¹ Rengewe, ne ngara lakawa padungana ata paama, monno mattarage ga'i kaenga kolle mowe ne pande, ² Orona kupanungnga gudi ngara hidda adua barramu, du'dundakakadi ngara hidda papatutugu. ³ Nyaka ne baenga poga barrada amagu ne baku kiina, kutanaulaka, monno ana kanua dadi naga innagu, ⁴ Napa nungaga amagu, hinnage, " Ga'i koge ne atemu kaenga pamenderanadi hidda ngara patekkiku, karawawi hidda ngara paretagu nyaka kaenga tolekamu. ⁵ Kollege ne maneilo, kollege ne pande, dubullakage monno duelekana wali ne ngara patekkigu. ⁶ Ndu dundakakage ne maneilo, mba enga karawanagu. Manowarage mba enga kadinagu. ⁷ Kuwungana ne maneilo, nyadowe kollege ne maneilo. Monno wali ngara kuwa pakollemu, ga'i kaenga kollekimowe ne pande. ⁸ Pabotowe, mba enga keketanagu, nyaka enga pamenderamo mba enga paakadagu. ⁹ Enga pataunagu karangan bunga a'dua ne katowa detamu, enga yanagu mahkota adua barramu. Pedewa Na Lara Amaneilo ¹⁰ Anagu, rengewe monno deibawe ne patekkigu, ga'i kana mado'iwe ne tolekamu. ¹¹ Kupanunga guwi na lara maneilo barramu, kudadarawu ne lara aluruta. ¹² Ne mbu kakoko na pagamu dana maandaki, monno mbu malleko ndu katunduraki. ¹³ Pamenderawe ne papadungadagu, ndu pasellakawe, karawawe lage orona nyawe tolekamu. ¹⁴ Nduli'kawa na larada ata mapodeta, monno du dekukawi na larada ata diraka. ¹⁵ Marrowi na lara, monno nduli'waikana, elena wali barrana monno kako patirriwu. ¹⁶ Oronawe ne hidda dabisaki badura badaraikoge ne ndadua, namuage ndura matada, mba elledi kaleka olle atada. ¹⁷ Orona ne hidda angaage ne roti mapodeta, monno aenuge ne anggura kelaliman. ¹⁸ Nyaka, na larada ata benara napagaina mangewala loddo kapugedde, awanggara nadukkiwe dindara loddo. ¹⁹ Na larada ata mapodeta napagaina kapotta katto, dapandekige mba appakowe pakatundura dengada. ²⁰ Anagu, matarage ne patekkigu, patukkedi katillumu barranawe ne liigu. ²¹ Nda dundakakadi mba eruna wali aro matamu, bondala paduawi nee ate danamu. ²² Oronawe nyawe patoleka dengada ata akollege, monno padua dengana ngara karodduka wekkidanada. ²³ Karawa paduawe atemu enga maga wekkimu, oronyawe pawali wa'inanawe ne toleka. ²⁴ Lettoge ne ngada mapoteda wali barramu, monno eruge ne pata ngindi ngada panewe togo rowi. ²⁵ Gaikudi hidda matamu kaenga patuudawe aro, lapata hidda matamu kaegakudi magillakage ne aro. ²⁶ Dekuwi na lara aluruta, monno matarage kaengakugu nee laramu. ²⁷ Ndu elekana nee mbali wello ato mbali kawana, erudi wa'imu wali ne pata adiraka.