¹ Watu he'ua najaok mabari tetoo neincong ane siira jio umai o'aniong.SiYesus noleva temurit-murit-Nya ane nonjarita, ² Noondong teamboKu eipenconong nutoo nabari eini, karna tolueleomo siira cocoono Sia'u ane siira jio o'aniong. ³ Ane siira Utuju metencile eivonua niira watu moorok,siira metinong eijalang karna umai sanu najaok lamai teavar." ⁴ Temurit-murit-Nya nonyimbat,"Iama'o eitana sanu moodoy eini tetoo maala mombee siira teroti jaok movosu?" ⁵ Lamai he'ua Siia no'utanya eisiira," Umai so'uyabua teroti eisi'emiu?" Nonyimbat siira, "Pitubua." ⁶ Lamai he'ua siia nonuju tetoo mabari he'ua nongodung eitana.Touk he'ua Siia nongala pitubua teroti he'ua.nonggane,tinotompignya ane nombeena'onya eimurit-murit-Nya antau siira motilala'onya eitoo mabari. ⁷ Temurit-murit niYesus valii umai soso'uya tebau sanu mede'i ,ane touk nonggane,Siia nonuju motilala'onya valii. ⁸ Jojootetoo nenginang jaok novosu.Lamai he'ua siira nangincona tetoro,te'ababarinya pitu karanji. ⁹ Terekenong niira kira-kira apaributoo. Lamai he'ua siYesus nonuju siira petencilemo. ¹⁰ Siia selengaan nesave eipayangan concoono temurit-murit-Nya ane nelengkat eiTana nuDalmanuta. ¹¹ Lamai he'ua najaok tetoo-too nuVarisi ane nompamula nebabatanong concoono siYesus. Siira nomongi lamai Siia tetanda mabaraka lamai tesuruga antau siira maala mo'otoi Siia lamai te'Alata'ala. ¹² Lamai he'ua Siia neambok nooge ane no'utanya, " Nete'uya tetoo-too sanu netuvu watu eini nomongi tetanda? Tutuunya Sia'u nonjarita eisi'emiu, eitoo-too sanu netuvu watu eini jio umai vieena tetanda." ¹³ Siia nolinjo'i siira ane nesaveonye tepayangan concoono temurit-murit-Nya ane nelengkat uma'o eisantava nuBonto nuGalilea. ¹⁴ Temurit-murit niYesus nelingani nongomung teroti, boi sobua teroti sanu umai eisiira eilalong nupayangan. ¹⁵ Lamai he'ua siYesus nolambota siira, " pa'ajaga-jaga ane pombosi teragi nutoo-too nuVarisi ane teragi niHerodes." ¹⁶ Siira nejajaritaong, " Siia nonjarita sima he'ua, karna si'ita jio umai oroti." ¹⁷ watu siYesus mo'otoi tesapa sanu inulara niira, siia nongular, " Nete'uya si'emiu nongular jio umai oroti? Tutuu, si'emiu jiompo mo'otoi tebatuanya tesapa sanu Uulara! Najarimo neteompot teambok ni'emiu? ¹⁸ Si'emiu omata. Si'emiu jio ne'ita? Si'emiu otelinga. Si'emiu jio ne'eepe? Jio si'emiu nolambotonye, ¹⁹ Watu sia'u nononompiga limabua teroti tinilala'onya eilimaributoo he'ua? So'uyakaranji nobu'e tetoronya inincona ni'emiu?" Nonyimbat siira, "sompulu rokaranji." ²⁰ SiYesus nonjaritaonye, "Watu pitubua teroti tinilala'onya apaributoo he'ua, so'uyakaranji nobu'e tetoronya inincona ni'emiu?" Nonyimbat siira, "pitukaranji." ²¹ Lamai he'ua inular-Nya eisiira, "Jiompo mo'otoi si'emiu?" ²² Lamai he'ua najaoko siYesus ncoono temurit-murit-Nya eiBetsaida. Lamai he'ua tetoo-too nonggomung eisiYesus sotoo sanu nobuta ane siira nomongi Siia nonggama tetoo sanu nobuta he'ua. ²³ SiYesus nondiit telima nutoo sanu nobuta he'ua ane nongomung siia nesuvu lamai tekampung. Lamai he'ua Siia nenyuui temata nutoo he'ua ane nongombea telima-Nya eibabonya, ane no'utanya eisiia, "Initamo ni'oo, tesapa-sapa?" ²⁴ Tetoo he'ua nonyilig eitolo, lamai he'ua nonjarita, "Sia'u ne'ita tetoo-too tapi jio bega mapatas sima tepuu-puu sanu lalampa." ²⁵ SiYesus nongembea'onye telima-Nya eimata nutoo he'ua, lamai he'ua tetoo neita tututuu ane pine'eondak, ane siia ne'ita mapatas jojoo tesagara. ²⁶ Lama he'ua siYesus nongular eisiia, "Petencilemo, tapi inyaa mentama eikampung he'u. Inyaa mongular eitoo-too sanu najarimo eiri'ini." ²⁷ Lamai he'ua siYesus concoono temurit-murit-Nya uma'o eikampung-kampung sanu mo'osuk teKota nuKaisarea Pilipi. Pepees nelampa Siia no'utanya eimurit-murit-Nya, "Inular nutoo, sisee Sia'u eini?" ²⁸ Nonyimbat siira eiSiia, "Umai sanu nongulara, 'SiYohanes teTopombaptis netuvuonye,' sanu ntaninyannongulara, 'SiNabi Elia najaokonye,' sanu ntaninya valii nongulara, 'sotoo lamai tenabi-nabi luulu mai.' " ²⁹ Siia no'utanya eisiira, "Tapi tesapa inular ni'emiu, sisee Sia'u eini?" Nonyimbat siPetrus, "Si'oo teKristus, tepuang sau tinuju nu'Alata'ala mopa'asalamat tetoo!" ³⁰ Lamai he'ua siYesus nonyimpang tututuu antau inyaa mongulara eitoo ntaninya Siia. ³¹ Lamai he'ua nompamulamo siYesus nomagurua eisiira teUnga nuManusia kanaboi mabari masesa ane jio notarima nutopomimpin-topomimpin nuYahudi, te'olongian-olongian nu'imam ane teguru-guru nuhukum nu'Alata'ala. Lamai he'ua nopatei ane metuvuonye eitolueleonya. ³² Tesaba eini Siia nopa'apatas. Tapi siPetrus nondiit ane nongomung siYesus lamai tetoo-too ntaninya ane nompamula nonyimang Siia. ³³ Lamai he'ua siYesus negois ane pepees nongongontong temurit-murit-Nya Siia nonyimang siPetrus, "Na'omo si'oo, tepuang nuseetan. karna si'oo jio nomikira tesapa sanu pinikira nu'Alata'ala, boi sanu pinikira numanusia." ³⁴ Lamai he'ua siYesus noleva tetoo mabari ane temurit-murit-Nya ane nonjarita eisiira, " Ane sotoo seilu monuut Sia'u, siia kanaboi molapasa te'eseseilunya mboto, monyumbi tesalipnya ane monuut Sia'u. ³⁵ Karna sisee-see seilu mopa'asalamat tepeetuvunya, siia kana me'ilang tepeetuvu seende-endenya. Tapi sisee-see ne'ilang tepetuvunya karna Sia'u ane teKareva sanu Mombosi, siia kana monarima tepeetuvu seende-endenya. ³⁶ Jio umai ogunanya sotoo na'aala jojoo tesagara eijuniaa tapi siia ne'ilang tenyaanya. ³⁷ Jio umai tesapa sanu maala noveena'onya sima tebolos nunyaanya. ³⁸ Si'emiu nomoia eitatanga nutoo-too eini sanu jio nesetia ane majaat.Sisee-see mesili mongaku siira monut Siau ane tepangajaru,teUnga nuManusia vali mesili mongaku teto'o he'ua tetoponuut-Nya watu siia najaok concono temalaekat-malaekat nu'Alata'ala.Watu he'ua, siia majaok concoono te'ababaraka Niama-Nya."