Jilid Kaduada ¹ Barana a paretawi dodo: Iya dodo wali barana anana Korah. Patuddana rusa a beige we'e loko a kokora, hinna kaina dewagu bara-MU, o ALLAH. ² Dewagu na maro'u bara-MU ALLAH, barana ALLAH a toleka. Pirra koge ba ammiga monno ku oudagawa ne aro-NA ALLAH? ³ We'e matagu nya panga'agu loddo monno gedde, takka ne loddo mangeda-ngeda hiddage baragu, "Gewi ALLAHmu?" ⁴ Ku lolowe, batanga ku burri kuwage dewagu, ku kako barada ata a pakuwana, monno ngarre-ngarre pagagu ne umma-NA ALLAH, batanga ku wula wanguge monno ku weila deta, palolo dengadi ngara ata a pakuwana acara danana. ⁵ Appamo kurunuwa , he yemmi dewagu, monno mi kirru-kirru kabiayami wekki danagu? Mennewi ALLAH! Orona, ku weila deta dommo bana bara-NA orona selamatana ne aro-NA. ⁶ O ALLAHgu, dewagu na runu wekki danagu, nyabawe kaku lolo-WU, wali tana Yordan, Hermon, monno gunung Mizar. ⁷ Samudera na kadengngawi samudera waina li'i we'e kokora-MU, ngara kuwa gelora monno kanolaka-MU a dippawaga. ⁸ Ne bana loddoge, MORI na paretawe duwa ate-NA, monno gedde dodo-NA enga bana palolo dengaga, iya tabayya barana ALLAH tolekagu. ⁹ Lungguge bara ALLAH, togo letegu, "Kau bulla monda?" Appawe kaku ngi'o tekkiwe, orona penindasan gobbagu? ¹⁰ Ekakowa oro dakura ruwi danagu, gobbagu a celawaga, takka ne loddo mangeda-ngeda hiddage baragu, "Gewi ALLAHmu?" ¹¹ Appawe kurunuwa, o dewagu, ne kakirru-kirru kabiyawu? Remawi ALLAH! Orona, ku weila deta barana ALLAH oro selamata ne aro-NA