¹ Mangalika, na karajaan surga hameara waidanya dam touma habuluha dalakeada mawinni dam iddiha dapalitada kamma paregga denganya nalakeada moani nam aminya anna tomanya na araweina awidda. ² Touma lima dabodok dam touma limaliha dapeangu. ³ Amijaka dam bodok dudda adda iddiha dapalitada, jiadinguka dadda iddimang minya. ⁴ Dudda dam peangu daiddi minya ta anna kuba merrah jakka hidda taujellaja ihida dapalita. ⁵ Mangaka,adda ammi dakajuanyaka nalakeada moani, ngara dukada dam nading judda bolludanyak. ⁶ Jiadinguka, paduaka riddung yakka rangudanyaka nam patiwung,'Nalakeada moani amminyaka! Lohunguya kammi reggaya awinna! ⁷ Manga nouwu, ngara dukada dalakeada mawinni kiddidanya hidda ealuha dapalitada. ⁸ Dudda dam bodok widdajaka dam peangu,'Woagama dumma hakudduk minyami, tikki habedda kidda nyaka dapalitama nyiama.' ⁹ Jiadinguka, dalakeada mawinni dam peangu dapagaping, da'amang, darekkamana peala nyiama jakka lahi nyiami. Reihi nam kallung, halaku tam dagang minya kammi hi.' ¹⁰ Tanga halakuda lapa hi minya dam touma limah, amminyaka nalakeada moani, mang dudda dam langa hadiada, tamadanyaka adda paregga denganya ta roangu umma pingi pahalakudanya natunu lilawi mang toadidanyaka nabinna. ¹¹ Manga nouwu, amijaka dalakeada mawinni hawanguk widdak, Moiri,moiri! Wehakigama bina dumma.' ¹² Jiadinguka, napa gapija,'Mapadeninguya awigugimi nyiami, nyouwa dakku peahingu memamagimmi.' ¹³ Jiakadiyaka nouwu, mipa'atinyaya dammi peanya naladu rahi amminya.'' ¹⁵ Nawoa moulunya hatou lima talenta, hatouwali dubba talenta, jakka hatouwali hangi talenta. Hatou-hatou toara hamampuda. Hatou nam lima talentana attunyak anna pahalakuha, nakolli memmangu lima talenta mataaba. ¹⁷ Toujellana nam kolling dubba talenta, nakolli jellaja dam dubba talentalida. ¹⁸ Jakka jiadinguka, natou nam kolling hangi talenta halakunanyaka, anna hakka pamajalunya tana, mang hinna kabuninya nariti naha woananya namoirina. ¹⁹ Madedeika, nei moirida aminyaka anna yapudaja dappa utuda. ²⁰ Aminyaka nam hatouna nam kolling lima talenta anna iddinaja tahagana dam lima talentada dahautuna, mang winnak,'Moiri, ouw muwoaga lima talenta nyouwa. Kammuitaya, nyouwa kukolli jellanguha lima talenta dappa uttugu.' ²¹ Jiayak hiwinnanya namoirina,'Nakallu oatang nouw, dummu ata nam mikku jakka marenna. Mumikku waling nam hakudduna, jiaya hikku woagu madangu jakka mabakkul, tamadaka kapikki meara hennang.' ²² Mang dunna nam hatouna nam kolling dubba talenta aminyaka tahaga awinna,'Moiri, ouw muwuaga dubba talenta nyouwa. Kammuittaya, dubba talenta jelladaka daha kolligu akku utu.' ²³ Napagaping namoirina winnanya, 'Nakallu oatang, ouw ata nam mikku jakka marenna. Mumikku waling nam hakuddukuna, jiaya hikku woagu madangu jakka mabakkul, tamadaka kapikki meara hennang.' ²⁴ Manganou, natou nam kolling hang talenta ammi jelanyak tahaga mang winnak,'Moiri, kupeagu ouwu dokku bani atiwu, ammu kollingu tapadoungu dappa rawimu, ammu pupuha tappa doungu dappa hammulamu. ²⁵ Jiakadiyaka, atonounaka hikku mange'at mang hikku halaku akku kabunija datalentamu ta dawatana.Ittadiha, ouwu eingumuka agannanya nam eingumu.' ²⁶ Jiadinguka, namoirina napagapinya winnanya,'Ouwu nanni ata mamanyarik jakka majaubulliwu! Mupeakadinya akku pupuha dappa hamullagu jakka akku kehaha tapadoungu dappa hoarugu. ²⁷ Jiayak atonounaka, ouwu bakalangu mubijalgajaha daritigu ta bank, baru akku balidingu, pikki kolli baliguja daritigu lappakung da bungada. ²⁸ Deki baliyaya natalenta nam hangina naha woadanya, kapikki woainnanya nam kolling habulu talenta yannag. ²⁹ Hiwigunoung, natou nam langa einguna enga woajellanyah, mang hinna kolli padangu. Jiadinguka, natou dam einguna, hukka dekidananya agannanya nam einguna. ³⁰ Patullakunya nei na ata dam eingu gohuna nou daku tapadoungu nam kapetta dingu danga. Nouyanguha peala hinna ittangu mawillana hitaweimata damawaraya. ³¹ ''Atomakayaka peala na amminya hi Moiri anna patekkanya nabiaha namadi-Na, mang hinna ngodu ta gala biaha-Na. ³² Ngara dukana natou tapinu tana hinna kehha bolluya ta haga-Na, mang hinna hikkaha hatou-hatou, mearana ahikkaha da beabu waling ta kamemi. ³³ Mangaka, natauha da beabu ta lawana-Na, jakka da kamemi ta lalei-Na. ³⁴ Mang dunna na raja winnajaka dam eija ta lawana-Na,'Maiyaya, nyiami nahawoa-Na kanyuru na Ama-Gu, kolli pangalaminyaka na Karajaan napa hadiadagimi walingu nakawunga jeli tana. ³⁵ Atangakayak Akku karobbang, nyiami miwoa-Ga ouhu. Akku madouwu nyiami mi woaga wei. A'mmi-Ga ta ummami, mikamaikaga Akku tama. ³⁶ Akku kalolu mang mi pakenna-Ga koapi, Akku kadauku milappa ealu-Wa. Akku tama ta gallu ammigimi ammi keri-Wa.' ³⁷ Jiayaka datou dam tiddi dudda pagapida-Nyak,'Moiri, pirraka amma itta-Wu Ouwu ammu karobbang mang himma woagu ouhu, atau Ammu madou mang himma woagu wei? Pirraka amma ittawu Ouwu Ammu mai ta ummama mang hippa leawa-Wu tama taroangu umma, atau Ammu kalolu mang himma pakenna-Gu koapi? ³⁹ Pirraka amma itta-Wu Ouwu Ammu kadauku atau Ammu tama ta gallu manga himma lappa ealu-Wu?' ⁴⁰ Napagaping na raja winna, Nyouwa kupanewinya nam padening lahi nyiami, ammi pahalakukayak ya taoali jaji-Gu namma dokku millaya, mearadinaka a lahi Nyouwaya.' ⁴¹ Mang nou, winna jellaja damma eija talalei-Na,'Helling wali tahaga-Gu, nyiami makenna kuttukumi, einyaka na api nam errik pangalang napa langa hadiadaja damoritana jakka damalaikatuda noumika peala ammi tama noungu. ⁴² Hiwiggu noungu, Akku madou dammi woamaga wei Akku inung. ⁴³ Akku mai ta ummami dammi kamaikamaga Akku tama ta roangu umma; Akku kalolu dammi pakennamaga koapi, Akku kadauku jakka atagallu-Wa nyiami dammi lappa ealumawa Nyouwa.' ⁴⁴ Mang dudda pagaping jelladanyah,'Moiri, pirrak nyiama amma itta-Wu ammu karobbang jakka ammu madou, atau ammu kadauku, ammu kalolu, jakka a tagallu-Wu hidamma lippi laya-Gu? ⁴⁵ Mang jiayaka hi winnalija,''Nyouwa kutikkigiminya nam padening lahi nyiami, touna yayi adammi pahalakukayaka taoalimi nam dokku millaya nei, mearana adammi pahalakuya lahi Nyouwa.' ⁴⁶ Manga nou, hei dudda jiahaka damma kollinya na hukkung dam eingu dikkina, atounaka dudda datou dam keriya nam kallung jiahaka dam kolling morriku malodung.''