¹ Barana a paretawi dodo: Dodona Daud. A allu bapamaringiwi na ata a pande barana ata a milla, MORI napaselamatawa ne loddo susa. ² MORI na jaga monno napakitanawe tolekana, a kadengngawi a senango ne ponnu tana, du yakawa barada pabeida haida gobbana. ³ MORI na rombawa ba engana a beika ponnu padou beika wa'ina. Ne karoddukana MU paekanawe. ⁴ Lungguge, "MORI, manawaraga, paduwawaga ne karoddu kanggu, ku sala banna bara-MU." ⁵ Haida gobbagu a panewe bokala tubagu, "Pirra koge bana mate monno kanna muwa ge ngarana?" ⁶ Ne ba ammi bana etaga, na tekkiwe ne da tuba, ne atena napakuwage bokala, ne bana kako ngounga, na tekkiwe. ⁷ Ngara hidda a buttuga ate a palolo bakabuttika tubagu. A kambuge ne abokala baragu. ⁸ "Ne panewe awa a burrina barana, ne bana beika, danna kedde bana." ⁹ Lakka nyaku haida ole duwagu pamennegu, a nga'aga kababagu, a keketaba kanikki wa'ina ba gobbaga. ¹⁰ Takka WO'U, o MORI, manawaraga monno pakeddewaga, ngga'i kaku pande tauge tangana. ¹¹ Nyaka, ku pandegu WO'U MU beiga, orona haida gobbagu da keketa wekkikina baragu. ¹² MU rombawaga orona ne masalu ategu, MU ta'i wa'iga ne aro-MU mori wali-mori wali. ¹³ Deikawa MORI, ALLAH na Israel, mori wali-mori wali! Amin monno Amin!