¹ Jaka,nyouwa daku weakumangu nyiami a dami peanya,aku anhgwuagimi,Dama weda da amapeanguda iata,ngaradukada nouhaka a eija ta wawa robang jaka ngaradukada ada lita tahik. ² Hammu ngaradukada ihuha ta ngarana hi Musa ta roungu robangngu jaka tahik. ³ Hamu ngaradukana dha angu peangu Rohani nama hameara ⁴ jaka ngaradukada ta inung nama waling ta watu Rohani nama maraija,jaka na watu nuttu Hi Moiriya. ⁵ Dikki dedi nouna , Hi Allah dahabuhana waling lahi hammu,nou mearanyiami ana hamatimi ta padua mareda. ⁶ Ya nou aganaja mearakana toungu iata abi na jai nama kabungu jahat hamu dapa kabu atida ⁷ Abi manuatudinya mera waling lahi hamu, meram nama matuling " Na nuha iata na ngodu angu jaka na mung, manga hina kiddi ana madotu". ⁸ abi iata nama palakuya na persinaan meram pahalaku ya waling lahi hamu toma 23 ribu na tou ana mati hangi ladu ⁹ Iata jella abi geadinya nama wolu tou, toungu dama touma piraha waling lahi duda dama kamanya jaka dapa hamatida ngala da maddu. ¹⁰ Abi mikangoruk dengakanya toungu duda ada kangoruku jaka hina paburaha na malaikat hamati dengang ¹¹ Toungu ya nama jaji lahi hamu mera nama tuling touma ana panamudanya tutu lata touma duka dedi na pinnu tana a ominya. ¹² Ya atouna, kana peanya na tou nama dedikung wikina kana peangu wikina tenangu abi nakana'u!. ¹³ Deimang nama kamada nama reihi helinya toungu nama kamanya iata tou rara. Jaka na maraba Allah jiaya mamanuduya, dana matamagimi ana kamagimi mareihi walingu tapa pangadamu. Jidinguka, toungu ana pakamangu, enga taguna ana woada likaloaga himu kulihu waingu. ¹⁴ Touna nou aku angawuagimi nama panamung, magang wiki tama nuating berhala. ¹⁵ Nyouwa aku panewi meram dina ta tou nama bijak, tibakinya gananya napa wiggu gu. ¹⁶ Da ka'a langu kadiya na kanyuru napa kabuadengada ta dalu wei rana hi Kristus? Jaka, na kababa napa bearada jiaya nakabuanguda ta dalu ihina hi Kristus? ¹⁷ Einya hangi na kababa, ya atouda ngala nama dangu hangi ihida, kadang jiata ngala dukada walida ta hangi kababa. ¹⁸ Hamataruja da tou Israel, da jiadiha duda dama aja da pamanutu waingu ada deki tagu ta altar? ¹⁹ Jiaya, gananya napa kabu atigu? agana kaja dapa angu dapa manuatu waingu tamarapujiaya natutu? Anang aganaya dapapa hadangu jiahaka tutu? ²⁰ Daha. Nyouwa wigu lahi ou ngala dukana naha woluda ngala da tou heaka ada manuatu waingu, duda pa'aru daja tutu taguda, da jiamaya na tutu taguna nama rabba Allah. Jaka, nyouwa daku weaku mangu ami kahoru karada nounya. ²¹ Jimi dami inu mangu ta ka'a na hi Moiri jaka ta ka'a da deawa nama jurrak. Jimi dami keri mangu tapa dou pa anguna hi Moiri jaka tapa dou pa anguna da deawa - deawa nama jurrak. ²² Kadang, jiata pakidi danya napa hamadi dengana hi Moiri? Jia kada jiata nama reihi kullihu waling lahi duna? Namorrik tutu nanya apana langu wainya nama Rabba Allah ²³ " Ngala dukana dana heiru mada, " jidika einya dama eingu ganna. " Ngala dukana dana heiru mangu," jidika einya napa waingu jaka dapa waingu. ²⁴ Abi eikang na tou aka nama woluya nama kalung tutu ihi taguna, jidinguka woluya nama kalungu tutu tou hawanguk. ²⁵ Akadija ngala dukana napa dagang ta pahar katirou abi patataruka, toungu napapangadamu ta atimu. ²⁶ Kadang, napinu tana jaka ngala dukana na ihina jiaya tutu tagu nanya hi Moiri. ²⁷ A eikang a gearaya dadi makeriya nama kaleihugu manga himu halakumu akadingu agananya napa atina tutu tagumu, abimu patutur manya, taukaya ta atimu. ²⁸ Jidinguka, a eikang tou nama panewi dengagu, ya napa angu pamanuatu wainguya ta deawa, " abimu akanya, tutu tagunanya na tou nama peakagu jaka nama eingu tapangadangumu. ²⁹ Hiwigugu, damu pangada tagu manya, jidika pangadangu tou hawanguk, gawali napapangadagu hina peaga nya tou heaka? ³⁰ Jidinguka aku dekikaya napatagugu malanguwu awigu, ga wali hipa halawa kadang napa angu aku anya waiwu awigunya? ³¹ Tenang, agananya napa aki anang napa inumi, anang aganna lingunya napa wolumi, pahalakuya tutu taguna ami pamalanguya nama rabba Allah. ³² Abi wolukaya na oalimi ana hawidang, waling tou Yahudi, tou Yunani tou jellangu huhu anana hi Allah, ³³ Toungu nyouwa, tadalu agananya aku buhanya ngala dukana na tou, daku manyeramangu pa utuwaingu tutu tagugu, jidika ku pautuya na tou dangu tutu taguda kada kollinya namorriku malodung.