¹ Jaka aku kolling panewika ka waingu hilu tou rara jaka hilu malaikat, jidinguka da eimang panamungu gu, nyouwa mearana na katala nama poini jaka lagoru makaringuk. ² Jaka nyouwa a eikang napa peagu agananya napa wolugu aku peanya agananya napa kabuning, jaka na dangu napa peagu jaka aku kolli bollunya aku maning kaku pagelirunya ngala na letina, jidinguka da eimang panamungu gu, nyouwa da eimang gau gu. ³ Jaka aku bari kaha daha poatigu manga kaku pa'anya na tou, milla jaka ku pahellanya na ihigu atunuya, jidinguka da eimang ati panamungu gu , kudduk tekka da eimang ganna tutu tagugu. ⁴ Napa namungu jiaya hita najjarungu wikida, jaka nama loajang atida, napa namung dana ma'u mang, dana dedikung wikimana, jaka dana pareihi wikima na. ⁵ Dana woluma ya nama manyarik, dana manyeramanya anang dana woluma ya napa kabu ati taguna, dana geaha bani mangu, dana badda yapuma ya deingu jalana na tou hawanguk ⁶ Dana manna dengamanya a eingu dama patu'a, jidinguka na egi ati denganya ana woluya nama patu'a. ⁷ Napa namungu na deitu ya ngala dukana nama jaji, nawainya ngala nama jaji, na manninya ngala nama jaji jaka na maddung ana haganya ngala dukana nama jaji. ⁸ Na panamu da eimang dukana. Jidika a eikang ma jaji dapa pali waingu, pahigiluya, a eipang li'i panewi pa kawanaruya, a eikang ha peangu nama jaji pahigiluya. ⁹ Kadang napa peada dana damang jaka napa pangada da dana damang ¹⁰ Jiaya, nama padeneng wainya, dama eingu gauna mattanya. ¹¹ Nutu a lakeada waha, aku panewi ku panewi toungu lakeadawa, aku pangadang toungu pangadang lakeada, koling pamatuaka, matta gunyaka na pata lakeada gu. ¹² Kadang ya atouna ta itta wikida taka hainu namawuda, mangaka tapa itta ngoara wikida. Ya atounaka, nyouwa daku badda pea bollumanya, jidinguka peala nyouwa einya aku pea bollunya toungu nyouwa a peaga. ¹³ Ya jiaya ha, dama tillu ngarada nama enga pangalang, napa naddida, jaka napa namu, jidika einya nama reihi bakkul waling dama tillu ngarada, ya jiaya napanamu.