¹ Barada a mareta dodo: Dodod. Mazmur. Weila deta barana ALLAH, ne yemmi ngara ponnu tana! ² Dodona welia deta kemuliaan ngara-NA, yana weila deta a mbiya bara-NA! ³ Lummuge barana ALLAH, "Na allu bana dahsyatwe ngara parawi-MU! Orona kaladage pawessi-MU nyaka ngara gobba-MU a meringkuk mandauta bara-MU. ⁴ Ngara ponnu tana a sujud bara-MU, monno ma dodoge weila deta ngara-MU." Sela ⁵ Maiya monno etawi ngara papawillina ALLAH, ngara parawi-NA barana ngara ana ata a mandauta. ⁶ Na paekawe ne bonnu ba tana marawe, a palawi loko waina kako tana. Nyaka, maiya kata weila deta. ⁷ Na mareta waina keperkasaan mori wali-mori wali, mata-NA na awasai ngara ana ata. Ngara pemberontaka da kedde bali bana kakeketa wekkina. Sela ⁸ Deikawa ALLAHma, o ngara kabissu ata, ngga'ige ne li'i weila detagu kanna rengngewe! ⁹ A ta'ige lolongau bara tolekagu, monno da ngga'i na wa'ima ba danna goddo kaki. ¹⁰ Orona, WO'U, o ALLAH, a ujiama, MU pamurniama hinna kaina omma kaka. ¹¹ MU ngindiama ne irra dana, MU ta'ima beban ne kombu detama. ¹² MU ngga'ima bama kelete katowama, ma lewata api monno we'e, takka MU kaima wali ngara kelimpahan. ¹³ Ku tama umma-MU waina kurban patunnu, ku bayarage ne nazargu bara-MU, ¹⁴ ne patekkina rowiwigu monno ngadagu ba ne'iga milla ate dana. ¹⁵ Ku kako baku yawe bara-MU kurban patunnu ranga a morru, waina mau kurban bebe mane, ku yawi kawanan lembu monno simbi mane. Sela ¹⁶ Maiya monno rengngewe, ngara kuwa yemmi a mandautawi ALLAH! Kaku tekki mingge appawi parawina bara dewagu. ¹⁷ Ku kadengawi waina ngadagu, weila detagu bara-NA ne'ige lomma detagu. ¹⁸ Baku etako bokala ate danagu, MORI danna rengnge kiyaga. ¹⁹ Tetakka, ALLAH na rengnge bawe, na etaga li'i tabayagu. ²⁰ Deikawa ALLAH, orona danna eru kinna wali tabayagu, atau ne kasih setia-NA baragu.