska wimma. ¹⁹ Jiayaka dudda damuritu-Na hidda patoma bollunya nappa peakanaja hi Yehu, mang hidda hadia pa'angu paska. ²⁰ Manga tomalidanyaka nariddung, hi Yehu ngodunanyaka anna aadengaja dam toumahabulu maduah damuritu-Na. ²¹ Atang anguda winnak hi Yehu, ''Nyowa Kutikkiya nam padening lahi nyiami, enga eihingung hatou waling lahi nyiami nam pako'u-Ga. ²² Mang dudda dokku millaya na atida, jiayaka hatou-hatou panewidanyaka awidda-Nya, Danyouwang moiri?" ²³ Mangaka,Dunna pagapingnanyak, winnak,''Nei naoali baha limma-Gu tamooku, jiadiyaka peala nam pako'u-Ga. ²⁴ Na Anana hi Moiri enga halaku balinaha alanga eimemanya nahatuli tu,ana Dunna. Jiadinguka, danna marimang nei natou, nam bei lau atiya anna pako,u-Nya! Reihi kallung hinguya yanaga natou nei anna mattapangu pajaji.'' ²⁵ Mang jiayak hi Yudas, nam pako'unya hi Yehu winna-Nyak,''Danyouwamang Moiri?''Jiayak hiwinnanya hi Yehu,''awimmu nouding jiayak, winnanya.'' ²⁶ Pahi atanga anguda, dekinanyaka naroati Dunna HI yehu. Mang habayananyaka anna pamarinya, hinna tippikuya mangaka hinna habaridanya damuritu-Na mang hi winna,''Dekiyaya jakka anyaya, nei jiayaka ihi tou-Gu.'' ²⁷ Mang nouwu, nadekeliya napainung, nahabayang anna pamarinya, mang hinna habaridanya, hiwin-Na,''Ngara dukkami nyiami, inunguya ya. ²⁸ Nei jiadiyaka naraa-Gu, naraa napa langa wolung rahina,aweiwarunya mulana natou nam dangu kanna pikku bahanaja dadoaku jalana awiddanya. ²⁹ Ya Nyouwa Kutikkigiminya waling laddu yayi,adak-Ku hillu inung waling tapingi anggur nei, jiadinguka peala Akku inukanguka anggur mabuang inudengagugimika ta Karajaanan na Ama-Gu.'' ³⁰ Damengaka pammanyanyi, halakudanyaka tapinu tadulla Zaitun. Hi petrus anna manyangkalunya hi Yehu ³¹ Manga nouwu winnajaka damuritu-Na,''Ngaradukami nyiami eingu mata'ukumi tariddung yayi mula-Gu Nyouwa.Alanga eimemanya naha tuli nam winna,'Kupaluya nam jawabeabu mang dahajawana hidda iha-ihada'. ³² Jakka jiadinguka, tomakayak Akku kiddi bali, Kumoulugimi nyiami ta Galilea.'' ³³ Panewinanyak hi Petrus awinna,''Toukada ngaradukada dudda kaeikang mata'ukuha mula-Mu ouwu, lahi nyouwa daei oatamang mapata'ukung.'' ³⁴ Jiayaka hi Yehu hiwinnanya,''Ya Nyouwa wigumemag ouwu, nariddung yayi, peala dadi dapakkumah da manu, ouwu baddi manyangkalmugak Nyouwa padillu wuddang,'' ³⁵ Napanewik hi Petrus winna-Nya,''Langkakku mati denga-Gu, nyouwa dajiang manyangkalma-Gug! Ngaradukada damurit hawanguk meara bolluna naha tikkida. ³⁶ Mang tomadanyak ta Getsemani hi Yehu jakka damuritu-Na, tomak nou winnajak,''Ngoduya ya, Kakku halakupag nei lauw lapahabayang.'' ³⁷ Namma maraija hi Petrus jakka dam toumaduaha da anana hi Zebedeus, nouyaka anna hiddu na ati-Na jakka anna milla. ³⁸ Mang nouw winnajaka,''Na ati-Gu dokku hidduya, kakku mati magga wig-Gu. Eikagimi yayi kammi oali-Ga anadinya nam jaji. ³⁹ Mang jiayaka Hi nagehir hakuduk, anna habayang hinna karadda na ngoara-Na toma ta tana mang winnak anna habayang,''Ama-Gu, jakka atonoukanaka,nei napainung kanna mollah waling lahi Nyouwa.Kajiakaya nahawukku-Mu nam jaji abbi jiaya nahawukku-Gu Nyouwa.'' Mang nou ammi-Nyaka tomanajaka damuritu-Na atanga juddada. Jiaya hiwinna-Nya hi Petrus,''Atonoukanaka, ouwu dammu hanggupmang ammu taara dengaga malli hangi jam? ⁴¹ Taara mannu jakka habayang abbi mikana'u taka go'ak. Nadeawa mapakeri maiya jakka narou maloajaya.'' ⁴² Nahalakuli hi Yehu paduang wainanyaka anna habayang hiwi-Na,''Ama-gu, nei napainung addan dukka wikkidina, jakka Akku inukanyaka jiakadiya hinna dukka, atonoukana hawukku-Munyak nam jaji.'' ⁴³ Hillu amijela-Nyah hadekka, tomanajaka adda judda adda hillu tarrujak dawuamatada adda judda geadu. ⁴⁴ Jiayaka, hinna jijakolija, halaku jellana-Nyah anna lippi habayang napa papadilung waina, mang nahatikki-Na jia pangalaya waling anna habaya moulung. ⁴⁵ Manga nouwu, balina-Nyaka hi Yehu anna tomaja damuritu-Na hiwinnaja,''Juddayaya kammi kawannaryaya. Patetinyaya peala daggitnanyak na Anana hi Moiri aharaka-Nya talima tou doaku jakka tou jala. ⁴⁶ Kiddiyaya, maiyaya kahalakuda. Patetinyaya natou nam haraka-Ga Nyouwa namaranika.'' ⁴⁷ Tanga panewi hingunaha hi Yehu, hi Yudas namurit nappa touma habulu madua waiha, amminyak. Dam raina toudanguha dam mangu katopu jakka nibbuda, dam waling ta imam kapala jakka dam mabokul hawaingu damma matua pangadanguda. ⁴⁸ Dunna nam haraka-Nya hi Yehu wolu tadananyaka winnak,''Gearaya peala nahangidihugu, jiayaka Nammu appahinguyaya.'' ⁴⁹ Hi Yudas lihinanyaka hi Yehu winnak,''Halamat, Rabi winna-Nya!''Mang hi Yudas ngiddina-Nyak. ⁵⁰ Jiayaka hi Yehu hi winnanya, ''Oali ati, pahalakuyaya naha ammi dengagu.''Alolu ammijaka datou dangu adda marani, adda kataku-Ya mang hidda appaya hi Yehu. ⁵¹ Itadanyaka nam hatouna namaraina hi Yehu, anna lihuya nakatopuna, mang hinna kahapi wuakahiluya na atana na imam. ⁵² Jiayaka, hi Yehu winnanyak, pateaku balinya nakatopumu. ⁵³ Penyanam tapa ngadangumi danna mampumang anna kareiya na Ama-Na wimmi-Ga, jakka jiakayak, ya memma napaleawaha damalaikat damma habulu dubba reihi barranguya adda toma-Ga? ⁵⁴ Jakka atanoukanak baru, gikkina widdadanya mang hinna paleting tahurat bakul enga jajimeman nam winna? ⁵⁵ Naladu nouweiga, tanga panewina hi Yehu tahaga toudangu,''Ga himaga touwaling makaleli makeadumi nyiami ammi lohuwaing katopu jakka nibbu, ammi appa-Wa Nyouwa? Wehango wehang, eipangala-Ga Akku mangajaru ta Bait Alla, dammi appa-Maw. ⁵⁶ Jakka jiadinguka, ngara dukana ya najaji hinguha .''Mang peala, ngara dukada damurit, dadijak bolu-Nya adda palai. ⁵⁷ Manga dudda appada-Nyaka hi Yehu hidda marainya lahi Kayafas, na Imam Bakul, napingi pakehada adda kabuangu da ahli Taurat. ⁵⁸ Jiayaka, hi Petrus hinna keri wali marou-Nya hi Yehu, lappak anna duki tahaga umana na imam bakul. Mang na tama jella hi Petrus, anna ngodu dengaja da pangawal kakku itaya nam jaji awinna. ⁵⁹ Ya atounaka, da imam kapala jakka ngaradukada da Sanhedrin jajidanyaka hakhi pakitung, kapiki piaku ahamati-Ya hi Yehu awidda. ⁶⁰ Jiadinguka, atohouada dudda dadda piaku juamang langaka dokudanguha da hakhi pakitung dam ammija. Mang nou eija dam touma duaha dam widda,''Natou nei winna napanewi-Na, 'Nyouwa kumokanya Akku poppaya na Bait Alla jakka Akku pakiddi baliya tillu boladdupagunya winna.''' ⁶² Mang jiayaka, na Imam Bakul kiddinanyak anna dedi awinnanya hi Yehu,''Penya Ouwu dammu peamang papagaping? Agananya napa itana yanatou nahawolu-Mu?'' ⁶³ Jiadinguka, kawannar pananya hi Yehu. Mang na Imam Bakul dunna winnanyak hi Yehu,''Kuyura-Wu wainya na ngarana hi Alla napingi morrik, mang Ouwu himmu tikkiya lahi nyiama, Penya jia tekka-Wuka Ouwu na Mesias, na Ana Alla? ⁶⁴ Panewinanyaka hi Yehu winnanyak,''Napapanewimi jiadiyaka. Atonouana, wigugimi nyiami waling yayi itaminyaka na Anana hi Moiri tahada tourara, anna ngodu ta kraha lawanana hi Moiri tapa doungu Majaga, mang hi ammi-Nya tajoanga robang waling ta awang.'' ⁶⁵ Jiayaka, na Imam Bakul hinna hirraya nakoapina mang winnak,''Pamma doluwaing nanyak! Hillu gawaiwalingu hakhi? Itadiya, yaranguminyak anna pamadolu waingu. ⁶⁶ Beinya napa pangadami nyiami?''Dudda dam pareaha Yahudi pagaping danyak,''Dunna napa doumemanguka ahamati-Ya widdak.'' ⁶⁷ Mang jiayaka hidda padoinina-Nya nangoara-Na mang hidda jurra-Ya. Jakka eijellanya hawanguk nam kababa-Ya. ⁶⁸ Hiwiddalkinya,''Tikkiyaya nahapea-Mu gannanya nam jaji lahi nyiama, heh Mesias; gearaha dam tauwu Ouwu?'' ⁶⁹ Atanga ngoduna hi Petrus ta taloara, aminyaka nam winni anna layang awinnanya, ''Ouwu oalide'ami hi Yehu natou Galilea nei.'' ⁷⁰ Jiadinguk, hi Petrus danna akumaya tahagada ngaradukada hei dudda, winnaka, Nyouwa daku appamagiminya naha tikkimi.'' Tanga lohunguna hi Petrus tabinna, ammelnyaka nam winni hatou nam layang awinnanya,''Natou nei maraide'ada hi Yehu nam waling ta Nazaret.'' ⁷² Mang jiayaka hinna parungu hi Petrus,''Nyouwa daku peamanya Natou nei awnna.'' V 73 Madeikudduk, datou damma dedi talihina hi Petrus widalinyak,''Nanni ouwu oalide'amika nyiami, naloagatum danna baira hingumang.'' ⁷⁴ Parungu nanyaka hi Petrus mang hadanni payuranaka, jiayaka winnak, ''Nyouwa dakupeamanya natou nei.''Mang pakukudanyaka damanu wolu. ⁷⁵ Jiaya nouweiga, hi Petrus namunanyaka nahatikki-Na hi Yehu,''Adadi dapakuku damanu wolu, baddi padillu wuddangmuka ouwu adannu aku-Wa Nyouwa awinnanya.''Mang nouwu, lohungnanyak hi Petrus anna houw adda rekka kaballikuya na atina.