¹ Watu siYesus concoono temurit-murit-Nya nongosu'i teYerusalem, mo'osuk teKmpung nuBetvage ane nuBetania eibuut nuSaitun, siYesus nontuuna rotoo temurit-Nya, ² "Na'omo eikampung sanu notoloi ni'emiu. Watu si'emiu neteppojaok inotoa eierii sambaang tekeledai sanu molumbi, sanu jiompo sotoo mesaveinya. Bu'asa tearorongnya ane omung menekai. ³ Ane sotoo mo'utanya eisi'emiu, 'Nete'uya si'emiu monggauka he'ua?' Ulara eisiia, 'Siopu ni'ami momarluua eini ane siia selengan monencilea vavalii.' " ⁴ Siira uma'o ane na'ajaok sambaang tekeledai eijalang inotoa eierii mo'osuk tebamba novonua. siira nombu'asa tearorongnya. ⁵ Lasiatoo sanu ne'oro eiri'ua no'utanya eisiira, "Mongkuya si'emiu? Nete'uya si'emiu nombu'asa tearorong nukeledai he'ua?" ⁶ Temurit-murit-Nya nonyimbat sima sanu inulara'omo niYesus, 'siopu ni'alami momarluua eini ane siia selegaan monencilea vavalii'. Lamai he'ua tetoo-too he'ua nomatuvaya siira nongala tekeledai he'ua. ⁷ Lamai he'ua siira nongomung tekeledai sanu nolumbi he'ua eisiYesus, ane nongembea'onya tenaus niira eite'enya, ane siYesus nesave eikeledai he'ua. ⁸ Nabari tetoo nomipira tenaus niira eijalang, umai sanggaat sanu nongambura tepapanga sanu oroongya lamai tejo'ong ane nongembea eijalang antau noongkoi. ⁹ Tetoo-too sanu nelampa eitolo ane eite'e niYesus neroroa, "Nomuji te'Alata'ala! Tealata'ala mombarakai siia sanu nnajaok. ssiia umai te'ababaraka niSiopu. ¹⁰ Tealata'ala mombaraki tepomarenta-Nya. Siia momarenta simamo tekakai ni'ita luulu, tepuang siDaud. nomuji tte'Alate'aa eilalong nusuruga!" ¹¹ najjaok eiYerusalem, siYesus nentama eiVonua nu'Alata'ala. Eiri'ua Siia nengingitai jojoo. Tapi karna teeleo nondoungo, siia nesuvung lamai teYerusalem ane uma'o eiKampung nuBeania concoono sompulu rotoo temurit-Nya. ¹² Modondonya mai, watu siYesus concoono temurit-muritt-Nya nolinjo'i teKampung nuBetania, siYeus noorok te'ompong-Nya. ¹³ Lamai maavar siia n'ita sompuung tepuu nu'ara sanu oroongnya. Siia nongosu'i tepuu h'ua nelolo tevua nu'ara. Tapi watu Siia najaok eiri'ua, Siia jio na'aala tesapa-sapa, boi teroongnya, jio umai ovua, karna jiompo tewatunya nevua. ¹⁴ SuYesus nonjarita eipuu he'ua, "Jiongo sotoo nenginang tevuamu seende-endenya! Si'oo jiongo nevua." Temurit-murit-Nya ne'eepe tesapa sanu inulara. ¹⁵ Lamai he'ua siYesus concoono temurit-muri-Nya najaok eiYerusalem. Touk nentama eitutumbalog nuVonua ni'Alata'ala, siYesus nompamulamo nombugo tetoo-too sanu pepees nobabaluk ane nongoli eiri'ua. Siia valii nolengana temeja-meja nupemombolosonng tedoi ane tepongodunong nutopobabaluk temerpati. ¹⁶ Siia jio nombeena tetoo-too nongomung tesasagara nalabat eitutumbalog nuVonua nu'Alata'ala. ¹⁷ Lamai he'ua Siia nomaguru tetoo-too eiri'ua. Siia nongular, "Umai sanu netetulis eilalong nuBuku sanu Mapacing, 'TeVonua'U kana notope tevonua nupongganeong nujojoo tebangsa.' Tapi si'emiu eini nonjaria'omo he'ua tepomoiaong nonipu tetoo-too!" ¹⁸ Te'olongian-olongian nu'imam ane teguru-guru nuhukum nu'Alata'ala ne'eepe sanu inular niYesus he'ua, ane siira nelolo te'akal antau maala momate siYesus, karna siira nobule eiSiia. Siira nobule karna jojoo tepeinconong butoo he'ua masanang ne'eepe tepangajar-Nya. ¹⁹ Watu beimbengimo mo'osuk mondoung, siira nesuvungonye lamai tekota he'ua. ²⁰ Vavali titielo siYesus concoono temurit-murut-Nya uma'o eiYerusalem, siira ne'ita tepuu nu'ara sanu kinutuk eivengi he'ua. Tepuu he'ua notuugo jaok eirarinya. ²¹ SiPetrus nolambot sanu jinaritaa niYesus eivengi eipuu he'ua. Siia nonjarita eisiYesus, "Guru, itaipo, tepuu nu'ara sanu kinutu Ni'oo notuugo." ²² SiYesus nonyimbat eisiira , "Pomarcaya ei'Alata'ala. ²³ Tutuunya Sia'u nonjarita eisi'emiu, sisee-see momarenta tebuu eini, 'Neteengkat ane neterampak eilalong nudagat!' Ane jio mobata-bata eilalong muamboknya, tapi momarcaya tegauk he'ua kana majar, tegauk sanu pinarenta'onya kana majari. ²⁴ Karna he'ua Uulara eisi'emiu, tesapa sanu nopomongi wattu monggane, pomarcaya si'emiu nonarimamo, lamai he'ua si'emiu noveena he'ua. ²⁵ Watu si'emiu monggane ei'Alata'ala, mongampuni tetoo-too sanu dosa eisi'emiu, antau siama ni'emiu eisuruga valii mongampuni tedosa ni'emiu." [ ²⁶ Tapi, ane si'emio jio mongampuni tetoo ntaninya, Siama ni'emiu eisuruga valii jio momgampuni si'emiu.] ²⁷ Lamai he'ua siYesus concoono temurit-murit-Nya najaokonye eiYerusalem. Watu siYesus nelapa eitutumbalong noVonua nu'Alata'ala, te'olongian-olongian nu'imam ane teguru-guru nuhukum nu'Alata'ala ane tetopomimpin-pomimpin nutoo-too nuYahudi najaok eisiYesus. ²⁸ Siira no'utanya eiSiia, "Napake tekuasa nisee Si'oo nonggauka tegauk-gauk he'ua? Sisee sanu numbeena tekuasa he'ua eiSi'oo?" ²⁹ Nonyimbat siYesus eisiira, " Sia'u kana mombeena tepo'utanya eisi'emiu. Ane si'emiu monyimbat Sia'u, sia'u kana mongulara eisi'emiu napake tekuasa nisee Sia'u nonggauka tegauk-gauk he'ua. ³⁰ Sisee sanu nombee siYohanes tekuasa nobaptis, te'Alate'ala atau temanusia? Simbati sia'u!" ³¹ Siira nejajaritaong tepo'utanya niYesus. Siira nonjarita, "Ane si'ita mongulara, 'Lamai tesuruga,' Siia kana nonjarita 'Ane sima he'ua, nete'uya si'emiu jio nomarcaya eisiYohanes?' ³² Tapi, mosusa si'ita mongulara, 'lamai temanusia!' "Siira nobule eitoo mabari, karna jojoo tetoo nomarcaya siYohanes tututuu sotoo tenabi. ³³ Lamai he'ua siira nonyimbat siYesus, "Si'ami jio mo'otoi sisee nombee siYohanes tekuasa." SiYesus monjarita eisiira, "Ane sima he'ua, Sia'u valii jio mongulara eisi'emiu nepake tekuaa nisee Sia'u nonggauka tegauk-gauk he'ua."