¹ Na lara gata danya da tou na palanga papahigilungu, daku hilu tulih magimika. ² Ku penyaka na hawali ati mi, bianya ku heilagimi tahaga tou Makedonia. Wiggu ta akaya rahhik danyaka walingu hadoungu ma loppah. Lappaka gannanya na pawolumu jiaya nama pahalelaha da atida tou da nama dangu hawanguku. ³ Hiku palewa ha da oli jaji - oli jaji mi, toma ma pabakkul ati dengami ka abi na walawaingu, jiadinguka kami piaku pagennak pakallung keri ya napalanga wiggu gimi. ⁴ Toma pela aku maraikanguka da tou Makedonia ka abi da toma gimi a dami dinyak, toma nyiama - ka abi malolluk waigimi - ama makki denganya na palanga manning ta ati ma. ⁵ Jiakadiyaka hiku buhhang arahhuk gugimi ka halaku moulu oli jaji da, kada patiddiha a gannananya na pakehha da na palanga peka danya ta kawungana, kada piaku itta ya nama pahawali atigu, da pawaiamangu na pata panakkung. ⁶ Kami penya ya : Na tou nama kuddukina na wini na paho'aruna, hakudduk jella ya na paharobu na, lappaka na tou nama ho'ar padangu wini na, na dangu jella paharobu na. ⁷ Annakaya hatou - hatou kana pawongu, kana waingu mahawali ati, ka abi na waingu hadukka ati, annang ka abi na waingu buat ati. Kadang hi Allah na namu ya na tou nama gata hawali ati waingu egi ati. ⁸ Kadang hi Allah na piaku ana hapuru giminya na kanyuru - kanagga lahi dimmi, ka abi mi kurang - jakang toma na wo pareihi gimi tadalu mattu - mattu pata panamungumi. ⁹ Keriya napa tulih : " Na pabari - baringu na wonya na tutu taguna na tou milla maddung na padenengunalappaka piangu - piangu." ¹⁰ Dunna ma panggulunya na wini tutuna nama ho'arungu tou jella na na roti paangu, jia jella ya nama panaggul giminya na wini natutumi, nama patubu binnunya, ana patubunya na pata morrikumu nama padeneng. ¹¹ Peala na binnu gimi mattu - mattu nama pahalela ati, nama pakiddinya na ati pamalangu lahi Allah witima nyiama. ¹² Kadang a pahalakunya na panamungu a waingu ihina napa pagata waingu ya da tiddi jiapaya a parekkanya na pawukku da da tou napalanga papahigilungu, tou jellana a pamalangu pareihinya hi Allah. ¹³ Lappaka witimi tarrunguka ta ma pakamangu tadalu ami pahalakunya na deitu-tiddungumi, da wuatu hailanya hi Allah witi na nama nudu mi ami aku ya na Injil Kristus lappaka witi einya na halela atimi tadalu ami barinya aga gannananya tou na lahi duda. Lappaka ta madangu. ¹⁴ Jiadinguka tadalu habayangu da tou jellakana dudda ada kalaura gimi witi pa ayi - panamunguna hi Allah dama keri ukku ya lahi dimmi ¹⁵ Pamalangu ya hi Allah witi kadinaka na pa ayi - panamunguna dama keri ukku ya.!