¹ Ganna panya ngarana ka eingu bellar atimu ami haganya nama hakudduna na kato'agu. Tou nou tekkana einya na bellar atimi lahi nyouwa. ² Kadang napa ma'u denga gugimi. Ma'u murrah ati ya, kadang langa pakahangi denga gimika ta hatou namoni kana marai gimi a pali anakara ma murrahu mi lahi Kristus. ³ Jiadinguka na pamange'atugu, a eikanyaka nama pajallurunya na pangaddangumi waling ta ati manudumi nama murrah lahi Kristus, ma mearangu lahi Hawanapa palapinguna na maddu waingu pangaddang buahuna. ⁴ Kadang einyaka na bellar atimi, a eikanyata hatou nama peka ya na ngana hi Yesus nama hekka walingu a gannanya keriya napa langa peka digimi, annang a wo ka gimika hangahu nama heka walingu gannanya napa langa ka mi annang na wini tutu tiddi nama heka walingu napa langa kami. ⁵ Jiadinguka keri kayaka na pangadangu gu da hakudduk tekka mangu nama helling walingu ta wihi limana hi Moiri dama eingu ma tomanya. ⁶ A daku kolli pakallu kanguka tadalu panewi gu, da to nou amangu na lara peangu, kadang ma patekkanyaka lahi dimmi wehangu-wehhang ta dalu ga gannakanyaka. ⁷ Eikadingu jala pawolu gu aku karaddak wikkigu aku pahawawa wikkigu toma kami madeddikungu witi aku patoma giminya na wini tutu tiddi na hi allah lahi dimmi da pawongu hi na? ⁸ Ta kaboggur tou gereja hawanguku habadi parimang gu jaka aku ka ya na wedda kerangugu kaku piaku tulu-gata mi. ⁹ Lapakka tadalu aku liya nama milla ta padua mi daku pamawilla magimi hatou tekka, kadang gannanya nama jakang lahi nyouwa na paneggal ganya da anguwua - ana wini nama patomang walingu ta Makedonia. Ku marommatungu wikkigu walingu ta ngaladukkana ka abi ku padeitu gimi nama buat lahi dimmi tou pangalang jua gunya. ¹⁰ Ta dalu gannanya nama padeneng lahi Kristus, nama einya ta morrikugu na palanga pamaddu gugiminya, gannanya na pabakul ati dengagu ge gerakayaka da eimangu nama heipu halanga ta tana Akaya. ¹¹ Ga da tou na? Penya witi adaku namu gimi? Na penya hi Allah. ¹² Jiadinguka gannanya na pawolugu, tou jua na aku pahalakunya ka abi eingu kaloga da ada pahunganya tou na dudda ada hameara wikki da lahi nyiama tadalu na bakkul ati denga da. ¹³ Kadang dudda hou wihi - lima ma kallu dehangu ha ma palapinguha. Ada deki hadana da wihi - limmana hi Kristus ¹⁴ Nama tongu abi mi bannar iddi kangu, kadang hi Moiri tana dunna da deki hada na da malaikat . ¹⁵ Jiaya da pa habannar dengamanya a eikanguka ana papalewa ada deki ha da ana papalewa ma padeneng ta pahupu morrikkuda da kollinya na tangana keri ya na pawolu da. ¹⁶ Hadekka li : Abi eikangu hatou ma kato'a ya awidda ga. A tou jella kanaka dimmi matoungu jella a wimmi kagaka, mi pajola ga limma ya nyouwa ma kato'a kaku piaku bakkul ati wainya kudduk. ¹⁷ Gannanya napa tikki gu, aku tikki kayaka ya weiga da daku panewi waimanya keri ya ma wini na hi Moiri, jiadinguka panewi ma kato'a ya nama manning ta atina kaku bakkul ati wainya. ¹⁸ Kadang na dangu nama bakkul ati denganya na pata tou rara, tou jella kanaka nyouwa kubuhha jellanya bakul ati nama toungu. ¹⁹ Kadang dimmi einya na maredda atimi ta makato'a witi einya na ati manyakatumi! ²⁰ Witi maredda ati mi a eikanyaka nama pa li ata mi, a eikanyaka nama habu'u mi, a eikanyaka nama jajja mi, a eikanyaka nama jaga ati ta hagami, a eikanyaka ma kababa mi. ²¹ Ka maki'i ota aku o'anya, toma matoungu kadika ei tekkanya na loja ma. Jianguka a eikanyaka hawanguk nama taru bani ana bakkul ati denganya ku panewi ma kato'angu ku taru bani jella. ²² Penya tou ibrani kadiha ? Annang tou Israeluha? Nei nyouwa tou Israel jella kadiwa penya dudda huhu - ana Abrahamuha? Nei nyouwa huhu - ana hi Abraham jella kadi wa. ²³ Penya wihi limma na hi Kristus tekka kadi ha? (Panewi ma kalangu gunyaka ) mareihi kalangu wa nyouwa na pareihingu na pajoili waigu, ku kali ta manya na umma koggang, da padirra mangu ada tou wa palu, padua dua baling aku liya na mawu mati. ²⁴ Palimma wuddang ada taungu palu da tou Yahudi kira taungu palalu da eingu tillumbulu hiwwa palu. ²⁵ Padillu wuddang aku li ya nama kapiatu. Padillu wuddang a tikki tabilluna na tena, hangi laddu-hangi riddung a tiddi nou gama ta padua tahik. ²⁶ Ta dalu halakugu padua dua baling aku hagangu tama kapiatu - ta ma hadukka mumuh ta wei wiwwa jiaka kuhaganya da mabotu, tou jellana nama walinguta tou Yahudi , pakarabang ta paraingu bellar, ta maredda ginnang, ta padua tahik, tou jellana na karabang walingu ta anguwua - ana winni ma kallu dehang. ²⁷ Ku joili hingung witi na buatuna na pakerragu, padua baling aku judda, ku karobbang jiaka madou, padua-dua baling aku pattu wikki gu ta pa angu, ku maringu ada eikinguka katarri kalabi gu. ²⁸ Lappaka, daku hilu tikki bollu maha ka na paligu, na lara morrikugu wehang - malung, aku karawaha na kaboggur tou gereja. ²⁹ A eikanguka nama loja, denga kadingu? A eikanguka nama hobbang, penya, dana mulu mangu ma atigu witi hadukka ati? ³⁰ A eikanyaka na pa bakkul ati denga gu, ku bakkul ati wainya na loja gu. ³¹ Allah na Ama na hi Yesus na hi Moiri da, na pawuatu hali lappaka piangu - piangu, na pe ga adaku palaping. ³² Ta Damaskus nama hamannu ya na ma pareha hi hangaji Aretas na palewaha ada jawaha na paraingu bellar Damaskus kapiaku appa wa widda. ³³ Jiadinguka da tou mapakeri da pilluwa ta kawukkat ada paliwa ta adda ada hapuruga ta habali kangali paraingu toma hiku mannumara walingu ta limma da.