¹ Ya atouna witi pakeaha dengang riti tutu taguna na tou napa langa pahigil, kami pahalakuya kami waingu li'i pareaha napa langa peakaguja da tou dapa langa papahigilugu ta Galatia. ² Ta laddu kawunga ta hangi miggu, nyimi hatou - hatou ka eingu pabijal heakami agannanya napa bijallumi keriya a pirra na napa kollimi tennang abi jiaya a' ammiga manga himmi kehaha. ³ A ammikagaka, nyouwa ku paleawakaha, ageara hinguya napa pedimi waingu hurat kami idi waija dapa idimi ta Yerusalem. ⁴ Jaka, nyouwa aku halaku jellaka, duda daha laku maraiga. ⁵ Jidinguka, nyouwa ammi kaga lahi ou aku kolling patoma ta Makedonia. ⁶ Jaka, noukaka jaka aku enga dengagu anang kana duka waingu na rahi maringu tennang kamu oali maraiga nutu tapingi pa halakugu, aba yayi kaga aku halaku. ⁷ Kadang nyowa daku buha mang pa'ittawu ajiapaya amu nonik. Nyouwa ku mannigu aku enga dengan lettagu, ya hi Moiri ana wo'a digaha kaloaga. ⁸ Jidinguka, nyouwa enga lettagu ta Efesus hodu atomaya na laddu Pentakosta, ⁹ kadang na dangu naka loagagu aku kerraja dapa kerragu dama reihi patu'a penting ku itta yaka langka na dangu nama geaga. ¹⁰ Ya atouna, a ammi kanya hi Timotius, mimarou matuya abi namange'at ana oaligimi kadang pahalaku nanya napa kerrana Moiri, tou jellang nyouwa. ¹¹ Jidika, abi eikang nama ohal wainya! Kami gatanya ta larangi ana halaku abi eingu gikina tennang kana duki bali lahi nyouwa. Nyouwa ya nadigunya ana bali mareija ngala da oali beina nattu. ¹² Ya atouna, witi na oali beida hi Apolos, nyouwa ku panamunya aku paleawaya kana lipa toma gimi nyimi kana maraija ngala oali beina hawanguk, jidika dana weaku mang ha mai memma. Nimmi peala ammi kanya ana kaloaga. ¹³ Magang wikina, kamu kulli amu wainya na manningu mu. Kamu penya napa tagu moanimu jaka kamu kullih. ¹⁴ Tennang ngala napa kerramu, kamu pahalakuya waingu maloayang. ¹⁵ Ku kareimi ngala oali beigu, mi penya ngala nama eingu ta ummana hi Stepanus jiaha da ana kawunga ta Akhaya, manga duda daha rainya na morikuda ada pahalakuya tou palanga papahigil ¹⁶ Kami pa'akanya da tou matoungu jaka ngala dukana na tou nama oali kerranya dapa daka joili. ¹⁷ Nyouwa na egi na atigu a amminya hi Stepanus, Fornatus, jaka hi Akhaikus jiaha nama panamu gunya agannanya napa dengamu ¹⁸ Kadang, duda dama pawahanya napa ngadangu gu jaka napa ngadagu mu ya jiaya kami taukija hina da tou matoungu. ¹⁹ Tomanya napa namuda lahi Moiri nama arung lahi jimi, na oalija da tou palanga pedina dama eingu ta ummana. ²⁰ Ngala dukada da oali beimu dama eingu ya dapa ngidimu li'i panamu lahi ou. Patomaja li'i panamu hatou - hatou waingu pangidihu. ²¹ Nyouwa, hi Paulus nama tulihuya na li'i panamu yayi waingu limma tagugu. ²² Ya a eikang tou dama millanya ati hi Moiri, dana marimangu duna. Oh Moiri, ammiguya! ²³ Napa awi panamuna hi Moiri Yesus kana hadidi karahami jimi. ²⁴ Na milla atigu na oali maraigimi jimi ngala dukami lahi Yesus Kristus. Amin.