¹ Ya atouna ngala oali bei, ku peakagunya o'uwu na wini kallungu Injil napa patomagu gu, napa langa peami,enga noumi ami maddungu. ² Ya jiaya na wini kallungu jimihimi manumara, kami hamannu pajukangu ta winina napa langa patomagu gimi, helinya amu wainya adana patua. ³ Nyouwa ku patomanyaka lahi ou pareihi - reihing nama patu'a hingung, napa kolligu ya jiaya hi Kristus hina mati tutu doku jalada toungu napa tulihu ta Hurat Bakul ⁴ Jiaya napa tanung, jiaya nama kiddi bali ta laddu ka tillu toungu napa tulih ta Hurat Bakul. ⁵ Manga na mengaka ana patekang wikina lahi Kefas, lappaku daama toma habulu dubbada. ⁶ Manga nou, jiaya napa patekkang wikina walingu dama reihi ta limma ngahu damma pa oali beingu ngala dukana. Ngala dama toma pirraha da morrikuha toma ladu hina, jidika dama toma pirraha da matika. ⁷ Manga, napa tekkang wikina lahi Yakobus, walinouna ngala ta Rasul. ⁸ Nama muri, toungu na lakeada nama jaji ada di toma ya na rahi jajina, manga napa tekkang wikina jellana lahi nyouwa. ⁹ Kadang nyouwa jiawaka nama reihi doku ta joanga Rasul - Rasul jaka dana mangarang Rasul awi'daga kadang nyouwa nama tauha aku hamatika na huhu anana hi Allah. ¹⁰ Jidinguka, napa awi panamu na hi Allah, nyouwa jiaya hi eiga toma yayi. Jaka napa awi pa namuna lahi nyouwa dana buni mangu. Na kerrangu gu tajukuya waling lahi duda ngala dukada, jidinguka da nyouwa, mang jiaya napa awi panamuna hi Allah nama hadidi karahawa. ¹¹ Witinanya, toungu nyouwa anang duda, toukina nyiama ama peakaja manga toungu dimmi himi wainya. na kiddi bali waling ta mati. ¹² Jia hi Kristus aranguya ana kiddi bali waling ana mati, gawali waling lahi jimi nama toma pirrami dana kiddi bali mang waling ta matina? ¹³ Adana kiddi bali kaka waling ana mati, hi Kristus jella da eimanya ana kiddi bali. ¹⁴ Jaka, jiaya hi Kristus adana kiddi bali kaka, da eimang gauna napa tikkima jiama jaka da eimang gauna na manningumu. ¹⁵ Pareihing - reihing, jiama walluk manya ana keriya hi Allah kadang ana panewi ya hi Allah napa kiddiya hi Kristus, dapa pakiddi memmana, ana patu'a kaka da tou mati adapa kiddi baliha. ¹⁶ Kadang, jaka da tou mati adada kiddi bali kaka, hi Kristus dapa kiddi bali jellamaya. ¹⁷ Jaka, hi Kristus adapa kiddi bali kayaka, da eimang gauna na manningumu, jaka jimi engami ha ta doku-jalami. ¹⁸ Tou jellangu, duda dama langa mati lahi Kristus da duka jellaka. ¹⁹ Jaka napa mannida lahi Kristus jiapaya tutu taguna ata morrik laddu yayi, jiadaka tou nama li'i hinguya na li'i hollu waling ngala dukana na tou rara. ²⁰ Nou atounaka, hi Kristus apa kiddi baliya ka waling ta joanga tou mati, jiaya napa wolu wua kawunga walingu ngala na tou nama keriya nama langa mati. ²¹ Kadang, toungu na mati na jaji ana liya hatou, na li hatou jella ya na kiddi bali waling ta joanga tou mati nama jaji. ²² Kadang lahi Adam li bolluya na mati, tou jellangu lahi Kristus ngala dukami pakkidi balimi. ²³ Jidika, ngala yimi hatou - hatou keriya nadutukuna hi Kristus jiaya nama kawunga, manga nou duda dapa langa pata pedina hi Kristus, peala a ammi balinya, ²⁴ Peala atomanya na hupu dukana, einya peala ana woaya na li pareaha lahi Allah Ama, einya ana pamohu bolluya nama papareaha, ngala na loadana, jaka na kullihuna. ²⁵ Kadang, enga taguna ana papareaha hodu atoamaya hi Allah ana tauha da geana ta balla wihina. ²⁶ Na gea nama muri napa pahigil jiaya na mati. ²⁷ Kadang, hi Allah na tauha ngala dukana ta balla wihina. Jidinguka, a eikanyaka ngala dukana nama jaji ana tauya ta balla wihina, ta peanyaka da meahamana hi Allah, nama tauya ngala dukana nama jaji ta wawa na hi Kristus. ²⁸ Einya ngala dukana a tauya ta wawa lahi Kristus, manga na ana taguna napa akang wikina lahi dunna, nama pa'aka bollunya, ngala dukana ta wawana hi Kristus nou jiaya hi Allah hina jaji ngala dukana tadalu tanga bolluna. ²⁹ Ada tounou kanaka, ganna kanya napa woluda duda dama langa ihu tutu tagu tou mati? Jaka na tou mati adapa kiddi bali kaka, mang gawali ngala na tou hina ihu ha duda? ³⁰ Jaka, ga jiama hi eigama ta mawilla padutu baddang? ³¹ Ngala pa oali beigu, tiap laddu nyouwa ku arunya napa mati dengang, toungu aku bakkul ati dengagimi jimi, nama kolligu lahi Yesus Kristus, na Moirida. ³² Ta pangadang tou rara da, gannanya napa utugu apa tau denganya ngala dama daga tama bali ta Efesus? Jaka da tou mati adapa kiddi bali kaka, " Mai yaya ka angu jaka ka inung kadang baru wehang jiata mati ya." ³³ Abimu kerikaya ana wallukuwu: "Napa buhang wiki dama kallung jaka hi einya naka ihak nama paheawanya nama kallung". ³⁴ Kamu pangada baling waingu kallung jaka abi wolukaya nama jala. Kadang, einya dama tama pirraha da denganya ada penya hi Allah. Hi wigugu yayi kamu maki'i. morrik balinanya na ihi amu wainya ³⁵ Jidinguka, enga eingu hatou nama patutur, "Giki nou kana na tou mati apa kiddi baliya? gapa ihiwaikana a'omi balinya?" ³⁶ Hei tou dama peangu! agannanya napa ho'arumu dana tubu dana morrik, enga ana mati moulu. ³⁷ Jaka, agannanya napa ho'arrumu da jiamaya na ihi pingi ainama tubu, jidinguka watu nanya dama eingu kalituna toungu watu pari anang watu - watu hawanguk. ³⁸ Jidika, hi Allah nama woaja ihi toungu pakabuna jaka ngala da watu natauja ihida hangi - hangi. ³⁹ Da jiamaya ngala na ihi jiaya na ihida nama hameara, jidika hangi panna ihi tou rara, jaka ha hawanguk ihi madaga - madagaha, jaka hawanguk ihi mawurung - mawurung, jaka hawanguk kali ihi kaboku. ⁴⁰ Ei jellang ihi surgawi jaka ihi pinnutana, jidika na padou na awang reihi jaga ya jaka bara wawa ya na padou na pinnu tana jiaya dana hameara mangu. ⁴¹ Na reihina na mata laddu na heaka, na reihina na kapea duda da heaka, jella kadang naka pea hangi na heaka taka pea hawanguk nou eingu reihida. ⁴² Tou jellang na kiddi bali tou mati. Na ho'arrunya tapa bura dengang, napa kiddi baliya ta pingi dapa bura dengang. ⁴³ Ho'arrudanya tama manyarik, pakiddi baliya tama reihi jaga ho'arrunya anouya ta loaja, pakiddi baliya anouya ta kullihu. ⁴⁴ Ho'arrudanya toungu ihi tou piaku, pakiddi baliya ta ihi hangahu morrik. Jaka a eikang ihi tou piakuna, ei jellang ihi hangahu morrik. ⁴⁵ Toungu napa tulih, "Na tou moulu hi Adam, na jaji hamangu nama morrik." Hi Adam nama muri najaji hangahu napa morrik dengang ⁴⁶ Nou atouna, na morrik nama kallung da jiamaya nama moulu. Jiaya na morrik dadi ma kallung, manga nou jiaya hi kollinya nama kallung. ⁴⁷ Na tou moulu walina ta pinnu tana, nou walina ta kubur tana. Na tou kadubba walina ta awang. ⁴⁸ Naka meara nama waling ta kubur tana, tou jellanga duda dama waling ta kubur tana. Jaka daha meara na surgawi, tou jellangu dama surgawi. ⁴⁹ Toungu ana pajajida ta hada tou rara walida ta kubur tana iata ta keriya na hada tou surgawi. ⁵⁰ Nyouwa ku tikki giminya yayi, lahi nyimi ngala apa oali beingu atouna na ihi jaka na ra dana kollimanya na Kerajaan Allah tou jellang nama dukang, dana kollimanya dama dukang. ⁵¹ Ranguwa! Nyouwa ku tikki giminya a einya dapa peami, jiata da eimanya ata mati bollu, jidika iata ngala dukana paheapa dada, ⁵² Data pea wainya, ai piddak wida, ana poini muri, ana poini kaka, jaka na tou mati apa kiddi bolluya dana duka bollu mangu, jaka iata paheapa dadaka. ⁵³ Kadang, nama helling na kaya dama helling. jaka, nama matina kaya dama mati. ⁵⁴ Tadalu ya nama helling ana kaya dama helling jaka nama mati na kaya dama mati, jiaya hina patu'a na wini napa langa tulih: "Napa mati dengang na mengayaka tapa talu dengang." ⁵⁵ "Ou pamati dengang, bayanyaka napa talu dengamu? Ou harowu, bayanyaka napa mange'at dagu?" ⁵⁶ Napa mange'atung jiaya na jala, jaka nawiti jala jiaya na Huku Taurat. ⁵⁷ Jidika, waiwu kawida lahi Allah nama woada mannangu yana Moirida, hi Yesus Kristus. ⁵⁸ Jiaya, aku oali beigimi ta manninguda napa awi namugu, kami maddungu abi bebat, kami binnu bongu ami pahalakuya napa kerrami lahi Moiri. Kadang, mi penyaka na joili habonnangumu dana maroba mangu lahi Moiri.