¹ Titieleo mai te'olongian-olongian nu' imam nogotu tepejajao'ong concoono tetopomimpin-topomimpin nuYahudi, teguru-guru nuhukum nu'Alata'ala ane jojoo tetoo nupongadilan nu'agama sanu ntaninya. Lamai he'ua siira nonuju tetoo-too nomungui siYesus, nongomung siia ane nombeena'o-Nya eisiPilatus. ² SiPilatus no'utanya eisiYesus, ''Si''oo mboto nongulara'' ³ Lamai he'ua te'ologian-ologian nu' imam norait siYesus nonggauka nabari tegauk sanu majaat. ⁴ Lamai he'ua siPilatus he'ua siPilatus no'utanya eisiYesus, ''Si'oo jio seilu monyimbat? Po' inepea nabari terait eiSi'oo.'' ⁵ Tapi maampa siYesus jio osala, Siia jio umai nonjarita tesapa-sapa, Karna he'ua siPilatus neherang. ⁶ Sontong sangkaning, watu teeleo nuPaska siPilatus molapasa sotoo sanu pinanjara. Tetoo-too nuYahudi momile tetoo sanu nolapasa. ⁷ Watu he'ua umai sotoo tinopei siBarabas. Siia pinanjara cencoono tetoo-too sanu majaat. Siira nomate lasiatoo watu nongeva tepomarenta nuRomawi. ⁸ Lamai he'ua tepeinconong nutoo he'ua uma'o eisiPilatus ane nompamula nomongi siia nolapas setoo setoo eisiira sima biasanya. ⁹ SiPilatus no'utanya, "Si'emiu seilu sia'u molapasa tepuang notoo-too nuYahudi einni eisi'emiu?" ¹⁰ SiPilatus no'utanyaa he'ua karna siia mo'otoi te'olongian-olongian nu' imam nongomung siYesus eisiia, karna siira ne'iri hati. ¹¹ Tapi te'olongian-olongian nu'imam nongonda-ngonda'i teambok nutoo-too sanu neicong, antau siPilatus molapasa siBarabas, jio siYesus. ¹² Lamai he'ua siPilatus no'utanya eisiira, "Ane sia'u molapasa silBarabas, tesapa sanu seilu ni'emiu ugauka eitoo sanu tinopei ni'emiu tepuang nutoo-too nuYahudi eini?" ¹³ Siira neroroa eisi Pilatus, "Pakumo Siia eisalip!" ¹⁴ Tapi siPilatus no'utanya eisiira, "Nete'uya? Tesapa te'ajajaat sanu ginauka'o-Nya?" Tapi siira nentiang neroroa noporos, "Pakumo Siia eisalip!" ¹⁵ SiPilatus seilu nogutu tepeinconong nutoo-too he'ua nasanang, karna he'ua Siia nolapasa siBarabas sanu pinomongi niira. Lamai he'ua siPilatus nonuju tetantara monyambook siYesus, ane siia nombeena siYesus eisiira antau nosalipa'omo. ^{18 16} Lamai he'ua tetantara nongomung siYesus eilalong nututumbalong nupomoiaong nutomooge sanu tinopei tePretorium ane noleva jojoo tetantara nuRomawi sanu ampi he'ua. ¹⁷ Siira nongalina tepakena niYesus ane nepake tebaju sanu moungu eiSiia. Siira valii nogutu tebanto lamai terui sima tebanto nupuang ane nongembea eiva'i-Nya. 18 He'uapa nolalui niira sima mormuji Yesus, inular niira, "Netuvu tepuang nutoo-too nuYahudi!" ¹⁹ SIira nemombolosong nombobog teva'i niYesus nepake teto'on, nonunyui Siia ane nopotu'u eitolo-Nya nongaku-ngaku siira nonyomba eiSiia. ²⁰ Notouk siYesus pinotambaka nutantara he'ua, siira nongalina tebaju moungu he'ua ane nepakea vavalii tepakean numboto-Nya eiSiia. Lamai he'ua siira nongomung Siia uma'o eiaangnya momaku Siia eisalip. ²¹ Pepees siira nelampa, netepolabot sotoo tetopenya siSimon sanu najaok eiYerusalem. SiSimon he'ua lamai teKota nuKirene, siama ni'Aleksander ane niRuvus. Siira nomajujuta siSimon nonyumbi tesalip niYesus. ²² Lamai he'ua tetantara nongomung siYesus eiGolgota, sanu tebatuanya tebuut obelinga nuva'i. ²³ Eiri'ua siira nombee siYesus teogo nu'anggur sanu ginaloti temuur noinung antau jio mepees, tapi Siia jio seilu menginungnya. ²⁴ Lamai he'ua tetantara he'ua nomaku siYesus eisalip. Siira nongundi tepakean-Nya antau nonantua sisee sanu ma'aala tesapa. ²⁵ Siira nonyalipa siYesus ati sesio titieleo. ²⁶ Umai tetanda sanu pinakua eisalip. Eitanda he'ua tinulisa tesapa sanu noporaita Siia, "EINIMO TEPUANG NUTOO-TOO NUYAHUDI." ²⁷ Siira nonyalipa siYesus concoono rotoo tetopongangga, sotoo eisabata nu'oanong ane sotoo eisabata nu'oigi-Nya. ²⁸ [Lamai he'ua tejarita nu'Alata'ala najari sanu jinaritaa sima siKristus, "Siia irait sima tetoo- too sanu majaat."] ²⁹ Tetoo-too sanu nalabat eiri'ua nongular sanu majaat eiSiia ane nombebelina teva'i niira ane nonjarita, "Hee! Si'oo nongular mongguara teVonua nu'Alata'ala ane mogutunya vavalii boi eilalong tolueleo! ³⁰ Ane sima he'ua, penyau lamai tesalip he'ua ane salamata te'alae Ni'oo mboto!" ³¹ Sima he'ua valii siYesus pinotambaka nu'olongian-olongian nu'imam ane nuguru-guru nuhukum nu'Alata'ala ane siira nejajaritaong, "Tetoo-too ntaninya sinalamata'o-Nya, tapi te'alae-Nya mboto jio umai sinalamata'o-Nya! ³² Patuvaya tetoo eini, sanu inular Siia teKristus, tepuang nutoo-too nu'Israel, penyau lamai tesalip he'ua e'eini, antau si'ita maala me'ita ane momarcaya Siia tepuang ni'ita!" Siira sanu sinalipa concoono Siia noncalai Siia valii. ³³ Watu ati sompulu rorua eleonya, najari nondoung eitana he'ua ane tatarus sima he'ua najaok ati totolu beimbengi. ³⁴ Watu ati totolu beimbengi, siYesus neroroa noporos, "Eloi, Eloi, lama sabaktani?" sanu tebatuanya "Te'Alata'ala'U, te'Alata'ala'U, nete'uya Si'oo nolinjo'i Sia'u?" ³⁵ Lasiatoo sanu ne'oro no'osuk ri'ua ne'eepe siYesus ane nonjarita, "Po'inepe, Siia noleva siNabi Elia!" ³⁶ Lamai he'ua sotoo nelinjok ane nongala tesagara sanu maala monosop teogo". Siia nenjoui tesagara he'ua nepake te'anggur sanu mengilu ane nongembea he'ua eituvu nuto'on. Lamai he'ua vineena'onya eisiYesus ininung-Nya ane nongular, "Maemo si'ita metaang ane mongita siElia menyaua Siia lamai tesalip he'ua atau jio." ³⁷ Lamai he'ua siYesus neroroa noporos ane naatemo. ³⁸ Watu he'ua tekaing pongonto sanu tontoeng eilalong nuVonua nu'Alata'ala netilang najari rorua lamai babonya jaok eiangkopnya. ³⁹ Lamai he'ua tetopomimpin nutantara sanu ne'oro eitolo ni Yesus he'ua ne'ita iama'o siYesus naate, siia nonjarita, "Tetoo eini tutuu teUnga nu'Alata'ala!" ⁴⁰ Umai valii lasiatoo tebengkel eiri'ua sanu ne'ita lamai maavar jojoo sanu najari he'ua. Eiolot niira umai siMaria Magdalena, ane siSalome, ane siMaria siina niYakobus sanu nolumbi ane ni Yoses. ⁴¹ Tebengkel-bengkel he'ua nonuut ane nonulunimo siYesus watu Siia eiTana nuGalilea. Nabari tebengkel ntaninya valii eiri'ua sanu najaok lamai teGalilea uma'o concoono Siia eiYerusalem. ⁴² Teeleo he'ua teeleo monyadiaa tesasagara", jijiompo teeleo Pengondok nutoo-too nuYahudi. Karna he'ua', watu mo'osuk mondoung, ⁴³ siYusup, tetoo nu'Arimatea, uma'o eisiPilatus. SiYusup tetoo sanu mombosi ane tetopomimpin nu'agama nuYahudi. Siia metaang tepomarenta nu'Alata'ala. Notintibarani siia uma'o eisiPilatus ane nomongi tebatang niYesus antau mongubura'onya. ⁴⁴ Lamai he'ua siPilatus neherang siYesus naatemo, lamai he'ua siia noleva tetopomimpin nutantara ane no'utanya, "SiYesus tututuu naatemo?" ⁴⁵ Touk siPilatus mo'otoi siYesus tututuu naatemo, siPilatus nomatuvaya siYusup mongala tebatang niYesus. ⁴⁶ Lamai he'ua siYusup nongoli tegandis ane nenyaua tebatang niYesus lamai tesalip. Siia nongaluinya eilalong nugandis he'ua, ane nongembea'onya eilalong nukubur sanu totouko ginauni eipampang nubuut nuvatu. Lamai he'ua siia nonuju tetoo nondulina sobua tevatu mooge teponaub tebamba nukubur he'ua. ⁴⁷ SiMaria Magdalena, ane siMaria siina niYoses ne'ita eipaio tebatang niYesus kinubur.