¹ Lamai he'ua siYesus nompamula nojaritaa tepogurapanong eitopomimpin-eitopomimpin tetoo-too nuYahudi."Luulu mai umai sotoo sanu nonuda te"anggur eijo"ong ane nonondok eipapalitnya.Siia nogutu tevolo tepomojotong te'anggur, ane nombaung teponjagaong sanu mapangkat.Lamai he'ua siia concoono lasiatoo tetopokarajaa nogutu tejanji nopotilal tepa'alal nujo'ong nu'anggur he'ua, lamai he'ua uma'o eikota ntaninya. ² Najaoko tewatunya nelolu,siia nonuju sotoo tevotuang eitopokarajaa-topokarajaa he'ua nongincona lamai tepa'ala nujo'ong nu'anggur he'ua. ³ Tapi siira nera'op tevotuang he'ua ane nomboboginya,lamai he'ua nonuju siia uma'o telima nokosong, ⁴ Tetogujo'ong he'ua nonujuonye tevotuang sanu ntaninya eisiira. Tapi tevotuang he'ua binobogi niira jaok napa'itong eiva'inya ane siira nope'esili tevoutang he'ua. ⁵ Lamai he'ua tetogujo'ong he'ua nonujuonye tevotuang sanu ntaninya, ane too eini pinatei niira. Sima he'ua nengkaning-kaning sanu vavalii mai, umai sanu binobogi ane umai valii sanu pinatei niira. ⁶ Ulengi umai sotoo valii eitogujo'ong, teunga sanu inagalaninya. Ponou'ongnya siia nonujunya eisiira ane nonjarita, "Teunga'u kana no'obulea niira." ⁷ Tapi tetopokarajaa- topokaraja he'ua nejajaritaong, ' majaok teunganya, siia sanu monarima teharta nutosia'ang. maemo, si'ita momate siia, antau tehartanya majari teharta ni'ita.' ⁸ He'uapa siira nera'op ane nomate siia, lamai he'ua irampaka'onya nesuvung lamai tejo'ong he'ua." ⁹ SiYesus no'utanya eitopomimpin-topomimpin tetoo-too nuYahudi, "Tesapa sanu nogauka nutogujo'ong he'ua? Siia kana majaok ane momatei tetopokarajaa-topokaraja he'ua. Lamai he'ua momarcaya'onya tejo'ong nu'anggur he'ua eitopokarajaa-topokarajaa sanu ntaninya. ¹⁰ Si'emiu jio nombasa teBuku sanu mapacing, 'Tevatu sanu irampaka nutopogutu tevonua, najarimo tevatu eipasunya. ¹¹ Lamai teSiopu tegauk eini najari, ane tegauk he'ua neherang inita?' " ¹² Lamai he'ua siira nongusaha mera'op siYesus, karna siira mo'otoi siYesus nonjaritaa'mo tepogurapano sima siira. Tapi siira nobule eipeinconong nutoo he'ua. Siira nolinjo'i Siia ane uma'omo. ¹³ Vavalii seeleo tetopomimpin-topomimpin nuYahudi nonuju lasiatoo tetoo nuVarisi sanu opondapat mombayar teasel eisiKaisar masalane lasiatoo niHerodes sanu nosituruk tepombayarom teasel eisiKaisar. Siira tinuju monyo'arai mogutu siYesus monjarita masala antau siYesus maala nosangka. ¹⁴ Siira najaok eiSiia ane nonjarita, "Guru, si'ami mo'otoi Si'oo tetoo sanu mondolong. Si'oo mongulara tesapa sanu tutuu ane jio nobule tesapa sanu inulara nutoo ntaninya, karna Si'oo jio monyabataa tetoo sanu opangka. Tapi Si'oo mondolong momagurua simamo te'eseseilu nu'Alata'ala. Monurut te'aturan nu'agama ni'ita, maala si'ita mombayar teasel eisiKaisar, atau jio? kanaboi si'ita mombayar atau jio?" ¹⁵ Tapi siYesus mo'otoi siira mombosi eivivi tapi majaat eilalong nuambok, ane Siia nonjarita eisiira, "Nete'uya si'emiu nonyo'arai sia'u? Omung menekai eiSia'u sombo'a tedinar antau Sia'u mongitanya." ¹⁶ Lamai he'ua siira nongomung tedinar he'ua, ane siYesus no'utanya eisiira, "Tegambar ane tetope nisee eini?" Siira nonyimbat, "tegambar ane tetope niKaisar." ¹⁷ Lamai he'ua siYesus nongular eisiira, "Ane sima he'ua, veena eisiKaisar sanu masipato noveena eisiKaisar, veena ei'Alata'ala sanu masipato noveena ei'Alata'ala!" Siira neherang tutuu ne'eepe siYesus. ¹⁸ Lamai he'ua najaok eisiYesus lasiato tetoo nuSaduki sanu nomarcaya jio metuvuonye tetoo sanu naatemo. Siira nu'utanya eisiYesus, ¹⁹ "Guru, luulu siMusa nolisa,' ane sotoo telangkai, maate ane molinjoi telapi bengkel tapi jio ounga,terurus nutoo he'ua kana boi molapi tetimbala he'ua ane mombee teunga eirurus sanu maate he'ua.' ²⁰ Umai pitutoo sorurus.Sanu pabibia nolapi sotoo tebengkel ane naate jio umae ounga. ²¹ Lamai he'ua sanu ororua'nya nolapi siia ane naate jio umae ounga.Sima he'ua valii sanu ototolua'onya, ²² jaok opepitua'onya -- siira nolapi tebengkel he'ua jio umai ounga. Ponou'ongnya tebengkel he'ua naate. ²³ Eieleo peetuvuonye, watu siira netuvuonye, sisee sanu majari telapi nubengkel he'ua? Karna pitutoo he'ua nolapimo siia." ²⁴ SiYesus nonyimbat eisiira, "Si'emiu nasala,karna si'emiu jio mo'otoi teBuku sanu Mapacing atau te'uig nu'Alata'ala. ²⁵ Karna watu siira netuvu lamai te'amateong, siira jio molapi ane jio nopopolapi tapi metuvu sima temalakat-malaekat nu'Alata'ala eisuruga sanu jio molapi. ²⁶ Vavalii sima tepeetuvuonye nutoo-too sanu naate.Momikironye sima sanu binasai ni'emiu eilalong nubuku niMusa sanu nongulara sima tevumbu nurui sanu nevaa. Iama'o te'Alata'ala nonjarita eisiMusa, 'Sia'u teAlata'ala sanu sinomba ni'Abraham, ni'Ishak ane ni'Yakub!' ²⁷ Siia jio te'Alata'ala sanu sinomba nutoo--too sanu naate, tapi te'Alata'ala sanu sinomba nutoo--too netuvu! Siemiu tututuu nasala!" ²⁸ Sotoo teguru nuhukum nu'Alata'ala ne'eepe siYesus ane tetoo--too nuSaduki nejajaritaong, ane mo'otoi siYesus nonyimbat sanu tutuu.Siia najaok eisiYesus ane no'utanya, "Tesapa teparenta nu'Alata'ala sanu mepenting tutuu lamai jojoo?" ²⁹ SiYesus nonyimbat, "Eini teparenta sanu mapenting tutuu,,'Po'inepea, tetoo--too nu'Israel, teSiopu he'ua te'Alata'ala ni'ita , jio umai teSiopu Alata'ala sanu ntaninya. ³⁰ Agalani teSiopu, te'Alata'alamu.Agalani mepake jojoo teambokmu ane jojoo tepikiranmu ane jojoo te'uigmu.' ³¹ Eini teparenta sanu ororua'onya, 'Agalani tetoo--too ntaninya sima te'alaemu mboto.'Jio umai teparenta sanu nelabi mapenting lamai sanu rorua teparenta eini.' ³² Lamai he'ua teguru nuhukum nu'Alata'ala he'ua nojarita eisiYesus, "Mombosi tutuu, Guru. Tutuu sima sanu inular Ni'oo.Siia boi sotoo teSiopu, ane jio umai ntaninya boi siia. ³³ Agalani teAlata'ala mepake jojoo teambok ni'ita ane jojoo tepikiran ni'ita ane jojoo te'uig ni'ita,ane agalani tetoo--too ntaninya sims si'ita agalani te'alae ni'ita mboto. Melabi mepenting monggauka he'ua lamai mombee jojoo tepombee sanu irampuni ane tepombee ntaninya!" ³⁴ SiYesus mo'otoi siia mapande nonyimbat.SiYesus nojarita eisiia,"Si'oo mo'osuk majari tetoo eilalong nupomarenta nu'Alata'ala!" Lamai he'ua ,jio umai sotoo nabarani no'utanyaonye eisiYesus. ³⁵ Watu siYesusnnomaguru eipeinconong nutoo eitutumbalong nuVonua nu'Alata'ala, Siia no'utanya, "Iama'o teguru-guru nuhukum nu'Alata'ala nongulara teKrustus he'ua tebija niDaud? ³⁶ SiDaud mboto pinimpin nu'Alus sanu Mapacing nonjarita, 'TeSiopu Alata'ala nonjaritamo eiSiopu'u, "Pongodung eisabata te'oanongU, jaok temusu-musu-Mu." ³⁷ SiDaud mboto nonope teKristus 'Siopu', iama'o valii siia tebija niDaud?" Tepeinconong nutoo bari masanang ne'eepe Siia. ³⁸ Wtu siYesus nomaguru, siia nonjarita, "Pa'ajaga-jaga eiguru-guru nuhukum nu'Alata'ala. Inyaa monuru'i tegauk niira. Siira seilu lalampa napake tebaju melenda ane seilu no'ongkoi eipasar. ³⁹ Siira seilu mongodung eipongodunong sanu mombosi tutuu eipongganeong-pongganeong nuYahudi ane tepongodunong sanu eitolonya eilalong nupesta. ⁴⁰ Siira mongakal jaok mongala tevonua nutimbala-timbala ane siira mongulara tengane-gane sanu meende antau nonyoyoka tegauk niira sanu majaat. Siira kana ma'aala te'asesesa lamai te'Alata'ala sanu nelabi movoat." ⁴¹ Vavalii seeleo siYesus nongodung nopotolo eipeti pongembeong ane nongingitai iama'o tetoo-too nongembea tedoi eilalong nupeti he'ua. Nabari tetoo sanu nakaya nongembea mabari tedoi. ⁴² Lamai he'ua sotoo tetimbala sanu nopukur najaok ane nentamaa romb'a tedoi, terekenongnya sanu nede'i tutuu. ⁴³ Lamai he'ua siYesus noleva temurit-murit-Nya ane nonnjarita eisiira, "Tutuunya Sia'u nonjarita eisi'emiu, tetimbala nopukur he'ua nombeena sanu mabari eilalong nupeti poongembeong he'ua he'uapa jojoo tetoo ntaninya. ⁴⁴ karna siira jojoo nombeena tetilal nede'i lamai te'akakaya niira. Tapi tetimbala he'ua nombeena jojoo tehartanya, jojoo sanu pinarluua'onya ei'otutuvunya."