¹ Barada a pimpinge dodo: tubana Yedutun. Dodona Daud. Lungguge, "Ku jagawea ngara largu, ngga'i kadakku berdosa kana waina lommagu. Ku jagawe ngadagu waina kekang ba wa'idi ata fasik arogu." ² Ku kabongngaga monno ku kanawaga, ku pattu wekkina wali a duwa, monno ne millagu namatambawe. ³ Ategu na bangata wekki danagu, ba ne'iga tekki ate danagu, api nawegara, ku panewe waina lommagu. ⁴ "O MORI, tekki gawe pamate dengngagu, monno kadukkagu, ngga'i kaku pandege ne youwa baku fanaga. ⁵ Eta, WO'U a raigadi loddogu ba uwa limmaga, monno umurgu da'iki wellina aro-MU. Tetakka, ngara ata a dede iya lolo ngau kiddu. Sela" ⁶ Tetakka, ngara ata a kako nyakido touda. Tetakka, a bani ate danana damangngu larana, a bondalai douda monno da pande kingge garra a pakuwadi. ⁷ Monno hinna ne'e, o MORI, appawe panapagu? Ne papangeddagu ne'ige bara-MU. ⁸ Pasilli aga wali ngara salagu, du ngga'i kangga ba youwa pakanissikanna ata kabokko. ⁹ Ku kabongngawaga, dakku wukkeke ngadagu, orona parawi-MU. ¹⁰ Pamarroga wali tulah-MU, MU dekka wa'i bangga orona limma-MU a keddega. ¹¹ Nebu panungngawi iya ata bu hajara sala danana, MU dekka wa'i, hinna wa'ina ngengat, appawi a pawelli barana; tetakka, ngara ata a dede iya lolo ngau kiddoda. Sela ¹² Rengnge gawe tabayyagu, o MORI, monno yaga katillu barana ne ka aulagu. Du pakadanna wekkikana bara we'e matagu. Orona, youwa ata asing bara-MU, ata a mai, hinna kaina ina-ama kawedagu. ¹³ Pamarroga nepa eta-MU wali baragu, ngga'i kaku senangga ba dakku muwa ponna.