¹ Barada a pareta dodo: dekuge li'i " Du Pamatekawi." Miktam Daud. Hinna takka kado bu tekkiwe a tena, yemmi ngara ata a mangngu kuasana? Jujurabana Mi hakimiwi ngara ana ata? ² Indaki, ne ate danamu mi kabekko bana, limmamu na reke-reke kekejamana ne ponnu tana. ³ Ata fasik na terasing wali papati'ada, hidda a kawossoka a sesat ne ti'a dana. ⁴ Moro kindorada ekakowa bisa nippe, ekakowa kobra a katillu a todiwi katilluna, ⁵ nyaka kadanna rengngewe li'ida ngara tukang sihir, atau li'ida ngara ata a pande baca mantera. ⁶ O ALLAH, parokawi ngara ngundu a wa'ina ngada detada, patawi taring ngara singa a mbo'u, o MORI. ⁷ Ngga'i kundi kamuwana ekakowa we'e a kokora. Ngga'i kundi ka koudango ekakowa busur a pata. ⁸ Ngga'i kundi ka ekakowa marikki a kokora bana kako, hinna kaina lakawa rarra a tagibbila, da eta pongnguwa loddo. ⁹ Haida wirromu datoma bapoddage api patara, NA sapubawi, lakka nyaku a toleka ataupuna haida karrana. ¹⁰ Ata a tena na waina weila deta bana etawe ne patauda tanga, na pariowi wa'ina waina ra'ada ata fasik. ¹¹ Nyaka, na ata hinnage, "Ata a tena na uwa babara, nyabana ALLAH a hakimiwe ponnu tana!"