¹ Ya atouna, tutuna na kanyuru wali dehang, ngala maipa oali jajing, daku buha manya ada eingu hapeami. ² anga minamu ya ha, ya naga adadi mi peanya nama rabba Allah, napa jirrimi marapu dama panewi toungu ana hamadimi. ³ Ya atouna ku peakagimi yaya da ei awa mangu nama tikki waingu hangahu harina hi Allah, nama winna, " Hi Yesus kuparunya," manga da eimang hatou tekka nama winna " hi Yesus jiaya hi Moiri," helinya waingu hangahu harrina. ⁴ Dangu kanyuru nama waling dehang, jidinguka na hangahu mearana. ⁵ Jaka, ngala danguna na kabuangu, jidika na Moiri da naha meara. ⁶ Da dangu dapa kerangu, jidika hi Allah nama hameara jiaya nama woluya ngala dukana lahi jiata hatou - hatou. ⁷ Ngala iata hatou - hatou na woada pangadang nama murrah ata woluya ta oalida hina meara kalung. ⁸ Iata hatou - hatou, einya napa woangu peangu waingu hangahu harrina ana tikkiya nama padeneng jaka hawanguk nama hameara jella ana woanya peangu ana tikki ya wainya na peanguna. ⁹ Duda hawanguk na woaja wini manning waingu hangaha harri nama hameara, hawanguk woaja kanyuru peangu pategah tou ma kadaukku waingu na hangahu nou. ¹⁰ Manga hawanguk na woaja ngala pakerada einya na kanyuru dapa pali waida, hawanguk na peangu ana manyura, nama pea moulunya agananya nama jaji, mangu hawanguk na woaja ana peanya nama waling tangilu da kalung, hawanguk da peanya na hilu pada kalungu jaka na peangu ana hamadiya ¹¹ Ngala dukana na hangahu harri jiaya nama pahalakuya hangina pingi hawalina, naha barinya ngala dukana na tou dangu, toungu pakabu atina. Ngala na tou nama keriya anang nama wainya jiaya nama waling ta ihi wikina hi Kristus. ¹² Toungu na ihida a hangina jidika na dangu ngarana ngala ana ka hanging, jidika laka ana dadingu ngarana anga jiaya a hangi ihina tou jellana hi Kristus. ¹³ Kadang, hangi hangahu da jiata ihudaka ta hangi ngara anang hangi ihi, toungu na tou Yahudi tou jellangu na tou Yunani, toungu ata tou jellana na ma rabba. Manga ngala dukada na woada pa inung nama waling tahangi hangahu. ¹⁴ Kadang na ihida da jiama hangi ngara na, jidinguka dangu ngarana. ¹⁵ A winna kaka na wihi, " Ya nyouwa ada limmawa, da nou wawa ta ihina," da winna nou mang nyouwa dama eingu wawa ta ihina. ¹⁶ Jaka, na ka hilu awinna kaka, " Ya nyouwa ada mata wa nyouwa dama eingumawa ta ihida," dana ngarangu ada nouya ta hangi ihi. ¹⁷ Jaka ngala dukana na ihida a mata kayaka, bayaka nyaka na ka hilu napa rangu waingu? Jaka ngala dukana aka hilu kayaka, bayakanyaka na iru napa ngidihu waingu ? ¹⁸ Jidinguka, ya namu hi Allah na wolunya ngarana ngala nama eingu ta ihida, toungu napa kabu atina ¹⁹ Ya ngala dukana a hangi ngara ka naka bayakanya na ihi da? ²⁰ Ya jiaya lakka ana dangu ngara na, jaka jiapaya a hangi ihina. ²¹ Ya jiayaka, yana mata da da winna manya na limma, " Ou daku oali magu!' Anang na katiku ta wihi, " Ou daku oali magu!" ²² A hilu patetinya, ngala napa taguna nama eingu ta ihida nama loaja jiaya napa reihi waida. ²³ Jaka, ngala dukana nama eingu ta ihida einya dapa bada pa'akada jianouyaha napa reihi pa akangu. Jaka, ngala nama eingu ta ihida dapa itta tekka jiayaha napa reihi patekada ²⁴ Kadang ngala napa taguna nama patua dapa hilu waingu maha. Jidinguka, hi Allah nama patidinya na ihi da einya napa reihi pa angu ngala nama eingu ta ihi da, ²⁵ Abi eingu maka ihak ihida, jidinguka kana pa kahanging ana patungu ngala dukana. ²⁶ A eikanguka tutu hangi ngara nama hiddu, ngala dukana nama eingu ta ihida na hiddu bollu. A eikang tutu hangi ngara napa pa akangu, anga jiaya ngala dukana. ²⁷ ya atouna jimi jiami ihina hi Kristus jaka jimi ngala ma eingu jimika ngala huhu anana. ²⁸ Hi Allah napa higilu hakada huhu anana , nama kawunga jiaya na Rasul, naka dubana da Nabi, naka katilu na da Guru, nama kamuri na nakanyuru daha pali waingu, napeangu palala moru, napa namung, napa hamadi wiki, jaka ngala napa tikki. ²⁹ Jiaha ngala dukada Rasul? Jiaha ngala dukada Nabi? Jiaha ngala dukada Guru? Jiaha ngala dukada nama wolu tada kanyuru? ³⁰ Jiaha ngala dukada dama papategah ma kaddauku? Jiaha ngala dukada nama peanya ngala na hilu? Jiaha ngala dukada dama peanya na ihi patikki? ³¹ Jidinguka, pajukangu kamu kollinya na kanyuruka naga nama reihi bakkul. Jaka nyouwa jiawa nama patekkagunya na larangi'i nama reihi kallung.