¹ Jaka peala hi Allah ana pakiddi baliwu oalinya hi Kristus, wainya nama jaji wali dehang, ta padou ngoduna hi Kristus takaraha lawanana hi Allah. ² Pangadangu agannanya nama jaji wali dehang, da jiamaya nama jaji ta pinnu tana ³ Kadang mi matika, jaka na morrikkumu nakabuning amu oalinya hi Kristus lahi Moiri. Hina peala na morrikuna ana hameara lahi Kristus jiaya himu oali marainya ta biaha madina. "Ana dukikaka (a ammikanyaka) gearada jiata, jimi peala mi hunga marainya ta biaha madina." ⁵ Mu pahigil bolluha ngala napata pinnu tana yayi, napa laungu wiki, nama jurrak, hawa nafsu, woluya dama kallung jaka amu heliya napa tagu oalimu nama hameara noungu aha Moiriya na ai na watu ⁶ Ngala dukana yayi jiaya napa bali dengana hi Allah ta huhu anana dama manudu. ⁷ Ya nama toungu jimi mi wolu jellaya a engamiha amikahangi dengaja. ⁸ Ya atounaka jimi langa mengaka apa murrah gimi ta pata matou yangu - buju, pabaning wiki, woluya nama jala, kangoruk, ngiki waingu oali, jaka nahilu manyarik nama louhung wali ta a'amu. ⁹ Abi buhadingu ami walluk wikimi ta oalimi, kadang jimipalouhu gimika waling ta pata nama deingu jaka ngala napa wolumu ¹⁰ Mi kollinyaka na pata buangu, napa langa paheapang napa langa peangu keriya na hoda nama woluda. ¹¹ Tadalu napa langa peada yayi, daeimang tou Yunani jaka tou Yahudi, tou pa kahapi jaka dapa kahapi, tou Barbar, tou Skit, ata, tou papahela, jidika hi Kristus jiaya ngala dukana jaka nou bolluya. ¹² Mu wainya ya, toungu ngala da tou pa langa pedina hi Allah, napapa higil jaka napa namu, wainguya nama murrah, nama kallung, paha wawa wiki, nama loayang jaka napa najjarung wiki. ¹³ Woanya a eingu dama einguna. Millanya atina oalimu. A eikang hawoluna na oalimu dapa buhamu, millanya ati toungu hi Moiri ana millagu ati. ¹⁴ Jaka ngala nama eingu lahi ou, kamu waingu milla ati, jiaya nama pigimi himi kahanging hina maddung. ¹⁵ Mattakanya napa buhang wiki nama waling lahi Kristus kana kolling padouna ta atimu. Kadang jiaya napa buhang wiki nama kamaikagimi jimi hi noumi ta ihina. Jaka mi pamalanguya. ¹⁶ Mattakanya napa tikkina hi Kristus kana engang lahi jimi waingu mannanguna. Jaka ngala napangadang nama kallung jaka papeakang wikimi hatou - hatou waingu manyanyi. Jaka pamalanguya waingu manyanyi tou palanga pedi lihu nyongana. Mi manyanyi kami wuatu haliya ta atimu lahi Allah. ¹⁷ Jaka aganna hingunya napa wolumu, pahalakuya tadalu ngarana hi Yesus Kristus. Mu pamalanguya hi Allah Ama da iata nouya jellaya lahi Dunna. ¹⁸ Ngala mawinni nama eingu la'na, pa akanya na la'mu, tou jellang lahi Moiri. ¹⁹ Ngala moani nama eingu araweina, millanya atina araweimu, mang abi wolukaya napa hiddu ati dengada duda. ²⁰ Dimi lakeada pa akanya na amami na inamu agannanya napa wolumu, kadang jiaya napa egi ati dengana hi Moiri. ²¹ Ngala pa ama, abi taukanya hiddu ati na anamu, abi einya namerrah atina. ²² Ngala na tou napa wolu ata, pa akanya na marrabamu ngala napa wolumu, da jiapakaya a einy ana ittawu, jidinguka waingu wali atimu. Mangeatunya hi Moiri. ²³ Aganna hingunya napa wolumu, pahalakuya waingu kalaki atimu toungu napa wolumu lahi Moiri jaka da tutu tou raramaya. ²⁴ Jimi mi penyaka enga kollingumi kaheawa napa langa peakana ya jiaya nakanyuru kanaga waling lahi Moiri Kristus nyimi napa woanagimi. ²⁵ Tutu taguna na tou dama tiddi jiaya napa hukungu waling dama tiddi napa woluna, da eimang papa akana.