¹ Inular-Nya eisiira, '' Tutuunya Sia'u nonjarita eisi' emiu, eiolot nutoo-too sanu umai eiri' ini umai sanu jio maate jiompo siira ne'ita tepomareta nu' Alata'ala najaok mepake te'ababaraka.'' ² Touk onoeleo lamai he'ua siYesus noleva siPetrus, SiYakobus ane siYohanes ane concoono siira siia nolala'e eibuut sanu mapangkat. Eiri'ua siira apatoo boi. Lamai he'ua telio niYesus nabalik eitolo niira, ³ ane tepakean-Nya memeas tutuu nggugulinapong. jio umai sotoo samu monjaria tepakean memeas eijuniaa eini sanu maala momeasa tepakean sima he'ua. ⁴ Lamai he'ua temurit-murit ne'ita siNabi Elia concoono siNabi Musa pepees nonjarita concoono siYesus. ⁵ Sipetrus nogular eisiYesus, ''Guru, mombosi tutuu si'ami umai eiri'ini patuvaya si'ami mongoroa tolusinarung, sesinarung eisi'oo, sesinarung eisiMusa ane sesinarung eisiElia.'' ⁶ SiPetrus jio mo'otoi tesapa sanu noulara'onya, karna siira nobubuleong. ⁷ Lamai he'ua teru'ong nemboluni siira ane lamai eilalong nuru'ong be'ua inepe tesuara nuAlata'ala, ''Einimo teUnga'U sanu U' agalani, po' inepea siia.'' ⁸ Watu ne'ita papait, jio inonotoi siira jio ne'ita sotoo concoono siira, boi simotoo niYesus. ⁹ Watu siira nenyau lamai tebuut be'ua siYesus nontuuna eisiira,'' Inyaa nonjarita eisissee tesapa sanu papa'ali initamo ni' emiu, jijiompo teUnga nuManusia netuvuonye lamai te' amateong.'' ¹⁰ Siira nonuru'i tetutuunong he'ua ane ne' u'utanyaong tesapa samu minaksut niYesus, nongular, ''netuvuonye lamai te'amateong ?'' ¹¹ Lamai he'ua siira no'utanya eisiia, '' nete'uya teguru-guru nuhukum nuAlata'ala nongulara siNabi Elia kanaboi majaok eijuniaa jijilompo tepuang sanu tinuju nuAlata'ala mopa'asalamat tetoo-too.?'' ¹² Nonyimbat siYesus, ''Tutuu, siElia kanaboi majaok pabibia ane membombosiongonye jojoo. Iama'o sanu umai netetulis sima teUnga nuManusia? Nete'uya Siia kana mabari maasesa ane no'ajaati? ¹³ Tapi Sia'u monjarita eisi'emiu, siElia najaoko ane tetoo-too nonggauka eisiia monurut te'eseilu niira sanu majaat, selilio sanu umai netetulis eilalong nujarita nu'Alata'ala sima siia." ¹⁴ Watu siYesus, siPetrus, siYakobus, ane siYohanes najaok emurit-murit ntaninya,siira ne'ita tetoo nabari neincong emurit-murit he'ua, ane soso'uya teguru nuhukum nu' Alata'ala pepees negiging concoono temurit-murit-Nya. ¹⁵ Watu tetoo nabari he'ua ne'iya siYesus, siira jojoo neherang ane nelinjok nolaboti Siia. ¹⁶ Lamai he'ua siYesus no'utanya emurit-murit-Nya, "Tesapa sanu pinegigini ni'emiu concoono teguru-guru nuhukum nu'Alata'ala?" ¹⁷ Nonyimbat sotoo lamai tetoo nabari he'ua, "Guru, teunga'u eini u'omung eiSi'oo, sia nobobo karna pinentamai nu'alus sanu majaat. ¹⁸ Watu siia pinentamai nu'alus he'ua, te'alus he'ua momauta'onya eitana; lamai he'ua tenganganya nevuyo, tengisinya okoit-koit ane te'alaenyaa najari no'ojong. Sia'u nomongimo eimurit-murit Ni'oo, antau siira nombugo te'alus he'ua, tapi siira jio maala monggauka'onya." ¹⁹ Lamai he'ua nongular siYesus eisiira, "Hee si'emiu tetoo-too snu jio nomarcaaya, maganamo Sia'u nomoia concoono si emiu. Maganamo Sia'u masabar eisi'emiu . omunga teunga he'ua menekai!" ²⁰ Lamai he'ua siira nongumungnya siSiia. Watu te'alus he'u ne'ita siYesus, siia selengaan nonggugura teunga he'ua, ane teunga he'ua pinauta'onya eitana ane nonangkaduling, pepees tenganganya nevuyo. ²¹ Lamai he'ua siYesus no'utanya eisiama nuunga he'ua, "So'uyamo e'endenya siia pinentamai?" sinimbatinya, "Lamai watu siia ulengi made'i. ²² Mengkaning-kaning te'alus he'ua nomauta'onya eilalong nuapi ane eilalong nuogo nonyo'arai momatenya. Tapi ane Si'oo maala monggauka tesapa-sapa, ondoni si'ami." ²³ SiYesus monyimbat, "Nete'uya inularmu, 'Ane Si'oo maala?' Jojoo tegauk maala majari eitoosanu nomarcaya eiSia'u!" ²⁴ Selengaan siama nuunga he'ua nroroa, "Sia'u nomarcaya! tapi tuluni sia'u karna te'aparcayaongu mokurang." ²⁵ Watu siYesus ne'ita tetoo nabari najaok neincong, siia nonyimang te'alus sanu majaat he'ua, " hee si'oo te'alus sanu nonyabaa tetoo majari nobobo ane nobongol. Sia'u nomarentaa si'oo pesuvungo lamai teunga eini ane inyaa mentamaonye eisiia!" ²⁶ Lamai he'ua nesuvungo te'alus he'ua pepees neroroa ane nonggugura tutuu teunga he'ua. Teunga he'ua initanya sima tetoo sanu naate, Karna he'ua nabari tetoo nonjarita, ''siia naatemo.'' ²⁷ Tapi siYesus nondiit telima nuunga he'ua ane nombauna'onya, lamai he'ua siia ne'oro. ²⁸ Watu siYesus nentama eivonua, jio umai tetoo ntaninya boi temurit-murit-Nya. siira no'utanya eisiia , ''Nete'unya si'ami jio maala nombungo te'alus sanu majaat he'ua ?'' ²⁹ sinimbati-Nya eisira, ''Te'alus sangaya eini jio maala nobugo boi nobugoi nungane.'' ³⁰ SiYesus concoono temurit-murit-Nya nelengkat lamai ri'ua ane nolabati teTana nuGalilea . SiYesus jio seilu tetoo-too ntaninya mo'otoi eipaio siira, ³¹ Karna siia pepees nomaguru temurit-murit-Nya. Siia nogulara eisiira, ''TeUnga nuManusia kana noveena eilalong nukuasa numanusia, ane siira momate siia. Tapi tolueleo touk siia nopatei, siia metuvuonye lamai te'amateong.'' ³² siira jio mo'otoi tebatua nujarita he'ua tapi nobule no' utanya essiia. ³³ Lamai he'ua najaoko siYesus concoono temurit-murit-Nya eiKapernaum. Watu siYesus eilalong nuvonua, siia no' utanya eimurit-murit-Nya, ''Tesapa sanu jinaritai ni ni emiu eikokua siira ³⁴ Tapi siira noodoy, karna eitanga nujalang eikokua siira nebabantaong sima sisee sanu tetomooge eiolot niira. ³⁵ Lamai he'ua siYesus nongodung ane noleva sompulu rotoo temurit he'ua. Inular-Nya eisiira, ''Ane sotoo seilu majari tetomooge, siia kanaboi majari tevotuang ane mondulu jojoo tetoo. ³⁶ Lamai he'ua siYesus nondiit telima sotoo teunga sanu mede'i ane inoroa'onya eitatanga niira Lamai he'ua siia negonggol teunga he'ua ane nonjarita eisiira, ³⁷ ''Sisee-see monarima sotoo teunga sima eini karna teunga he;ua nomarcaya eisia'u tetoo he'ua monarima Sia'u. Sisee-see monarima Sia'u jio boi Sia'u sanu notarimanya, tapi te'Alata'ala sanu nonuju Sia'u.'' ³⁸ SiYohanes nongular eisiYesus, "Guru, si'ami ne'ita sotoo nepake te'ababaraka lamai, tetope-Mu nombugo te'alus sanu majaat. Lamai he'ua si'ami nolarng siia, karna siia jio tetagu ni'ita." ³⁹ Tapi inular niYesus, "Inya si'emu molarang siia! Karna sotoo sanu mapake te'ababaraka nutope'u monggauka tegauk sanu mabaraka jio maala selengaan monjajaati Sia'u. ⁴⁰ Sisee-see jio mongeva si'ita, siia he'ua tetagu' ni'ita. ⁴¹ Tutuunya Sia'u nonjarita eisi' emiu, sisee-see mombee si'emiu menginung teogo sakaca karna si'emiu umai tetoponuut niKristus, siia monarima tetambo lamai te'Alata'ala." ⁴² "Sise-see monyabaa mogutu tedosa sotoo lamau teunga-unga mede'i eini sanu nomarcaya eiSia'u, re'Alata'ala mehukum mevoat tututu tetoo he'ua. Aginyamo sobua tevatu sanu mooge no'otoa eigorogotnya ane norampaka eilalong nudagat. ⁴³ Ane sabata telima ni'oo monyaba si'oo mogutu tedosa, ologimo. Aginyamo si'oo mentama otutuvu sanu seende-endenya olima sabata, he'uapa robata telima ni'oo norampaka eilalong nunaraka, eilalong nuapinsanu jio maate-ate. [ ⁴⁴ Eipomoiaoing he'ua teule-ulenya jio maate, ane teapinya jio maate-ate.] ⁴⁵ Ane sabata tepaa ni'oo monyabaa si'oo mogutuu tedosa, ologimo. Aginyamo si'oo mentama ei'otutuvu sanu seende-endenya kingkido, he'uapa robaya tepaa ni'oo norampaka eilalonu nunaraka. [ ⁴⁶ Eipomoiaong he'ua teile-ulenya jio maate-ate.] ⁴⁷ Ane sabata temata ni'oo monyabaa si'oo mogutu tedosa, suita'omo. Aginyamo si'oo omata sabata mentama eilalong nupomarenta ni'Alata'ala, he'uapa omata robata norampaka eilalong nunaraka, ⁴⁸ eipau teule-ulenya jio maate ane teapinya jio maate-ate. ⁴⁹ Karna jojoo tetoo kana noosini nuapi. ⁵⁰ Teosing mombosi tutuu, tapi ane teosing majari moonggo, iama'o se' emiu mopo' oosingonye he'ua? Si'emiu kanaboi umai teosing eilalong numbotomu ane metuvu membombosing."