¹ Ya padillu wuddanguka aku toma gimi. " Waingu patikki da a tou ma dua annang a tou ma tillu ha hina maddung hina maddung a ganna nanya napa patiddi da." ² Lahi dudda nama wolu ya nama doku - nama jalla ta rahi malanga loppah tou jella na tutu dukkana nama dangu habaddi wiggu memma gimi ya hillu paduang a wiggu gimi ya atouna tadalu aku marou gimi hamera na rahi aku paregga denga mi yanna ga na papaduang waina, daku hillu buhha a mangu ha a hilu ammi kagaka. ³ Kadang na pakabu ati mi kama itta mataya na hada tou na hi Kristus ana panewi ana pali ledigadana loja mangu ta hagami. Jiadinguka na patekkanya na biha na ta padua mi. ⁴ Kadang langka a terunya ta pinni ai harikka witi loja jiading na morrik waingu biha na hi Allah. Tou jellama ma loja ta lihi na, jiadinguka ma morrik ama kahangi denganya tora mi dimmi witi biha na hi Allah. ⁵ Mi pareha wikkimi penya mi maddukadingu tadalu manningmi. Pareha wikkimi. Penya na maddung kadingu na ati waimi a einya hi Kristus Yesus ana kahangi dengagimi? Kadang a da tou nou kanguka dami tarru anangu ami li kayaka na pakamangu. ⁶ Jiadinguka napa mannigugimi ami penya da nyiama mangu nama dama tarrung ta ma pakamang. ⁷ Ma habayang lahi Allah ka abi mi wolu ya nama doku - jala. Da lara petekkangmanya na tarrunguma tama pakamang. Da wimma mangu jiadinguka kami piaku wolu ya nama kallung, langka mi itta ma maga da tarru mangu ama haganya na pakamang. ⁸ A dama piak kakinguka ama ge'anya nama padeneng, nama toma pawoluma jia tutu na nama padeneng. ⁹ Kadang na egi na atima ama loja kaka nyiama ami kullih dimmi. Lappaka jia na pahabayang dengama jia kami binnu tabola mata ta de'a. ¹⁰ Jiakadiyaka nama hawiting hiku tulih giminya tadalu aku marou mi, kadang pela a eikagaka ta padua mi daku ruhu mangu aku wolu ya agannanya napa wolugu aku wainya na kullih napa wo naga hi Moiri aku pakiddi ya da panyoggar mangu, ¹¹ Nou atouna aku oli buhha gimi, kana egi na atimi mi pamaddunya na pangaddangumi kami binnu, gennak, mi kaya na lipanunga - lipapekangugu! Kahanginya na atimi, na pangaddangumi, kami morrik wainya na maga loli - hara dona hi Allah pingi pa ayi - pingi panamung jiaka pingi maga loli - hara dona na kodu iddimi na dutu dakkimi. ¹² Kami pa ohha nama walingu ta dukkana na tou napalanga papahigilungu lahi dimmi. ¹³ Ngala dukana na tou nama wainya jaka nama keriya hi Yesus Kristus. ¹⁴ Jaka na kanyuru kanaga nama waling lahi Moiri Yesus Kristus, napa awi panamu na hi Allah, jaka ana kahangi denga nya na hangahu harri kana pakabuagimi nyimi ngala dukami.