¹ Watu siYesus nesuvung lamai teVonua nu'Alata'alasotoo temurit-Nya nongulara eiSiia, ''Guru, arai, itai, magaya teVonua nuAlata'ala ane tevonua-vonua sanu ntaninya sanu vinaung eini. Mooge valii tevatu-vatu sanu pinake nonusung!'' ² SiYesus nongulara eisiia, ''Arai itai luulu magaya tevonua-vonua samu morosong he'ua, jio sobua tevatu nopatuvaya eibabok muvatu ntaninya. Jojoo tevatu nonavua numusu-musu nutoo-too nuYahudi!'' ³ Lamai he'ua siYesus ane temurit-murit-Nya uma'o teBuut nusaitun ane nongodung nopotolo eiVonua nuAlata'ala. Wutu jio umai tetoo ntaninya, siPetrus, siYakobus, siYohanes ane siAndeas no'utanya eisiia, ⁴ ''Ulara eisi'ami siambengi teVonua nu'Alata'ala he'ua nopo,ora. Tesapa tetandanya jojoo tegauk he'ua kana majari?'' ⁵ SiYesus nongulara eisira, ''pa'ajaga-jaga antau jio umai tetoo-too sanu mongakal si'emiu sima tegauk-gauk he'ua sanu kana majari. ⁶ Karna mabari tetoo mongaku-ngaku simamo si'au ane mongulara 'Sia teKristus,' ane tetoo bari momarcaya siira. ⁷ Watu si'emiu me'eepe nepapateong ei pomoiaong sanu mo'osuk ane me'eepe tekareva Sima nepapateong eipomoiaong sanu maavar, inyaa mobule. ⁸ Karna teAlata'ala nonantua tegauk-gauk he'ua kanaboi majari. Tapi he'ua jimpo tepomarenta-pomarenta meeva-evaong. Umai vaii telindug eipaio- ane umai tetoo-too naate nuorok. Tapi jojoo tegauk-gauk he'ua boi tepamulaong nu' asesesa sima tebengkel sanu kana moguunga mompamula merasai mepess. ⁹ Tapi pa' ajaga-jaga karna temusu-musumu mongomung si'emiu eipongadilan nu'agama niira, ane si' emiu nobobogi eipongganeong- pongganeong nuYahudi. Si'emiu valii kana no'adili eitolo nugubernuur-gubernuur ane nupuang-puang karna si'emiu nonuut Sia'u. Eiri'ua si'emiu maala mongular teKareva sanu Mombosi simau Sia'u. ¹⁰ Te'Alata'ala nonantua teKareva sanu Mombosi sima tepomarenta nu'Alata'ala kanaboi nokarevaa eijojoo tebangsa jijiompo terjunia eini monouk. ¹¹ Watu termusu-musu mera'op ane mongomung si emiu no'adili karna si'emiu monyabataa te'alaemu. Tapi watu si'emiu no'adili, ulara tesapaa sanu noulara nu'Alata'ala eisi'emiu. Tesapa sanu si'emiu kanaboi mongulara eiwatu he'ua jio lamai tepikiranmu mboto tapi tebasa-basa majaok lamai te'Alus sanu Mapacing. ¹² Majaok tewatunya tetoo-too sanu jio momarcaya eisia'u mombeeana terurus sanu nomarcaya nopatei. Siama-siama sanu jio nomarcaya monggauka tergauk sanu selilio eiunga-unga sanu nomarcaya. Teunga-unga sanu jio nomarcaya mongeva tetosia'angnya sanu nomarcaya ane momate siira. ¹³ Si'emiu no'engkelesi jojoo nutoo Karna si'emiu nonuut Sia'u. Tapi tetoo-too sanu montaang eilalong nu'aparcayaong jaok teponou'ong otutuvu niira, nosalamata lamai te' asesesa nu'Alata'ala.'' ¹⁴ Si'Yesus tatarus nonjarita, ''Si'emiu kana me'ita tetoo sanu majaat tutuu sanu no'engkelesi nu Alata'ala, tetoo sanu monyabaa teVonua nu'Alata'ala majari noboa, me'oro eipomoiaong sanu jio masipato. Sanu mombasa tebuku eini kanaboi mo'otoi tebatuanya. Watu he'ua tetoo-too sanu momoia eiTana nuYudea kanaboi melinjok uma'o eibuut ¹⁵ Jojoo tetoo sanu eibabok nuatok nuvonua inyaa menyau ane mentama eilalong nuvonuanya ane mongala tersasagaranya. Tapi menyau ane boi melinjok. ¹⁶ Jojoo tetoo sanu mokarajaa eijo'ongnya kanaboi melinjok ane inyaa morampaka tewatu metencile uma'o tevonua mongala tebajunya. ¹⁷ Aasi tutuu tebengkel -bengkel sanu eiompong ane tebengkel-bengkel sanu nonyusui teunganya eiwatu heu'ua! ¹⁸ Ponggane ei'Alata'ala antau tegauk he'ua inyaa majari tewatunya mojolo. ¹⁹ Karna eiwatu he'ua kana majari te'asesesa tutuu. Te'asesesa sima he'ua jiompo majari lamai pamua nujuniaasanu pina'ajari nu'Alata'ala jaok eleo eini, ane te asesesa sima he'ua jio majarionye. ²⁰ maate. Tapi Karna Siia nogagalani tetoo-too sanu pinilei-Nya, siia mopo'okurang tewatu he'ua. ²¹ Eiwatu he'ua ane sotoo mongular eisi'emiu, 'Eiri' ini teKristus tepuang sanu tinuju nu'Alata'ala mopa'asalamat tetoo-too!' atau sotoo mongular, 'Ampi' he'ua umai teKristus!' inyaa si emiu nomarcaya, ²² Karna majaok tetoo-too sanu malampoa ane mongular, ''Sia'u tenabi.'' Siira mombee tetanda-tanda ane tengauk-ngauk sanu mabaraka mongakal tetoo-too. Siira valii monyo'arai mongakal tetoo-too sanu pinilei nuAlata'ala, tapi jio maala. ²³ Tapi pa'ajaga-jaga si'emiu! Sia'u nongulara eisi'emiu sima jojoo eini jijiompo tegauk he'ua majari.'' ²⁴ SiYesus nongular, ''Eiwatu he'ua touk te'asesesa he'ua teelo eilangit majari noudoung, ane tevulang jio mombee teraratnya. ²⁵ Tevituong-vituong nanavu lamai telangit ane tekuasa-kuasa eilangit nogogea nu'Alata'ala. ²⁶ Watu he'ua tetoo-too me'ita Sia'u, teUnga nuManusia majaok eijuniaa eilalong nuru'ong concoono te'ababaraka sanu mooge ane te'ararava sanu mooge.'' ²⁷ lamai he'ua Sia'u monuju temalaekat-malaekat uma'o eijojoo tepomoiaong eijuniaa lamai tepomoiaong sanu mo'osuk ane sanu maavar.'' ²⁸ SiYesus nongular eimurit-murit -Nya, ''Peguru lamai tepogurapapanaong sima tepuu nu'ara he'ua. si' emiu mo''otoi tesilo mo'osuko, watu tepanga-panga majari monobulung ane teroongnya mompamulamo metuvu ²⁹ Sima he'ua valii, si' emiu valii kana mo'otoi sede'i ma' opo teUnga nuManusia kana majaok, watu si'emiu me'ita tegauk-gauk he'ua majari. ³⁰ Tutuunya Sia'u nonjarita eisi'emiu, tetoo-too sanu netuvu eleo eini jiompo maate jojoo jijiompo jojoo tengauk he'ua majari. ³¹ Telangit ane tejuniaa motouk tapi tejarita'U jio umai nabalik seende-endenya ³² SiYesus nonarusa tejarita-Nya, ''Jio umai sotoo mo'otoi teeleo atau tejaang nu'ajajaokU. Temalaekat-malaekat eisuruga ane Siau, teUnga nu'Alata'ala, jio mo'otoi valii, boi Siama'U sanu mo'otoi ³³ Karna he'ua pa'asasadia molaboti te'ajajaokU, ane pa'ajtaga-jaga Karna si emiu jio mo'otoi siambengi tewatunya Sia'u majaok. ³⁴ Watu Sia'u majaok, tegauk he'ua sima tesapa sanu majari watu sotoo nakaya melampa nelinjo'i tevonuanya. jijiompo siia melengkat, siia nombee tepokarajaaong eivotuang-votuangnya mongurus tevonuanya, ane siia nongulara eitopojaga numbaba tatarus mojagai molaboti te'ajajaoknya. ³⁵ Karna he'ua pa'jaga-jaga molaboti te'ajajaokU, karna si'emiu jio mo'otoi siambengi tetoguvonua majaok. laboi siia majaok beimbengi atau matanga ndoung atau mantieleo atau titieleo. ³⁶ Pa'ajaga-jaga antau watu Sia'u jio inonotoi majaok, inyaa si' emiu boi nete'oturu. ³⁷ Tesapa sanu inulara'U eisi' emiu, inulara'U eijojoo tetoo, 'Pa' ajaga-jaga metaang te'ajajaokU!' ''