¹ Anagu, ne budeiba kuwi ngara patekkigu monno bu bondala paduwawi ngara paretagu nee ate danamu, ² Nyaka hidda katillumu enga matara nawe ne maneilo monno mu pa'andege atemu barra nawe ne papande denga. ³ Nyaka mbu kawula koge ne papande denga, monno mupadekuge lii ne pamanibba dengamu, ⁴ Ne mbu wegawe pagaina wega omma kaka, monno mbu mattara paduwage napagaina mbu mattarana doka tana dana, ⁵ Nyaka enga dommu mowe ne toleka amadautawi Mola Marawi, monno enga kollemowe ne pata pandewi Maromba Allah. ⁶ Oronawe, na MYORI Nya ayawe ne maneilo, ne pande monno manibba wali amminawe ngada dana'Na. ⁷ Na tulu pagatadi ngara ata a' duwa atena. Nyabana agollopawi ngara ata arawige ne ahinna takkana, ⁸ Na kadiwi ngara lara a'adila monno nakarawawi ngara ata adekunadi pareta'Na. ⁹ Nyaka bahinnawe, enga dommu mowe ne abenara, ne a'adila monno ahinna takkana, ngara lara adua. ¹⁰ Nyaka, ne maneilo enga tama nawe ate danamu, monno ne pande nyabawe pakalada dewa dengngamu. ¹¹ Ne pangedda adua enga gollopanagu, monno ne pande engage bana karawawu, ¹² Ga'i ku dukki kawi na lara nda dua' wali barrada ata amapodeta, ¹³ Wali barrada hidda ata adundakawi na lara adua, monno kadekuwi na lara akapottana. ¹⁴ A beiponguge barawige ne adiraka, monno abeige ne pawilli mapodeta adirraka, ¹⁵ Nda luruta larana, monno nda dua parawina. ¹⁶ Enga pasella dagu wali barrada mawinne padede mata, mawinne lawore monno awi'a ngadana, ¹⁷ Adundakawi olle dewana ne bana mbo'upo, monno abulladi ngara pawyata ne aro sagana Mola Marawi. ¹⁸ Nyaka bahinnawe, namossage ummana nee wanno'da ngara ata mate, monno na lara palina na aro wa'i barrada dewa ata mate. ¹⁹ Ngara ata akako barrana dappa etabawi mawiyoda, lapata datoleka bana. ²⁰ Nyaka bahinnawe, ga'i kaenga likimu na lara adua, monno kaenga karawa kimu nalara adua. ²¹ Malla, hidda bana ata jujura adouge ne wanno, monno ata da diraka parawina a'dangngi wa'i nee, ²² Takka hidda ngara ata fasik enga pamossadadi wali nee wanno, monno ngara ata mapodeta enga kaidadi wali nee wanno dana.