¹ Ulengi roeleo mompamula teelo nuPaska ane teelo nuRoti Jio Oragi. Te'olongian-olongian nu'imam ane teguru-guru nuhukum nu'Alata'ala melolo tecara mera'op siYesus antau jio nootoi nutoo bari ane Siia nopetei. ² Karna siira nonjarita, " Inyaa si'ita monggauka eitolo nutoo-too sanu nonjao'i teelo sanu marame antau joi najari no'ogoriok tetoo-too." ³ Watu he'ua siYesus nomoia eiKampung nuBetania eivonua niSimon sana luulu nepees tepudung. Pepees siYesus nenginang, najaok sotoo tebengkel obotol eisi teminya nunarwastu. Siia nombo'a tebotol he'ua ane nonjuana jojoo teminya he'ua eibabok nuva'i niYesus, tetanda noongko eisiYesus. ⁴ Lasiatoo sanu eiri'ua najari nengkeles ane ne'u'utanyaong, " Nete'uya pino'orugi jojoo teminya sanu masuli he'ua? ⁵ Teminya he'ua maala nopobaluk nelabi lamai tolugatusdinar ane tedoinya maala nopotilala eitoo-too mopukur!" Lamai he'ua siira nongoungkul eibengkel he'ua. ⁶ Tapi siYesus nonjarita eisiira, "Pauvaya siia! Nete'uya si'emiu nopo'osusa siia? Siia nonggauka tegauk sanu nombosi eiSia'u. ⁷ Karna tetoo-too sanu mopukur kalepu concoono si'emiu. Watu si'emiu seilu, si'emiu maala monuluni siira. tapi sia'u jio kalepu concoono si'emiu. ⁸ Tebengkel eini nonggauka sanu maala nonggauka'onya. Siia nominyai te'alae'U antau nonyadiaa sia'u nokubura. ⁹ Tutuunya sia'u nonjarita eisi'emiu, eipaoi-paoi eijuniaa teKareva sanu Mombosi nokarevaa, tesapa sanu ginauka'onya eini nojarita valii molambo tebengkel eini." ¹⁰ Watu he'ua siYudas Iskariot, sotoo lamai sompulu ratoo temurit niYesus, uma'o ei'olongian-olongian nu"imam opatuju mobaluk siYesus eisiira. ¹¹ Watu siira ne'eepe siYudas, siira nadandalan tutuu ane nojanjia mombenii siia tedoi. He'uapa siYudas nelolo teuwatu sanu mombosi mombena siYesus. ¹² Watu teelo pabibia tepesta nuRoti jio Oragi, watu tetoo-too nonyambale tedomba nuPaska, temurit-murit-Nya no'utanya eiSiia, "si'oo seilu menginang te'aniong nuPaska eipao? Si'ami maala monyadiaa he'ua." ¹³ Lamai he'ua siYesus nonuju rotoo temurit-Nya aneh nonjarita eisiira, " Uma'o eilalong nukota. Eiri'ua umai sotoo sanu monyumbi sobua te'urong nutana eisi teogo sanu netepojaok si'emiu. Ponuuto siia ¹⁴ ane mentama eilalong nuvonua. Ulara eitoguvonua eiri'ua, 'Teguru no'utanya," Eipaio tepenginanong sia'u maala menginang te'aniong nuPaska concoono temutit-muritU?" ' ¹⁵ Lamai he'ua tetoguvonua he'ua monujua eisi'emiu telontang sanu mooge eisalo babonya ane tesasagara inatura'omo. Lamai he'ua monyadiaa'omo te'aniong nuPaska ni'ita eidua." ¹⁶ Lamai he'ua rotoo temurit he'ua nelengkat ane uma'o eilalong nukota ane nonjao'i jojoo he'ua sima jinaritaa niYesus eisiira. Lamai he'ua siira nonyadiaa'omo te'aniong nuPaska. ¹⁷ Watu ndoung he'ua, siYesus najaok eiri'ua concoono sompulu rotoo temurit-Nya. ¹⁸ Watu siira pepees nenginang, siYesus nonjarita eisiira, "Tutuunya Sia'u nonjarita eisi'miu, sotoo eiolot ni'emiu sanu nenginang concoono Sia'u mobaluk Sia'u eimusu-musu." ¹⁹ Watu temurit-murit niYesus ne'eepe tejarita he'ua, siira najari noondong, ane sosotoo no'utanya eiSiia, "Jio sia'u sanu minaksut Ni'oo?" ²⁰ SiYesus nongulara eisiira, "Siia sotoo lamai si'emiu sanu sompulu rotoo eini. Siia tetoo sanu nononjoma teroti eilalong nucangko concoono Sia'u. ²¹ Karna teUnga nuManusia maate sima sanu netetulis eilalong nuBuku sanu Mapacing sima Siia. Tapi mesilaka eitoo sanu mobaluk Siia eimusu-musu! Aginyamo tetoo he'ua jio pinoguungaa." ²² pepees siira nenginang, siYesus nongala teroti ane nonggane ei'Alata'ala ane nonompig-nompiga. Lamai he'ua Siia notilala teroti eimurit-murit-Nya ane nonjarita, "Alamo ane inango. Teroti eini te'alae'U." ²³ Lamai he'ua siYesus nongala tepenginunong eisi teogo nu'anggur ane nonggane ei'Alata'ala nombeena eimurit-murit-Nya. Siira jojoo nenginung lamai tepenginunong he'ua. ²⁴ Lamai he'ua siYesus nonjarita eisiira, "Teogo nu'anggur eini teraa'U. Teraa eini mopo'uig tepejanjiong nu'Alata'ala concoono tetoo-too-Nya. Teraa'U neelug antau monyalamata tetoo bari. ²⁵ Tutuunya Sia'u nonjarita eisi'emiu, Sia'u jiongo umai menginungonye teogo nu'anggur jaok Sia'u menginung sanu vuou eilalong tepomarenta nu'Alata'ala." ²⁶ Lamai he'ua siYesus ane temurit-murit-Nya nonggumbuy eiSiopu he'uapa uma'o eiBuut nuSaitun. ²⁷ Lamai he'ua siYesus nonjarita eimurit-murit-Nya, "Si'emiu jojoo molinjo'i Sia'u, karna tinulis eilalong nuBuku sanu Mapacing, "Te'Alata'ala momate tetopomiara tedomba he'ua ane tedomba-domba-Nya melinjok nepudadag.' ²⁸ Touk Sia'u netuvu lamai te'amateong, Sia'u mongaliurui si'emiu uma'o eiTana nuGalilea ane netepojaok si'emiu eiri'ua." ²⁹ Lamai he'ua siPetrus nonjarita eisiYesus, "Maampo jojoo tetoo molinjo'i Si'oo, sia'u jio!" ³⁰ SiYesus nonyimbat, "Tutuunya Sia'u nonjarita eisi'oo, ndoungnya eini jijiompo temanuk netunturu'u rongkaning, si'oo jio mongakui Sia'u tolungkaning." ³¹ Tapi siPetrus nonjarita tututuu, Maampo sia'u nopatei concoono Si'oo, sia'u kalepu mongakui Sitoo!" Lamai he'ua jojoo temurit ntaninya nongulara sanu selilio. ³² Siira najaok eijo'ong sanu tinope Getsemani ane siYesus nonjarita eimurit-murit-Nya, "Pongodung si'emiu eiri'ini. Sia'u uma'o monggane," ³³ Lamai he'ua siYesus neubu siPetrus, siYakobus ane siYohanes concoono Siia ane norasai nosusa tutuu ane nabalesa. ³⁴ Lamai he'ua siYesus nonjarita eisiira, "TeambokU noondong tutuu sima mo'osuko maate. Pomoia eiri'ini ane pa'ajaga-jaga." ³⁵ Lamai he'ua siYesus uma'o naavar sede'i ane nopotu'u eitana ane nonggane antau, ane maala, Siia nolapasa lamai te'asesesa he'ua. ³⁶ Siia nonjarita, "BoAba, BoSiama, Si'oo maala monggauka jojoo. Avara te'asesesa eini lamai Sia'u. Tapi inyaa majari tesapa sanu ineseilua'U, tapi majari tesapa sanu ineseilua-Mu." ³⁷ Touk nonggane siYesus netencile eimurit-murit-Nya ane ne'ita siira pepees no'oturu. Siia no'utanya eisiPetrus, "Simon, nete'uya si'oo no'oturu? Si'oo jio maala monjaga-jaga maampo boi sajaang?" ³⁸ Lamai he'ua siYesus nonjarita eisiira, "Pa'ajaga-jaga ane ponggane antau si'emiu jio monggauka tedosa watu umai sanu monyo'arai si'emiu monggauka sanu majaat. Teambok ni'emiu mesiap monggauka sanu mombosi, tapi te'alae ni'emiu moluntoy." ³⁹ Lamai he'ua siYesus uma'oonye ane nonggane sima eikokua. ⁴⁰ Watu Siia najaokonye eimurit-murit-Nya, Siia ne'itaonye siira pepees no'oturu, karna temata niira moroi tutuu. Siira jio mo'otoi tesapa sanu maala noulara niira eiSiia. ⁴¹ SiYesus uma'oonye ane nonggane otolungkanina'onya. Siia netencile eimurit-murit-Nya ane ne'ita siira boi no'oturu. Lamai he'ua siia no'utanya eisiira, "Si'emiu ulengi no'oturu? Naganamo! Najaoko tewatunya! TeUnga nuManusia noveena eitoo-too sanu odosa. ⁴² Pembaungo, maemo si'ita uma'o netepojaok siira. Itai! Tetoo sanu mobaluk Sia'u no'osuko!" ⁴³ Pepees siYesus nonjarita, najaok siYudas, sotoo lamai sompulu rotoo temurit niYesus. Siia najaok concoono tetoo bari nongomung te'iabut ane tepombolilo. Siira tinuju nu'olongian-olongian nu'imam, teguru-guru nuhukum nu'Alata'ala ane tetopomimpin-topomimpin nuYahudi. ⁴⁴ Jijiompo tetoo-too he'ua najaok eijo'ong he'ua, tetoo sanu mombeena siYesus, nongulara eitoo sanu mabari he'ua, "Tetoo sanu umbongii, he'ua tetoo sanu nololo ni'emiu. Ra'op ane omungo Siia. Pa'ajaga antau Siia jio ma'alapas." ⁴⁵ Watu siYudas ane tetoo sanu mabari he'ua najaok eijo'ong he'ua, siia selengaan nongosu'i siYesus ane nonjarita, "Guru!" He'uapa siia nembongii siYesus. ⁴⁶ Lamai he'ua siira sanu najaok concoono siYudas nera'op siYesus. ⁴⁷ Sotoo lamai temurit-murit niYesus sanu mo'osuk nombuvut te'iabutnya, lamai he'ua nonibas tetelinga nuvotuang nu'Imam sanu Mooge. ⁴⁸ Nongular siYesus eisiira, "Irait ni'emiu Sia'u eini tetoo sanu majaat, si'emiu najaok nera'op Sia'u nongomung te'iabut ane tepombolilo. ⁴⁹ Seeleo-seeleo Sia'u umai eitatanga ni'emiu nomaguru eitutumbalong nuVonua nu'Alata'ala, ane si'emiu jio mera'op Sia'u. Tapi jojoo eini kanaboi majari antau majari sanu netetulis eilalong nuBuku sanu Mapacing." ⁵⁰ Lamai he'ua jojoo temurit-Nya nelinjo'i Siia ane nelinjok. ⁵¹ Watu he'ua umai sotoo sanu nolumbi nonuut siYesus. Tetoo he'ua boi nepake sabala tenaus sanu memeas nongompoti te'alaenya. Siira nondiit tenaus seilu mera'op siia, ⁵² tapi siia nolapasa tenaus he'ua ane nelinjok nelaulau. ⁵³ Lamai he'ua siYesus inomung eitolo nu'Imam sanu Mooge. Neincong eiri'ua valii jojoo te'olongian nu'imam, tetopomimpin ane teguru nuhukum nu'Alata'ala. ⁵⁴ SiPetrus nonuut Siia lamai teavar, jaok eilalong nututumbalong nuvonua nu'Imam sanu Mooge. Eiri'ua siia nongodung nerarang mo'osuk teapi concoono tetoponjaga-toponjaga. ⁵⁵ Te'olongian-olongian nu'imam ane tetoo-too nupongadilan nu'agama ntaninya nelolo tesabi mongeva siYesus antau Siia nohukum maate, tapi siira jio na'ajaok. ⁵⁶ Tapi mabari tesabi malampoa. Tepesabiong niira jio selilio. ⁵⁷ Lasiatoo ne'oro ane malampoa. Siira nongulara, ⁵⁸ "Si'ami ne'eepemo tetoo eini nongulara, `Sia'u morongkasa teVonua nu'Alata'ala sanu pinogutu numanusia eini ane eilalong nutolueleo Sia'u mombauna sanu ntaninya, sanu jio nopogutu numanusia.' " ⁵⁹ Tapi tepesabiong nutoo-too sanu malampoa jio selilio. ⁶⁰ Lamai he'ua te'Imam sanu Mooge ne'oro eitatanga niira ane no'utanya eisiYesus, "Jio jaa Si'oo monyimbat tetoo-too eini sanu norait eiSi'oo?" ⁶¹ Tapi Siia boi odo-odoy ane jio nonyimbat tesapa-sapa. Te'Imam sanu Mooge he'ua no'utanyaonye eiSiia, "Si'oo tepuang sanu tinuju nu'Alata'ala mopa'asalamat tetoo-too, teUnga lamai te'Alata'ala Sanu Pinuji?" ⁶² Nonyimbat siYesus, "Oie. Tutuu he'ua. Si'emiu me'ita teUnga nuManusia mongodung eisabata nu'oanong nu'Alata'ala sanu mabaraka ane majaok eilalong nuru'ong eilangit." ⁶³ Lamai ne'eepe he'ua te'Imam sanu Mooge he'ua nonjeaka tepakeannya ane nonjarita, "Si'ita jio nomarluua'onye tesabi. ⁶⁴ Silemiu Ne'eepemo Siia nonganggap mboto-Nya sima te'Alata'ala. Iama‘o si'emiu monantua?" Siira nonantua Siia kanaboi nopatei. ⁶⁵ Lamai he'ua lasiatoo nompamula nenyuui Siia ane nongompoti telio-Nya ane nonenggel-Nya pepees nonjarita eiSiia, "Hee Nabi, urai ulara sisee nonenggel Si'oo!" Tetoponjaga-toponjaga valii nonenggel siia. ⁶⁶ Watu he'ua siPetrus ulengi umai eitutumbalong, najaok sotoo tebengkel tevotuang nu'Imam sanu Mooge. ⁶⁷ Watu siia nelita siPetrus pepees nerarang, tebengkel he'ua momamatasi telionya ane nonjarita, "Si'oo valii kalepu concoono siYesus, tetoo nuNasaret he'ua ⁶⁸ Tapi siia jio nongakui, inularnya, "Sia'u jio mo'otoi tesapa sanu jinarita ni'oo." Lamai he'ua siia uma'o mo'osuk tebamabaa nututumbalong [ane netunturu'umo temanuk]. ⁶⁹ Watu tevotuang tebengkel he'ua ne'itaonye siPetrus, siia nompamula nongular eitoo-too sanu umai eidua, Tetoo eini sotoo tetagu niira." ⁷⁰ Tapi siPetrus jio nongakuionye. Jio neende lamai he'ua tetoo-too sanu umai eiri'ua nonjarita valii eisiPetrus, "Si'oo tutuu sotoo tetagu niira, karna si‘oo tetoo nuGalilea!" ⁷¹ Tapi siPetrus nongutuk tembotonya ane nonyumpa, "Sia‘u jio mo'otoi tetoo sanu inular ni'emiu eini!" ⁷² Touk he'ua netunturu'uonye temanuk orongkanina'onya. SiPetrus selengaan netelambot tesapa sanu jinarita niYesus eisiia, "jijiompo temanuk netunturu'u orongkanina'onya, si'oo jio nongakui Sia'u tolungkaning." Lamai he'ua siia notumangis ane osesegot.