^{2 3 4 1} SiYesus nelengkat lamai ri'ua uma'o eiTana nuYudea ane eitana nusantava nuBangkalang nuYordan. Tetoo nabari najaok neincongonye eipapalit Siia. Sima biasa siia nomaguruonye siira. Lamai heu'a najaok tetoo-too nuVarisi, ane monyo'arai mogutu siYesus monggauka te'asasala, siira no'utannya eiSiia, "Maala sotoo langkai monggaata telapinya?" Tapi sinimbati-Nya eisiira, "Tesapa teparenta vineena niMusa eisi'emiu?" Nonyimbat siira, " siMusa nombeena te'isin nonggata'onya, tapi siia kanoboi nogutu tesura magaat." ⁵ lamai he'ua nongular siYesus eisiira, "SiMusa nonulisa teparenta eini eisi'emiu, karna teambokmu ma'adal. ⁶ Tapi watu te'Alata'ala nopa'ajari telangkai ane tebengkel. ⁷ karna he'ua telangkai kana molinjo'i siamannya ane siinanya ane nosoincong concoono telapinya, ⁸ rotooa'onya majari sima sotoo. karna he'ua siira jio rotoo, tapi sotoo. ⁹ karna he'ua, tesapa sanu pinosolibok nu'Alata'ala, inyaa nogaata numanusia." ¹⁰ Watu siira najaoko eivonua, temurit-murit he'ua no'utanyaonye eisiYesus sima tegagaatong. ¹¹ Inular-Nya eisiira, kutibuka sisee-see sanu monggaata telapinya bengkel, ane molapi tebengkel ntaninya, siia monyaapi eilapinya sanu pabibia. ¹² ane telapi bengkel monggaata telapinya langkai ane nopolapi nulangkai sanu ntaninya, siia monyaapi." ¹³ Lamai he'ua lasiatoo nongomung teunga-unga mede'i eisiYesus, antau siia monggama ane mombarakai siira; tapi temurit-murit'Nya nonyimang tetoo-too he'ua. ¹⁴ Watu siYesus ne'ita tegauk he'ua siia nongoungkul ane nongular eisiira, " Patuvaya teunga-unga he'ua najaok eiSia'u. inyaa mongompoti siira, karna tetoo-too sima teunga-unga eini sanu majari tetoo-too nu'Alata'ala eilalong tepomarenta-Nya. ¹⁵ Tutuunya sia'u nonjarita eisi'emiu, sisee-see jio monuruk te'Alata'ala sima teunga sanu mede'i, siia jio maala majari tetoo eilalong nupomarenta-Nya." ¹⁶ Lamai he'ua sotoo mai sotoo Siia nongambing teunga-unga he'ua ane pepees nongembea telima-Nya eibabok nuva'i niira, Siia nombarakai siira. ¹⁷ Watu siYesus nonarusa tepelampa-Nya, sotoo nelinjok najaok eiSiia ane nopotu'u eitolo-Nya ane siia no'utanya, "Guru sanu mombosi, tesapa sanu ugauka antau ma'aala te'otutuvu sanu seende-endenya eisuruga?" ¹⁸ Nonyimbat siYesus, "Nete'uya inulara ni'oo sia'u mombosi? Jio sotoo sanu mombosi, boi te'Alata'ala mboto. ¹⁹ Si'oo mo'otoi teparenta-parenta nu'Alata'ala, 'Inyaa momate, inyaa monyaapi, inyaa mongangga, inyaa molampoa watu monyabii, inyaa monipu, oongkoi siamamu ane siinamu!' " ²⁰ Lamai he'ua inular nutoo eiSiia, "Guru, sia'u nonuru'i jojoo teparenta he'ua lamai watu sia'u ulengi molumbi." ²¹ SiYesus ne'ita siia ane nongagalani, lamai he'ua nonjarita eisiia, "Boi ulengi sangaya sanu nokurang eisi'oo. Na'omo, pobaluko jojoo tehartamu ane veena he'ua eitoo-too sanu mopukur. Ane sima he'ua si'oo ma'aala teharta eisuruga. Lamai he'ua pajaok menekai ane pajari tetoponuutU." ²² Ne'eepe tejarita he'ua nokurang teamboknya, lamai he'ua siia uma'o ane noondong, karna nabari tehartanya. ²³ Lamai he'ua siYesus nongingita temurit-murit-Nya eipapalit-Nya ane nonjarita eisiira, "Nosusa tutuu tetoo sanu makaya mentama eilalong nopumarenta nu'Alata'ala." ²⁴ Temurit-murit-Nya neherang ne'eepe tejarita-Nya he'ua. Tapi siYesus nonjaritaonye, " Teunga-unga'U,nosusa tutuu he'ua mentama eilalong nopumarenta nu'Alata'ala. ²⁵ Nagampang sambaang te'unta mentama telulu nujaru, he'uapa sotoo sanu nakaya mentama eilalong nupomarenta nu'Alata'ala." ²⁶ Siira nelabi neherang ane ne'u'uutanyaong, "Ane sima he'ua sisee sanu maala nosalamata'onya?" ²⁷ SiYesus nongingta siira ane nonjarita, "Temanusia jio maala monyamalata te'aleanya mboto, tapi te'Alata'ala maala monyalamata siira, karna siia maala monggauka jojoo." ²⁸ Lamai he'ua siPetrus nonjarita eisiYesus, "Si'ami eini nolinjo'imo jojoo ane nonuuto Si'oo!" ²⁹ Nonyimbat siYesus, "Tutuunya Sia'u nonjarita eisi'emiu, tetoo sanu molinjo'i tevonuanya, atau tesisia'anya, atau tetutuainya, atau siinanya, atau siamannya, atau siamanya, atau teunga-unganya, atau tejo'ongnya karna monuut Sia'u ane karna momarcaya teKareva sanu mombosi, ³⁰ tetoo he'ua eiwatu eini monarima sagatusnkaning te'ababarinya tevonua, tesia'a, tetuai, tesiina, teunga ane tejo'ong, maampo nopa'asesa nutoo, ane tewatu totoloi siia monarima te'otutuvu sanu seende-endenya. ³¹ tapi nabari tetomooge majari tetoo biasa ane tetoo biasa majari tetomooge." ³² SiYesus ane temurit- murit-Nya pepees eilalong nupelampaong uma'o eiYerusalem ane siYesus nelampa etiolo. Temurit-murit niYesus neherang ane tetoo-too sanu nonuut Siia pupuri valii nobule. Sangkaningonye siYesus noleva sompolu rotoo temurit-Nya ane Siia nompamula nongulara eisiira tesapa sanu kana majari ei'alea-Nya mboto, ³³ "Nyapoeini si'ita uma'o eiYerusalem ane teUnga nuManusia kana noveena ei'olongian-olongian nu'imam ane teguru-guru nuhukum nu'Alata'ala. Siira kana monantua mohukum Siia maate. Lamai he'ua siira mombeena Siia eitoo-too sanu jio tetoo nuYahudi, ³⁴ ane siira mope'esili, monyuui, monyambook, ane momate Siia, tapi notouk tolueleo Siia kana metuvu lamai te'amateong." ³⁵ Lamai he'ua siYakobus ane siYohanes, teunga-unga niSebedeus, nongosu'i siYesus ane nonjarita eiSiia, "Guru, si'ami seilu Si'oo monggauka tesapa sanu nopomongi ni'ami!" ³⁶ Sinimbati-Nya eisiira, " Tesapa sanu seilu ni'emiu Ugauka eisi'emiu?" ³⁷ Siira nongular, "Patuvaya si'ami okuasa ane mongodung concoono Si'oo watu Si'oo momarenta anu nopopo'itaa te'ababaraka. Patuvaya sotoo mongodung eisabata nu'oanong Ni'oo ane sotoo eisabata nu'oigi Ni'oo." ³⁸ Tapi inular niYesus eisiira, "Si'emiu jio mo'tooi tesapa sanu pinomongi ni'emiu. Maala si'emiu masesa concoono Sia'u, sima si'ita menginung te'asesesa lamai tecawan sanu selilio? maala si''emiu maesa concoono Sia'u sima nobaptis nu'asesesa sanu kana Utarima?" ³⁹ Nonyimbat siira, " Siami maala." SiYesus nonjarita eisiira, "Tutuu, si'emiu kana menginung lamai tecawan nu'asesesa sanu kana Uinung ane nobaptis nu'asesesa sanu kana utarima. ⁴⁰ Tapi Sia'u jio maala monantua sisee sanu mongodung eisabata nu'oanongU ane sabata nu'oigiU. Te'Alata'ala kana monantua sisee sanu mongodung eisabata nu'oanongU ane sabata nu'oigi'U." ⁴¹ Watu ne'eepe tepomongiong ni'Yakobus ane ni'Yohanes he'ua sompulutoo temurit sanu ntaninya najari nongoungkul eisiira. ⁴² SiYesus noleva siira ane nonjarita, "Si'emiu mo'otoi siira sanu inakui sima tetopomarenta nubangsa-bangsa nomarenta makasar sima tepuang eibabok nurayatnya. Tetomooge-tomooge sanu opangka nonggauka tekuasa eibabok niira. ⁴³ Jio sima he'ua eiolot ni'emiu. Sisee-see seilu majari tetomooge eiolot ni'emiu, siia kanaboi majari tevotuang ni'emiu. ⁴⁴ Sisee-see seilu majari tetopomimpin eiolot ni'emiu, siia kanaboi majari tevotuang nutoo jojoo. ⁴⁵ Karna teUnga nuManusia valii jio najaok antau nopiara, tapi momiara ane mombeena te'alae-Nya nopatei majari pombolos tetoo bari." ⁴⁶ SiYesus concoono temurit-murit-Nya najaoko eikota nuYerikho. Watu Siia nesuvung lamai teYerikho concoono temurit-murit-Nya ane too bari sanu netuntuutong, umai sotoo tetopomongi-mongi sanu nobuta, tetopenya siBartimeus, teunga niTimeus, nongodung eipipit nujalang. ⁴⁷ Watu siia ne'eepe siYesus tetoo nuNasaret no'osuk, nompamulamo siia neroroa, " Yesus, tebija niDaud, agalani aasi sia'u!" ⁴⁸ Nabari tetoo nonyimangnya antau siia mopodoy. Tapi nelabi noporos siia neroroa, " Tebija niDaud, agalani aasi sia'u!" ⁴⁹ SiYesus nengondok ane nonjarita, "Levai siia!" Siira noleva tetoo sanu nobuta he'ua ane nonjarita eisiia, "Pa'sanang teambok Ni'oo, pe'oro, Siia noleva si'opo." ⁵⁰ Tetoo sanu nobuta he'ua nolapasa tenausnya, lamai he'ua selengaan ne'oro ane uma'o eisiYesus. ⁵¹ SiYesus no'utanya eisiia, " Tesapa sanu seilumu Ugauka eisi'oo?" Nonyimbat tetoo nobuta he'ua, "Guru, sia'u seilu me'ita!" ⁵² Lamai he'ua siYesus nongular eisiia, "Na'omo, karna, si'oo nomarcaya, si'oo pine'eondok!" Watu he'ua siia selengaan ne'ita, lamai he'ua siia nonuuto siYesus eilalong nupelampaong-Nya.