¹ Kami pakerita tou nama keriya nakanogugu, toungu nyouwa lahi Kristus. Tada papareahana ² Nou atouna, kudekikagu kadang amu namunya ngala dukana napa wolugu, napata nama patomagugu. ³ Jidika napa kabu atigu kami penya nama pareahami jimi moani ya jiami Kristus, nama pareaha mawini jiaya na moani, jaka nama pareahaya hi Kristus jiaya hi Allah. ⁴ Agearaya na moani nama habayang anang a eingu hawoluna nama toani katikuna dana taumanya hina nakatikuna. ⁵ Jidika, a eikang mawini nama habayang anang a eingu hawoluna manga dana toajimi ya na katiku na, na jauna na katiku na , mearana ana gutinya na loagi ta katiku na. ⁶ Kadang, nama wini adana toanikaya na katiku na, matta kanya kana guti jellanya na loagi na. Jidika ana maki'i dengankanya ana gutinya na loagi na, reihi kallunguya ana toaniya na katiku na. ⁷ Na moani abi na toani mangu katiku na kadang jiaya na tada jaka nabiaha madina hi Allah. Jidika, nama winni jiaya natadana ana manadang ana ittaya moani ⁸ Na moani da walimana ta mawini, jidika na mawini walina ta moani. ⁹ Jaka na moani hi woluya da tutu tagu mawini maya, jidinguka na mawini tutu tagu moani ya. ¹⁰ Nou tounouna, na mawini hina wolu tadana napa heirungu ta katiku na keriha da malaikat. ¹¹ Jidika nama toungu, lahi Moiri, da eimang mawini dama buhang moani, anang moani dama buhang mawini. ¹² Kadang, na mawini walina ta moani, tou jellana na moani ana jaji walina ta mawini. Jaka, ngala dukana nama jaji walina la hi Allah. ¹³ Pangada tagunya, nama tutu kadingu na mawini ana habayang lahi Allah manga na katiku na adana toani ya? ¹⁴ Dami ita mangu pata pinu tana a eikang moani nama malai loagi na, nama toungu ana pamaki'i wikina? ¹⁵ Jidika touna nama wini ana malai kaka na loagi na, nama toungu jiaya nama pa manadanya : Kadang, na loagi na jiaya nama pa einany. ¹⁶ A eikang dama buhanya, dama pata manga, jiama tou jellangu nama wainya hi Tuhan. Napa wolu dama patua tadalu a pahalakuya na perjamuan kudus ¹⁷ Tadalu ami parangunya li'i pareaha yayi, daku waimagimi, kadang ami makeha da tutu ma kallungu maya, jidika woluminya dama kallungu. ¹⁸ Naka wungana, tadalu pakabuangumi ngala huhu anana kurangumi hi woluya napa ka ihak dengami. Jiaya hi ku wainya hawanguk. ¹⁹ Kadang, enga einguha maka ihaku waling lahi jimi jiaya hi peanya agearaya nama maddungu napa pangadami hatou - hatou. ²⁰ A eikanyaka ami makeha ta hangi padoungu, da jiamaya na tutu angumi ta perjamuan hi Moiri. ²¹ Kadang tangir angu, mi deki molluka pa angu tutu tagumu jiaya hi einya nama karobang jaka hawanguku hina mawuk. ²² Manga da eimang umma mu tutu taguna na angu jaka na inung? Anang , merana amu ngikiwainya na huhu ana na hi Allah jaka amupa maki'i ha duda dama einguna agagananya? Gana nanya napa hilu tikki gugu? Ku tau gu himu? Ya nama toungu daeimang limu. ²³ Kadang, ku kaya nama waling lahi Moiri agana jellanya napa woagu gu, mu penya ya hi Moiri Yesus, ya atomaya na ridungu ada li kadeanganya, nadeki kababa, ²⁴ Ana menga ana pamalangu ya, hina tippi - tippi kuya manga hi winna, " Ya jiaya na ihigu, tagumunya, mu namu kamu pahalakunya jiaya kamu namu waiga." ²⁵ Tou jellangu, na dekiya na ka'a mokku ana menga pa angu manga hi winna, " Na ka'a ya tada nanya namorik nama buangu nama walingu ta ra'a gu, mi wolluya ya, tadalu ami inunya kami namuwa." ²⁶ Kadang, waling ami anya na kababa yayi jaka ami inungu ta ka'a yayi, parangu minya na matina hi Moiri hodu a omi balinya. ²⁷ Ya jiaya, a gearaya nama angu kababa anang nama inung ta ka'a na hi Moiri nma waingu pata dama tutu tiddi, nahala tahaga ihina jaka na ra'a na hi Moiri. ²⁸ Na tou rara na peanya agananya napa woluna ta morrikuna, jiaya hina kawanguku ana angu kababa jaka inungu ka'a wei ra'a na. ²⁹ Kadang na tou nama angu jaka nama inung dama wainya na ihi taguna hi Moiri, mearana ana wunu taguya na ihi taguna. ³⁰ Jiaya nama hawiting, hina dangu waling lahi jimi nama loaja jaka nama kadaukku, lappaku danguka nama mati. ³¹ Jidinguka, ata ka tutu tagudiya na ihi wikida tadalu ata woluya nama kalung jiata dana horu mada hanakkuda. ³² Jidinguka, tadalu ana horuda hanakkuda, enga taguna ana peakada ana namuda hi Moiri. ³³ Yayi, ngala dukana aku oali bei gimi, a eikanyaka ami makeha himi einya napa a' dengang, mi panading kiki kimi. ³⁴ A eikanguka ma karobang, reihi kallunguya ka a' letangu ta uma na tenang ami makeha abi pangiki waingu wikimi. Jidiya, nama jaji hapeagunya a kollingu ha ammiga.