¹ Namatuya napanamu wiki jaka kabu atinya waingu kala ki atimu jaka na kanyuru dangu nama wali dehang, pareihi - reihing kamu peanya agananya nama jaji. ² Kadang, a gearaya nama panewi, da jiamangu oali tou rara na papanewi dengana, jidika lahi Allah, kadang da eimang tou nama peanya jiaya napa tikkina dapa peada agananya winna. ³ Jidika, na tou nama langa itaya agananya nama jaji na tikkiya ta oali touna kana rahhikungu, na peakanya, jaka napa yaga nounya. ⁴ Ngala na tou nama panewi ta hilu napa tikkina napa maddu wikinya na ihina, jidinguka na tou nama langa peanya nama jaji napa maddunya na huhu anana hi Allah. ⁵ Nyouwa ku manni bollugimi kami panewi ta hilu dapa peami, tennang pereihi - reihing kami peanya agananya nama jaji anang nama amming. Natou nama manyura reihi bakulluya waling yana tou nama panewi ta hilu dapa peangu, helinya a duna jella nama pagapi tagunya napa tikkina jiayaha tou nama keriya hida o'anya ⁶ Aku oali beigimi, ammi kagaka lahi nyimi manga hiku waingu panewi dapa peangu, gannanya napa uttu waimunya, penya nam nyouwa ku panewi denga gu waingu agannanya nama jaji, napa langa peada, napa parahing, anag na li'i hapeakang? ⁷ Toukana, ngala dama eingu hangahina, toungu suling anang kecapi nama eingu li'ina, a dada heaka kaka da poini da, giki nouna ana peanya tou agannanya nama poini, suling anang kecapi? ⁸ Anang, a jiaya na trompet nama poini dama jinyak, geara kaka nama weaku papatau? ⁹ Tou jellana jimi, toungu ammi waingu lamma mi ammi tikkiya na hilu dapa peangu, giki nouna ana peagiminya oalimi agannanya napa tikkimu? Magga mearana ammu panewi dengang ngillu. ¹⁰ Ngala ana dangu na hilu tapinu tana jaka da malli eimang hangina dapa waingu. ¹¹ Jidinguka touna nyouwa ada ku peakanyaka na hilu nou, nyouwa mearana tou jallur atouna duna nama panewi denga ga, jaka na tou nama panewi mearana tou jallur wiggunya. ¹² Tou jellang jimi, kadang jimi wali ati tekkami ami manyeranya himi kollinya na kanyuruka naga nama wali dehang hodu kollinya nama jibbu jabu binnu bongu tutu taguna ami hamaddunya na huhu anana. ¹³ Ya atouna, nama panewi waingu hilu dapa pea bollung kana habayang kana piku penya papangada tagunya ¹⁴ Kadang, anang aku habayang waingu panewi lammagu, naha mangu gu nahabayang, jidika napangadangu gu dana maddu mangu. ¹⁵ yayi, ganna ikanya napa wolugu? Ku habaya waingu hamangu gu jaka habaya waingu pangadangu gu ku manyanyi waingu hamangu gu jaka ku manyanyi wai jellang pangadangu gu. ¹⁶ Atouna ajikiya amu pamalangu wanya hamangumu, gikiyaka naka ya na tou, nama eingu tadalu dama kolling kanyuru na, ana tikki, "Amin," toungu amu tikkiya na kanyurumu kadang dana peamanya agannanya napa tikkimu? ¹⁷ Langka jia jellaya amu pamalangu pakallunya, jidika na tou heaka dana mannimanya. ¹⁸ Nyouwa waiwu wigunya hi Allah kadang nyouwa aku panewi ta hilu lamma dapa peangu ku reihi mi nyimi ngala dukami. ¹⁹ Jidinguka, ta huhu anana nyouwa reihi kallunguya aku panewi lima kawodu waingu pangadang lappaku ka ku patoma jellanya ta tou hawanguk, habulu kawodu patikki ta hilu lamma dapa peangu. ²⁰ Ngala apa oali beingu, abi jajika lakeada tadalu pangadangumu. Kamu jaji ana rara ammu jurrak, jidika tadalu pangadangumu kamu pa ati! ²¹ Toungu napa tulih ta Hurat Taurat, " Ya ngala na tou nama waingu panewi dapa pa peangu jaka na rowida ngala da tou dapa peangu, nyouwa kutikki danya na tana yayi, jidinguka dada rang ngu mawa, winni nanya hi Moiri." ²² Yayi, da hilu lamma dapa peangu jiaya na tada, da jiamaya na tutu taguna na tou nama langa keriya, jidinguka tutu tagudanya da tou dadi ma keriya, jaka hayi nama penya nama jaji jiaya na tada, da tutu tagumadanya da tou dadi mawainya, jidinguka tutu tagunanya na tou nama langa wainya anang nama keriya. ²³ Jaka, ngala da huhu anana ada makeha kaka hangi padoungu, jaka ngala dukada da panewi waingu hilu lamma dapa peangu, manga eingu tou dama penya anang na tou dama wainya ana tama kaka, enga widda gimi ada panewi jimi makatoa mi anang kalanguminya? ²⁴ Jidika, ngala dukami ami pea bollukanya nama jaji, manga aming tou dama keriya anang tou dama pea wainya ana tama, jiaya hina namu ya ngala nama jaji jaka hina pangada wainya. ²⁵ Dapapa louhuna ta atina jiaya hina ittaya, jiaya hina boppa ana karadanya hi Allah, hina wainya a ei tekkanya hi Allah tapa duamijiami anang ta joangami. Ngala naka buangu napa langa hamaddung. ²⁶ Jayi, na tu'u pangalana gikinouna, ngala pa oali beingu a eikanya ami makeha, hatou - hatou ka eingu hurat manyanyi, nama paeakang, patikki, panewi hilu dapa peangu, anang tada paka tutu waingu. Wai bolluja kana haddul waingu. ²⁷ A eikang nama waingu panewi dapa peangu, matta kaja toma dua anang toma tillu kada waingu papa heapang, manga ka eingu tou hawanguk nama peanya napa tikkida ²⁸ Jidinguka jaka ada eikang tou nama peanya duna kana kawannar jaka na tou nama eingu jaka matta kanya kana panewi meaha jaka lahi Allah. ²⁹ Mattakanya dama toma dua anang toma tillu da Nabi dama panewi jaka hawanguk kada tibakaya ada pangadanya. ³⁰ Jidika, ya napa tikki tutu tagunanya na tou heaka nama ngodu tapa doungu nou, na tou nama moulukana kawannar. ³¹ Kadang, jimi ngala dukami mi peanya agannanya nama jaji hatou - hatou, toma ngala dukami kami pakeri jaka ngala dukami kami kullihu waingu. ³² Ngala na hamanguda da Nabi naka raddanya duda da Nabi. ³³ Kadang, hi Allah da jiamamaya hi Allah nama manyoggar, anga jiaya napa namu wikki toungu nama jaji ta joanga huhu anana ngala na tou napa langa pahigil. ³⁴ Na mawinni kana madaku tapa dou pingi paka buangu kadang duda dapa hellamaha ada panewi, jidinguka dapa akanyaha na nuku Hara Taurat napa toma jellanyaka. ³⁵ Jidinguka, a eikang tapa ngadanguna dapa peada jaka napa tuturuda, reihi kalunguya ada patuturu ta la' da ta umma kadang pama ki'i dengangnguya duda mawinni ada panewi ta aru tou nama paka buangu. ³⁶ Penya namu na winina hi Allah walina lahi jimi? Anang, penya namu lahi jimi paya na winina ana patomanya? ³⁷ A eikang nama pangadang ya jiawaha hatou Nabi anang tou nama murrah, mattakanya kana penya ngala dukana dapa tulihugu tutumi jimi ya jiata na li'i pareahana hi Moiri. ³⁸ A eikang tou dama penya yayi duna da pea jellamanya. ³⁹ Ya jiaya aku oali beigimi, kami manyera tekkanya waingu kullihumi na tutu ka buangumi, jaka abi heirumanya na tou ana panewi waingu hilu lamma dapa peangu. ⁴⁰ Jidika, ngala dukana kami pahalakuya waingu tutu - tiddi.