¹ Touk teeleo pengendok nutoo-too nuYahudi, siMaria Magdalena ane siMaria siina niYakobus, concoono siSalome nongoli teminya sanu mombongi uma'o eikubur antau mongembei teminya eibatang niYesus. ² Titieleo tutuu eieleo pabibia teduminggu he'ua, watu teeleo nesuvungo, uma'omo siira eikubur. ³ Siira ne'u'utanyaong, "Sisee mondulina tevatu he'ua lamai tebamba nukubur antau si'ami maala mentama?" ⁴ Tapi watu siira najaok, siira ne'ita tevatu he'ua dinulingo. Tevatu he'ua nooge tututuu. ⁵ Lamai he'ua siira nentama eilalong nukubur ane siira ne'ita sotoo sanu molumbi. Siia nepake tejuba sanu memeas ane nongodung eisabata nu'oanong. Siira tututuu nobule. ⁶ Tapi tetoo sanu molumbi he'ua nonjarita eisiira, "Inyaa mobule! si'emiu nelolo siYesus tetoo nuNasaret, sanu sinalipa he'ua. Siia pinetuvumo. Siia jio umai eiri'ini. Itai! Eiri'inimo Siia inembea. ⁷ Tapi nyapoeini na'omo, ulara'omo eisiPetrus ane temurit-murit ntaninya, Siia mongaliurui si'oo uma'o eiTana nuGalilea. Ampi he'ua si'emiu netepojaok Siia, sima sanu inulara'o-Nya eisi'emiu." ⁸ Lamai he'ua siira nesuvung ane nelinjok nolinjo'i tekubur he'ua, karna siira gugugur ane neherang. Siira jio nongulara'onya tesapa-sapa eisisee-see karna nobule. [Siira nongulara jojoo tetutuunong he'ua eisiPetrus ane tetagu-tagunya. Touk he'ua siYesus mboto nonuju temurit-murit-Nya nokarevaa lamai teTimur uma'o teBarat tekareva sanu mapacin ane jio motou-touk sima te'asasalamat sanu seende-endenya he'ua.] ⁹ Touk siYesus nembaung lamai te'amateong titieleo eieleo nuduminggu he'ua, Siia pabibia nopo'ita eisiMaria Magdalena, sanu luulu siYesus nombugo pitu'alus sanu majaat. ¹⁰ Lamai he'ua, siMaria uma'o ane nongulara tesapa sanu najari eitoo-too sanu concoono Siia luulu. Tetoo-too he'ua noondong ane notumangis karna te 'amateong-Nya. ¹¹ Tapi watu siira ne'eepe siYesus netuvu ane Siia inita niMaria, siira jio nomarcaya tejaritanya. ¹² Lamai he'ua siYesus nopo'ita eirotoo tetoponuut-Nya tapi telio-Nya tantani, pepees siira nelampa nesuvung lamai tekota. ¹³ Lamai he'ua siira uma'o ane nongulara eimurit-murit-Nya sanu ntaninya sima tegauk he'ua. Tapi temurit-murit-Nya sanu ntaninya jio nomarcaya. ¹⁴ Lamai he'ua siYesus nopo'ita eisompulu sotoo temurit-Nya pepees siira nenginang. Siia noncala siira karna siira jio nomarcaya ane ma'adal teambok niira. Maampo umai tetoo-too sanu ne'ita Siia touk Siia pinetuvu nu'Alata'ala lamai te'amateong, temurit-murit jio nomarcaya tetoo-too he'ua. ¹⁵ Lamai he'ua siYesus nongulara eimurit-murit-Nva, "Na'omo eijojoo tepomoiaong eijuniaa ane mokarevaa teKareva sanu Mombosi eijojoo temanusia. ¹⁶ Sisee-see momarcaya eiSia'u ane nobaptis kana nosalamata nu'Alata'ala. Siira jio nohukum karna tedosa niira. Tapi sisee-see jio momarcaya kana nohukum. ^{18 17} Tetoo-too sanu momarcaya kana monggauka tetanda-tanda sanu monujua tekuasa nu'Alata'ala umai eisiira: Siira kana mombugo te'alus - alus sanu majaat mesuvung lamai tetoo-too nepake te'ababaraka lamai tetope'U. Siira kana monjarita tebasa-basa sanu jiompo nopegurui niira. Siira kana mondiit tesaa ane menginung tebisa sanu ma'apate, tapi tesaa ane tebisa he'ua jio mesilaka siira. Tetoo-too sanu momarcaya eiSia'u kana monggama tetoo-too sanu nepees ane siira kana nope'eondok." ¹⁹ Touk Siopu Yesus nonjarita eimurit-murit-Nya, Siia neteengkat uma'o eisuruga ane Siia nongodung eisabata nu'oanong nu'Alata'ala ane nomarentaa concoono Siia. ²⁰ Lamai he'ua siira nesuvung nokarevaa teKareva sanu Mombosi eitoo-too eipapaio. Siopu Yesus nokarajaa concoono siira ane nombeena tekuasa eisiira nonggauka tetanda-tanda sanu mabaraka antau nonujua teKareva he'ua tutuu.