¹ Nyouwa, hi Paulus, tou nama mangeat dedi ta hagami, jiadinguka ata pamarou kanguka ku taru-bani gimi, ku panamu gimi ta ngara na hi Kristus nama moppah panarrung. ² Ku kareimi ka abi mi huttakawa aku patekkanya na taru-bani gu ta lihimi, kerikayaka na pakabu atigu kaku wainya nama hawattuk lahi dudda nama widda ta ati da, nyiama ya morrik waimanya ha na pinnu tana. ³ Tou tekka na nammu, morik manyaha ta pinnu tana, jiadinguka dama pajukka waimangu pata pinnu tana. ⁴ Kadang na nibbu tarama tadalu ama pajukka waimangu nibu tara pinnu tana, jiadinguka waingu nibbu tara napalanga paneggal gama waingu biha madina hi Allah nama kullih ana nyagarunya na pingi kabuning. ⁵ Ma pata ha na pata pangaddanguda na tou lappaka ma wehharunya gannananya na pabogang waida ada ge'anyaka abi pakeri lahi Allah widda. Ma toni ya na pata pangaddangu da lappaka ma talu ama pahaganya lahi Kristus. ⁶ Lappaka ma rahhukungu jella a hukkunya tora dama nyinyak, taliwwu ami pinnu nya na pamanudu waimi. ⁷ Kami patetinya gananya napa itta mata waimi a eikanyaka hatou nama manni tetekkanya, huhu ana naga hi Kristus nama winna, annakaya kana pangaddang atina touna nyiama ya huhu ana nagama hi Kristus, mearanguna dunna. ⁸ Tomma aku wullak pareihi kanguka na kullih, napa pakanyuru nagamahi Moiri kami piaku pakiddi wainya, jiaka dapamanau waimagimi, nama tangu pamakki denganguya. ⁹ Jiadinguka daku buhha mangu aku patekka gimi nama ngerang ku pamange'at gimi waingu da hurratugu. ¹⁰ Kadang widda na tou tora, " hurratugu ma habanningu ya, jiadinguka a pahaga ngora denga kanyaka, na loja na pata na lappaka gannanya na patikki na da eimangu ihina. ¹¹ Annakaya na tou nama winna noungu kana penya a tou kamaka ama pahaga ngora kanguka mearanguna napatikki ma ta hurratuma a dama pahaga ngora denga ja. ¹² Nou nammu dama taru - bani mangu ama hameara dengamanya na tou nama deddik wikki da. Ada katutu wikki da keri ya na katutu napawai katutu taguda. Da keri ukkumaya na kato'a da. ¹³ Kali kai na nyiama dama pa loppah mangu na pabakkul ati waima. Jiadinguka, eigamata padikki na ama pahalakunya na deitu - tiddunguna keriya na pabottahuna hi Allah. ¹⁴ Kadang ama bo'arunya na wini tutu tiddi nahi Kristus, na tomaka ta padua mi toma dama paloppah mangu na dikkina napa kerra ma ngerang dadi ma patoma na gimi. ¹⁵ Dama bakkul ati dengamanya tora pakerra da hawanguk ta padoungu da witi eingu dikki na pa taguma. Jiadinguka napa mannima, ana ki-ki tubu kaka na lara manningumi, ma kollinya na pa akangu pareihi - waling ta paduami ama hameara kanyaka ta padoungu kerrama na palanga bottah. ¹⁶ Jiaya na morrikuma ya kama piaku bo'arunya na wini tutu tiddi ta hangi padoungu nama reihi marou walingu ta padoungumi ya lappaka dama bakkul ati dengamanya a eikanya toma pakolli da hawanguk napalanga bottah natutuda. ¹⁷ "Jiadinguka a eikanya nama bakkul ati denganya annakaya kana bakkul ati wainya hi Moiri." ¹⁸ Kadang da jiamaya na tou nama bogang wikki na nama tarrung, jiadinguka na tou napa haila na hi Moiri.