¹ Na MYORI namadinggilawi na kilo nda benara, takka na gollopawi na kilo ahinna takkana. ² Mbana dukki kowe ne kagula ngau, na ndukki kaiwe ne kanissika, takka ne maneilo enga'ge barrana ata duwa ate. ³ Na ata apanewe luruta, dapadeku kaiwe ne duwa atena, takka na ata mapodeta na donggurawe torona. ⁴ Mbana dukkikowe rapana hidda ngara pote dapawelliki, takka ne ahinna takkana napa utuwa ata. ⁵ Na larada ata duwa ate, enga lurutana, takka na ata fasika enga golena napaorowe kabokko douna. ⁶ Na ata apanewege ne aluruta, na karawawe lolo ngau'na, takka ngara ata mapodeta anokkodi parawi douda. ⁷ Ne pakambu atena ata fasika namuwage nebana mate, monno ne pakambu ateda ngara ata bokala nalilokowe. ⁸ Na ata aduwa dana dukki kige ne pasusa denga, takka na ata fasika enga nyadona adekuge. ⁹ Ne ngada'na ata fasika, nya apakawurawi olle atana, takka ne papande denga nya agatawi na ata benara. ¹⁰ Mbana makolleko na ata benara ageile ngara ata iya wanno, takka bana pade'ekona na ata fasika enga kabarada ata iya wanno. ¹¹ Kanuru kanenggana na ata abenara enga maju nawe ne tana wanno, takka enga bobaranawe napaorowe ngada malobena ata fasika. ¹² Garra kugu akanissika olle ata'na, daiki koba katowana, takka na ata amaneilo enga kanawa'na. ¹³ Na ata angindi panewe, na wukke ngara kuwawi rahasia, takka na ata pamenne, enga pandena bana djagawi ngara apaoro. ¹⁴ Mbada'iko ata paboto'da enga nangnga nawe ne iya kalena wanno, takka bamangedako ata pa'ate, enga tolekanawe ne wanno. ¹⁵ Enga tauna i'na na ata a'taguwi olle atana, takka mba garrakugu akamukage ne patugana enga toleka duwa'na. ¹⁶ Na mawinne a'duwa atena enga pa'akadawi, takka na ata mapalita nakollege papote denga. ¹⁷ Na ata a'mawu atena naraige aduwa tubana toudouna, takka na ata mapalita nawega douwe touna. ¹⁸ Na ata fasika na ellewe ne utuna a'liloko, takka mba garrakugu abondalawe ne aduwa, enga kollenawe ne kanuru kanengga nda dukkana. ¹⁹ Mba garrakugu apamenderawe ne ahinna takkana, enga tolekana, takka mba garrakugu awolawe ne ndatena enga matena. ²⁰ Hidda ngara ata a'tillira atena da' manotoki arona MYORI, takka na pa'akadi hidda ngara ata aluruta larana. ²¹ Mattarage, hidda ata arawige ne nda'duwa enga dongguradawe toroda, takka wolla uwada ngara ata abenara enga tolekada. ²² Ahinna'na omma rara ngora detana wawi, hinna kaina mawinna kobala damangu koba katowana. ²³ Ne paduwa denga nyawe pakollena na ata a'benara, takka ne pakambu atena ata fasika napakona'na wee peddi. ²⁴ Wa'i ata awewarana pote'na, takka enga matamba pote'na, wa'i kaiwi ata a'irita madangi, takka enga dana tutuke tubana. ²⁵ Mba garra kugu amanunna padolana, enga engage kanuru kanengga barramu, mba garrakugu aya paenu, ne barramu enga yadagowe pa'enu denga. ²⁶ Mba garrakugu apakati kuu, dengana gandum, enga auradagu ata, takka ne kanuru kanengga enga burrunawe ne barrada ata amabatta. ²⁷ Mba garra kugu awolawe ne aduwa, apangeddawi ata, takka mba garra kugu awolawe ne nda'duwa enga donggura kaimowe ne nda'duwa. ²⁸ Mba garra kugu akatakkuka denga'di potena enga warrakamu, takka na ata aduwa enga tolekana napagaina kalungnga roo amorona. ²⁹ Mba garra kugu adawuwe ne umma katongana enga kollenawi paringngi, na ata kabokko enga nyabana papawedena ata maneilo. ³⁰ Ne toleka aduwa nyabawe pakollena na ata a'benara, monno mba garra kugu amaneilo enga pandemowe patana mba ndekenawe atena na ata aduwa. ³¹ Nyaka na ata abenara mbana kolle koge torona ne ponnu tana, appa cakiwa na ata fasika monno ngara ata arawige ne nda duwa.