¹ Anagu, dabulla kadi hidda ngara panungnga dagu, takka ka enga bondala kumudi hidda ngara paretagu ne ate danamu, ² Oronawe nyawi pamado'i denga nawe tolekamu nee ponnu tana, monno enga duanawe tolekamu lapata engage kanuru kanengga barramu. ³ Nyaka ne manowara monno kesetiaan kadana dundakagu, terudi bukku detamu, monno tulisawi nee ate kii danamu. ⁴ Nyaka bahinnawe, enga manowaradagu monno enga paakadagu ne aromatana Maromba Allah monno olle ata pi'amu. ⁵ Waini na MYORI walina ate danamu, monno kada menne kage ne pande doumu. ⁶ Akuwa monno wai takkawi nee ngara parawimu, ne Nya enga palurutanadi ngara lara pakakomu. ⁷ Ndu pakeketa wekkina, takka madautawi na MYORImu monno eruge ne pata adiraka. ⁸ Nyabawe apaduwa gowe toumu monno apa segara gudi ngara rui'mu. ⁹ Paakawi na MYORI waidi ngara potemu, monno ngara uwa mbodi da papawilli limmamu, ¹⁰ Nyaka hidda kapettelamu enga bonnuda lapata banna malegawe waddeka, monno nee padou kapassu wa'iwi angguramu enga penne nawe wee anggura. ¹¹ Anagu, du tolakawe ne panungngana MYORI, monno dumanukkage mbu rengnge nadi ngara pareta Na. ¹² Orona, na MYORI na tegurawi ngara ata pamanowarana, apagaina paama amanowarawi ana na. Wellina Maneilo ¹³ Maringina lage ne ngara yemmi akollena maneilo, monno ne yemmi akolena pande, ¹⁴ Orona ne pautuna naluapoge wali barrana omma kaka, monno nepakollena naluapoge wali barrana doka. ¹⁵ Na pawelli capo walina permata, monno dapasama dengakidi hidda ngara pakambu atemu. ¹⁶ Toleka mado'i neige limma kawana'na, ne mbendera monno pote neige limma wellona. ¹⁷ Na larana lara adua, ngara pagana paga adua mememawa. ¹⁸ Nya bana padou tolekawa'ida ngara ata awaini, ngara ata adekuni hidda bana ata bahagia. ¹⁹ Orona maneilo na MYORI na pakeddewe dasarna tana, monno oro pandeNa napakeddewe langita, ²⁰ Na waige pandeNa, bana puawe bonnu monno ngara kasoba apatorrokage wee saneta. Belajarage ne maneilo ga'i karawige ne aadila barrada ata waddeka ²¹ Anagu, dupalokokage banna eruge wali barra matamu, enga karawa mowe, ²² Nyaka enga nyawe patoleka dengana dewamu, monno rewana bukkumu. ²³ Nyaka enga kako duamuni na laramu, monno dukatunduraki. ²⁴ Monno dumadautaki ne mbu beikako, lapata ne mbu durako mu dura manguttura. ²⁵ Dumadautakana mbu katattaka, ato ne papadee dengada ngara ata fasik bana dukki kowe rapana. ²⁶ Orona enga nyadona Myori padou ande atemu, monno nakaragudi pagamu ga'i kada wennakana irra. ²⁷ Da pattukawe ne ngara adua papatubadawe barrada ngara ata awukku pakolege, lapata ne yo'u mutaluwe mburaige. ²⁸ Dalummukadi olle atamu, " Kakowu, baka ammi pi'agu bakoka, wuddi kuyagudi, malla hidda padengina olle atamu wa'idi barramu. ²⁹ Ndu kambukage ne ndadua arobana olle atamu, malla nenya enga wa'iwi barramu. ³⁰ Ndu parikka dengakawi na olle atamu, mba dana raikowe adiraka barramu. ³¹ Ndu kagulangau denga kawi na ata arawige ne abokala, monno ndu dekupongukadi ngara larana, ³² Orona na MYORI namadinggiladi ngara ata ndaluruta larana, takka nadua dengadi ngara ata adua lara palina. ³³ Ne lii aurana MYORI enga wa'ige nee ummada ngara ata fasik, takka ne kanuru kanengga enga wa'ige nee ummada ata adua. ³⁵ Na ata amaneilo enga paakadawi, takka hidda ata kabika, ata tebe enga pamakkedadi.