¹ Co... anagu terregadi patekkigu, monno mbondalawi ngara paretagu ate danamu. ² Terregadi paretagu, nyaka enga tolekamu, mbondalawi papanungagu pagaina yasa matamu. ³ Kettedi ngara kuada nee wolla limma detamu, monno tulisawi ate danamu. ⁴ Tekkinawe ne pande,'' Yo'u dona olle dadigu,'' monno ne papande denga ndu ndadigu, ⁵ Ga'i ka gollopawu wali barrada mawinne lawore, wali barrada mawinne padedemata, a'lattaka panewena. ⁶ Mbana dukkiwe iya pamia, mbaku patuu kona wali donga jendela ummagu, ⁷ Ku etawi wali ngara damangu pengalaman'na, kutabbokawa nee tillu donga'da ata mbo'u iya kabani damangu koba katowana, ⁸ Na pala mbali lara monno kana kako nee umma'na mawinne a'hinna wa'ina. ⁹ Neti mbana raimalege, ne gigirri, ne gedde kalada akapottana. ¹⁰ Nyaka ammiwi iya mawinne a' renggawa, natau kalembe hangu mawinne lawore'wa, a' laa atena. ¹¹ Nakalakkuka monno mattarawi na mawinne, dakanankiwi wa'ina nee umma, ¹² Mbacaki neiwi laradana, mba neiwi lapangan dana, barrana ngara simpang na pattuwi ata. ¹³ Mbaka na terrewi na kabani monno kana dekkiwa, lapata da'iki makke'na hinnage barrana, ¹⁴ Enga pamarakagu maraka, orona ne loddo kuponu bawe liigu. ¹⁵ Nyawe kaku louso mbaku renggawu, monno ku elle langutakkawu, nyaka kaku tabbokawu. ¹⁶ Ku wekkara bage teppe ponnu padou'gu, ku kappe waige ngara ingngi amanadana awali Mesira. ¹⁷ Nee ponnu padougu kutaubage mur, gaharu monno kaninggo. ¹⁸ Meiya, kata ndura dukkina koka, meiya kata pasenang wekkina ndukkina malarri. ¹⁹ Nda'iki la'igu umma, hettiwi padou a'marro. ²⁰ Na ngidiwi riti iya kantong, netti nakalewa bana wulla wuddi nawali.'' ²¹ Mangenawi paroru wainawi, napagadowa, lapata naruppuwi. ²² Nyaka bahinnawe na mbuamane nappa padeku bana olle nawi sapi pawukku pateba'da, ahinnana ata kabokko paketteda pawukku pahukumda, ²³ Na dukkiwe ne ana panah ate dana'na, eka kowa keila a'ngettana wenna irra, nda pandege ne pamate denga'na. ²⁴ Nyaka bahinnawe, anagu,rengnge waga, mattarage ne patekkigu. ²⁵ Ne atemu ka'dana elekage nee larana nati mawinne, monno ndu pagado wekki kana nee larana. ²⁶ Orona, amangeda bana ata papagadona monno papamatena. ²⁷ Nee ummana na arowe rate dana, padouda ngara ata mate.