¹ Na bakkul na atigu, langka tou memma jellana nama toungu da eimangu wudda na. Langka tou nou jellana kaku tikki danya gannanya na pa patekka na jiaka gannanya napa pa itta naga hi Moiri ² Ku penya na lara na na tou Kristus habulu patu doungu ma langa loppah - penya nou ya ta ihina daku pe jella mangu, penya ta hapali ihi na hi Allah nama penya na tou weiga tikki panaka na padehana ta danni katillu na ta sorga. ³ Ku penya na lara na natou weiga - penya ata ihi nanya, annang ta habali ihi nanya, daku pe jella mangu, hi Allah nama penya. ⁴ Tikki panaka na madeddikungu a padehanya ta Firdaus padoungu binnu bongu jibu jabu lappaka na rangu ya na patikki dapa tikki tou rara. ⁵ Ku bakkul ati denganya na tou weiga , jiadinguka daku bakkul ati dengamanya na lara patagu gu, helinya na pakali loja gu. ⁶ Kadang aku bakkul ati denga kanyaka matoungu, da hilu tou kato'a mawakakadang kutikki nyaka nama padeneng. Jiadinguka ku pattu wikigu, ka abi eingu ma yapu ganya ada pareihi ha walingu na pa itta da lahi nyouwa jiaka napa langa mangu da. ⁷ Lapakka ka abi ku pajaga wikkigu witi gananya napa langa itta gu duku dehha ya na pahabannar dengang toma hina paliga nama maga walla ri ta ihigu, jiaya hi padibbang kana piaku o'it tu wa, ka abi ku pajaga wikkigu. ⁸ Nama toungu padillu wuddanguka aku pa ou nya hi Moiri kana pamarou ganya na papalewa na hi padibang. ⁹ Jiadinguka na pagapinguna hi Moiri lahi nyouwa winna, " Tutuka aku awi namugu, kadang nou kawuka ta dalu lojamu na pinnu ya na bihaku." Jiakadiyaka reihi buhhangu gu ana bakkul na atigu tadalu lojagu, kana hapuruganya na biha madina hi Kristus ana paeini hamawuga. ¹⁰ Jiakadiyaka na egi na atigu lappaka na halela na atigu tadalu lojagu, tadalu tou wa palu, tadalu kapiatugu, toukana tadalu aku liya nama hadukka-hadanga witi na hi Kristus. Kadang aku loja kaka - nou ya hiku maddung. ¹¹ Mateangu tekka ya ku kato'a! Jiadinguka mi ruhu ga, bakkalangu kami haila ga wiggu. Langka da eikanguka willigu hakudduk tekkana nou nammu tadalu ga gannakanyaka daku muri mangu ta haga wihi limmana hi Moiri na papa akangu. ¹² Dukkana na pali tada waingi ya nyouwa na wai wihi wai limma naga hi Moiri, papahalaku nyaka ta padua mi waingu dukka bellar ati, na tada - tada biha na pawolu lappaka a patekkanya nama biha - madi. ¹³ Kadang penya bei ikanyaka a pali kadenga dagimi walingu ta kaboggur - kaboggur tou gereja hawanguku, higil maka tadalu gannanya toma nyouwa daku padeitu magiminama buat? Ku paohhakimi a eikanyaka na pahabuat hapapa gu! ¹⁴ Mateangu tekkaya nou atou naka padillu wuddanguka aku ganna panya kaku patomang lahi dimmi wiggu, wiggu gimi daku padeitu magimi nama buat. Kadang da jiamaya na hapoti/ngawu pinnu tana na pamanyerragu, kadang nyimi jiaya. Kadang da jiamaya da lakeda nama kehha ha da hapoti tutu taguna na inna-ama da, kadang jiaya na ina-ama da nama kehha tutu na na ana da. ¹⁵ Jiakadiyaka hiku buhhangu daganya na ngawu gu, kali-kai na ku daga jella na ihi gu tutu mi? ¹⁶ Touna, aku namu tetekka mika, moda kaka a dami namu ga ¹⁷ Penya eikadingu walingu ta padua mi na padeki uttu waigumi aku palewa tou? ¹⁸ Tou tekkanaka ku palewa tekkayaka hi Titus, ada pamaraingu harega oli na hawanguk. Penya eikadingu na padeki uttu waina hi Titus waling lahi dimmi? Dami itta mangu na pata morrikkuma jaka na pangaddanguma ana hamera? ¹⁹ Habaddi madei ka ami patuttur ta atimi ya nyiama pamannang wikkidanya ta hagama a wimmi? Ta hagana hi Allah, tangara na hi Kristus wimma gimi ya dukkana aku oli buhha mi hinna jaji kana piaku maddung na lara manningumi. ²⁰ Kadang napa dadar ati dengangu toma aku mai kaka aku toma kagimika a dana hamera agannananya tora na papangada gu. Lappaka dimi ami parrega denga ga ana heka kaka walingu agannanya tora na papangaddami. Napa dadar ati dengagu a eikanyaka nama paheipu halang, mimmir ati, na bani, ka mali nyouwa nama winna ngiki waingu ngara olina, pajalanya dama jala, buttiku - buttik,jaga ati, lappaka na kangila. ²¹ Na dadar na atigu pela hillu mi ka ga ka, na pahawawa ga hi Allah ta hagami toma na hadukka ma atigu ta haga madangu nama wolu ya nama doku - nama jala ta rahi malanga loppah jiadinguka didi da haria amanguha walingu tama irrak jaka tadalu a dada pengu wikki ma da.