¹ Weila detaWA MORI, kabuara-NA ngara-NA, tekki nawe ngara parawi-NA ne barada bangsa-bangsa! ² Dodomi bara-NA, bermazmurmi bara-NA, tekki nawe ngara parawi-NA a ajaib. ³ Deika nawe ngara-NA a mbiya, ngga'ige ateda ata a elleta MORI kaweila detana! ⁴ Elletawa MORI monno pawessi-NA, ellatana mata-NA patirri-tirri. ⁵ Lolowi keajaiban parawi-NA, mujizat-NA, monno ngara hukum wali ngada dana-NA. ⁶ Hai pawali wa'ina Abraham, ata-NA, hai ana YAkub, papede-NA. ⁷ NYA MORI, ALLAH da, hukum-NA ne ponnu tana. ⁸ NA lolowe aura-NA mori wali-mori wali, li'i papareta-NA barana ngau rei generasi, ⁹ pa kette-NA barana Abraham, aura-NA barana Ishak, ¹⁰ papateguh-NA barana Yakub baiya ketetapanwa, barana Israel ba iya aura a kekal, ¹¹ hinnage, "Baramu KU yawe tanah Kanaan, ku douge." ¹² Haida jumlana ata bayodi kundi , yodi takka kindi, ba ata ekawi, ¹³ na kako wali iya bangsa barana iya bangsa, wali iya kerajaan barada kabissu bangsa eka, ¹⁴ Danna ngga'i kindi iya ata a tindasai, NA kecamwi tokko orada, ¹⁵ "Du todo kanggadi paurapi-GU, du bokala dengngakagadi nabi-GU!" ¹⁶ NA yawe kareba ne ponnu negeri, monno napabata kuwawi pasokan panga'a, ¹⁷ NA pangindiwa iya ata bana ulludi, Yusuf, pa battada ka atadai ata. ¹⁸ A pamanu'anai wa'ina waina belenggu, bukkuna a patamanai netti rante tabaga dana, ¹⁹ dukki rapana nubuatan-NA , patekki-NA MORI a nungngawa. ²⁰ Tokko napatukana ata bapasilliwa, ngara penguasa kabissu a pasilliwa. ²¹ Mori ummawa ne ponnu ummana, monno napareta ne ponnu douna, ²² kakettedi ngara ata pareta ne barra pabei ateda, monno a ajarawe hikmat barada atana a kaweda. ²³ Bage, ammiwi Israel ne Mesir, engawi Yakub ba ata ekawa ne wanno Ham. ²⁴ NA rawidi ngara ata papanunga-NA baluwa-NA, monno napawessiwi ba lebbi wali nagar gobbada. ²⁵ NA pa ekada ateda kabuttu atedi haida ata papanunga-NA, ka curang bara ata-NA. ²⁶ NA pangindi-WA Musa, ata-NA, monno Harun, papaede-NA. ²⁷ A ta'ina tada ajaib barada, monno mujizat ne wanno Ham. ²⁸ NA pangindige kapotta nyakanna kapottage, da memberontakaki bara li'i-NA. ²⁹ Napa ekawe we'e ba ra'awe, monno napamatewi ikanda. ³⁰ Ne wannoda a kapongida pake, lakka nyako ne pandouda tokkoda. ³¹ Li'i-NA , nyaka ammiwi kalaluppa pikat, monno kaninnika ne ngara wannoda. ³² NA paburruwi urra es ka urrawa, monno wegara api ne wannoda. ³³ NA puddarai wasu anggur monno wasu ara da, monno na patawi wasu ne batasada. ³⁴ Li'i-NA, nyaka ammidi kabala, monno kabala taloka, dappa bisaki bakirawi. ³⁵ A ngga'a kuwa dadi ngara a timbu ne negerida, monno a ngga'adi ngara pakenida ne tanada. ³⁶ NA pamate kuwawi ana kabodi ne negerida, monno ngara uwa paka'a wali ngara pawessida. ³⁷ Bage, NA palouso waidi omma kaka monno omma rara, monno da'i pongnguki iya ata papanunga-NA a katundura. ³⁸ Mesir na weila deta orona bakako, orona mandauta a wenna bawi. ³⁹ MORI na wekkarawe kasoba batudungwe, monno api kapamangewalawe gedde. ⁴⁰ A madengngi, nyakanna pamaiwi keila puyuh, monno napabekutawi waina kababa wali langita deta. ⁴¹ NA wukkewe lete togo monno we'e na kokora netti maredda a marokota. ⁴² Orona, NA lolowe aura-NA a mbiya, barana Abraham, ata-NA. ⁴³ Na ngindiwi ata papanunga-NA wina weila deta, ata papede-NA waina kabuara. ⁴⁴ NA yawi wannoda bangsa barada, monno a warisiwe jerih payah kabissu bangsa, ⁴⁵ ngga'i kajagawe ketetapan-NA, monno ka taat barana hukm-hukum-NA. Deika-WA MORI!