¹ Amsal-amsal Salomo, anana Daud, Tokko Israel, ² Gai kapandege ne papande denga monno papanunga, monno kandommuwi ngara pateki papandenga, ³ Gai ka kollege ne panunga tubana papande dengawe ne keadilan, a'benara, monno a'hina takana, ⁴ Gai kayawe ne pande barrada ngara ata a'naif, monno ne pamadomu denga monno patutu lara barrada ata bo'u. ⁵ Gaikudi hidda a'maneilo karengngewe monno katambawe ne papanungada, lapata hidda a'pande kakolena lara patutuwai, ⁶ Gai ka dommuwi patudda wai monno tudda, ngara patekkida ata a'maneilo monno keke'da. ⁷ Madautawi Mola Marawi nyawe kawungana pande, ngara ata kabokko a'kanissikawe ne maneilo monno panunga. Rengewi inna amamu monno marrodi ngara pakuwana ⁸ Rengewe, co... ngara anagu, panungana ama'mu, monno dakareikana patekkina innamu, ⁹ Orona nyawe karangan bunga tubana katowamu monno rewa bukku detamu. ¹⁰ Anagu, ba hidda ata diraka ba laikokuwu, dapa dekukana. ¹¹ Ba hidda koge, ''Meiya dekuma yamme, maida kata palegana raa, maida kata gelokawi ngara ata da sala lakka da'i orona. ¹² A ollenawe odidana maida kata kaballo bolodi, ahinna na hidda a'burru nee rate dana. ¹³ Enga kolle dadi ngara barang apawelli, enga ponnu dawe ngara barang rampasan ne umma'da. ¹⁴ Sutenmi nee tilluma, nyaka ne itto enga kolle dobbada riti iya kantong." ¹⁵ Anagu, ndu deku kadawi na lara'da, pattu wekkina wali ammi nee larada, ¹⁶ Orona hidda wa'ida a'sangga wa'i nee lara a'diraka, monno hidda a'ngetta ponguna ba pamate ata. ¹⁷ Orona, kareibanawe ne irra pata'ida barra aro matada keila, ¹⁸ Takka hidda ata a'aro douge ne raa'da, a'egi douge ne lolo ngauda. ¹⁹ Hinna wa'i bawe kadukkana hidda ata a'mate dengana pautuna, ne nyawe pamakai denga' nawe lolo ngauna morina. Ne Maneilo Na Ka'aulana Palolo dengawe ²⁰ Ne maneilo na boulawe nee tillu lara, nee padou aluana atana, napa oudage lii'na. ²¹ Ne tillu ata mangeda nakawula, nee ngara binna wanno napa dukkige patekkina. ²² '' Pirra mado'i capona, co...ngara ata damangu pamenne wa'i, ba enga gu nee padoumu nebahinna? Pirra mado'i capona hidda ngara ata ama oloka, ba beige ne pata ahinna na monno ngara ata kabokko ba dabeige ne papande denga? ²³ Madikirawu monno karengnge gawe ne patekkigu, nebahinnawe kubeige tekkiwe i' ategu barramu monno baku tekkiwi ngara patekkigu barramu. ²⁴ Oronawe mbu darengnge waga baku kadengngagu, monno daiki ata a'angnga denga ga ne baku padolawi limmagu, ²⁵ Lapata ne yemmi di angnga dengakige ne panungngagu, monno di rengnge wali atekiwe ne patekkigu. ²⁶ Nyaka ne yowa enga madita kaigowe ne padongguramu, enga tedeka kaidagu bana dukki kowe mbu madautawu, ²⁷ Mbana dukki kowe ne pamadauta dengamu apagaina paringngi nale, monno ne da'duwa bana dukki kowe barramu pagaina angin puyuh, bana dukkiwe ne susa monno karodduka tou detamu. ²⁸ Mbapa hinnawe, enga kadengnga daga, takka daku walekiwi. Enga manunna elle daga takka da kolle kiga. ²⁹ Orona, a'kamukage ne papande denga, monno dama dautakiwi na Mola Marawi, ³⁰ Dabeikige ne papanungngagu, monno a'kanissikawi ngara patekkigu. ³¹ Nyaka bahinnawe, enga ko'u doudawe ne ngara parawida, monno a'bekuta dengage ne ngara pakambu douda. ³² Orona, ngara ata damangngu koba katowana amate wa'ige ne inda pandeda, monno ngara ata kumbe amodda orona ne tebe'da. ³³ Takka, hidda arengnge waga, enga duwa nawe padouda monno enga eledadi pamillaka."