¹ Lamai he'ua siYesus nelengkat lamai tevonua niYairus concoono temurit-murit-Nya netencile eiKampung nuNasaret, tekampung niYesus. ² Watu teeleo pengondok nutoo-too nuYahudi, siYesus nomagurua tetoo-too nuYahudi eipongganeong nuYahudi. Mabari tetoo-too sanu ne'eepe neherang ane siira no'utanya, "Iama'o siYesus mo'otoi tejarita nu'Alata'ala? Iama'o siia najari napande sima eini? Nete'uya siia maala nongauka tegauk-gauk sanu mabaraka?" ³ "Siia boi tebaas nu'ayu. siia teunga nimaria ane teasia'a niYakobus, niYoses, niYudas, ane niSimon. Tetuai-tuai-Nya bengkel nomoia eiri'ini concoono si'ita." ⁴ Lamai he'ua siYesus nongulara eisiira, "Tetoo nunabi, sima Sia'u, inoongkoi eipapaio tapi eikampung mbotonya ane eitatanga nurururusnya ane eivonuanya jio inoongkoi!" ⁵ Siira jio nomarcaya eiSiia. Karna he'ua siYesus jio maala nonggauka mabari tegauk sanu mabarata eiri'ua. Siia boi nongembea telima-Nya eibabok lasiatoosanu nepees antau nepe'eondok tepees niira. ⁶ SiYesus neherang karna tetoo-too jio nomarcaya eiSiaa. Lamai he'ua siYesus concoono temurit-murit-Nya umao papalit eikampung tetoo-too sanu mo'osuk teKampung nuNasaret, ane nomagurua tetoo-too sima tejarita nu'Alata'ala. ⁷ Lamai he'ua siia noleva sompulu rotoo temurit-Nya, ane nonuju siira nesuvung rorotoo. jijiompo siira nelengkat, Siia nombenii siira te'ababaraka mombugo te'alus-alus sanu majaat nesuvung lamai tetoo-too. ⁸ Siia nonuju siira inyaa mongomung tesapa eijalang, boi teto'on, inyaa mongomung tevalung, tepongkolonong tesasagara, atau tedoi. ⁹ Siira maala mepake tesandal, tapi inyaa mongomung pebolosong. ¹⁰ Lamai he'ua siYesus nonjarita eisiira, "Ane si'emiu najaok eisakampungnya ane umai tetoo sanu monarima si'emiu, pomoiamo ampi he'ua jaok si'emiu melengkat lamai tekampung he'ua. ¹¹ Ane tetoo-too jio seilu monarima si'emiu ane siira jio seilu mo'inepea tepangajar ni'emiu, pelengkato lamai tekampung he'ua ane pe'elivaso teavu lamai te'obal nupaa ni'emiu. Monggauka he'ua sima tesabi eisiira te'Alata'ala jio masanang eigauk niira." ¹² Lamai he'ua siira nolinjo'i Siia, nokarevaa eitoo-too, siira kanaboi matoba. ¹³ Temurit-murit niYesus valii nombugo mabari te'alus-alus sanu majaat nesuvung lamai tetoo-too ane nolatabi telatab nusaitun eiva'i nutoo bari sanu nepees ane nepe'eondok tepees niira. ¹⁴ Watu he'ua tePuang siHerodes ne'eepe sima siYesus karna mabari tetoo nonjarita sima sanu ginauka 'o-Nya. Umai tetoo-too sanu nongulara sima siYesus, "siYohanes teTopombaptis pinetuvumo nu'Alata'ala lamai te'amateong! He'ua sabanya Siia maala nonggauka tegauk-gauk sanu mabaraka." ¹⁵ Tetoo-too sanu ntaninya nongulara sima siYesus, "Siia siNabi Elia sanu netencile eijuniaa lamai tesuruga!" Umai ntaninya sanu nongulara, "Siia sotoo tenabi sima sotoo tenabi lamai watu luulu mai." ¹⁶ Watu siHerodes ne'epe tesapa sanu inulara nutoo-too sima siYesus, siia nongular, "Siia siYohanes teTopombaptis sanu inologa teva'inya nutantara'u. Siia pinetuvu nu'Alata'ala lamai te'amateong!" ¹⁷ SiHerodes nomikir sima he'ua karna siHerodes nonuju tetantaranya ane siira nera'op siYohanes ane siia pinungui eipanjara. SiYohanes ira'op karna tinuju niHerodias, karna siHerodes nolapi siHerodias watu siHerodias ulengi telapi niPilipus, terurus niHerodes. ¹⁸ SiYohanes kalepu nongular eisiHerodes, "Si'oojio maala molapi telapi niPilipus, terurus ni'oo!" ¹⁹ Karna he'ua siHerodias nengkeles eisiYohanes ane seilus momate siia. Tapi siHerodias jio mataannya monggauka tegauk he'ua, ²⁰ Karna siHerodes noluju tetantara monjaga siia ilalong nupanjara. Siia nobule momate siYohanes karna siia mo'otoi siYohanes tetoo sanu mondolong ane mapacing. Watu siHerodes ne'eepe siYohanes, nabalesa tutuu karna tesapa sanu inulara'onya, tapi siHerodes masanang teambok ne'eepe siYohanes. ²¹ Ponou'ongnya te'eseseilu niHerodias maala majari. Siia maala monuju momate siYohanes. SiHerodes nogutu tepesta nolambot teeleo poguunga siia. Siia nongundang tetoo-too sanu opangka eipomarentanya, ane tetopongomung nutantaranya ane tetoo-too sanu makaya malaai teTana nuGalilea. ²² Watu tepesta he'ua teunga bengkel niHerodias nentama eipesta ane nonari eitolo niHerodes ane tetamu-tamunya. Tetarian nurandaa he'ua nopa'sanang teambok niHerodes ane tetamu-tamunya. SiHerodes nongular eirandaa he'ua, "Pomongimo eisia'u tesapa sanu seilu ni'oo, sia'u mombeena eisi'oo." ²³ Lamai he'ua siHerodes nesumpa eirandaa he'ua, "Sia'u mombeena eisi'oo tesapa sanu nopomongi ni'oo eisia'u. Si'oo maala momongi jaok santanga lamai tepomarentaongu." ²⁴ Lamai he'ua terandaa he'ua nolinjo'i tepesta he'ua ane no'utanya esiinanya, "Tesapa sanu upomongi?" Siinanya nonyimbat, "Pomongimo teva'i niYohanes teTopombaptis." ²⁵ Selengaan siia lolongkang nentama uma'o nopotolo eisipuang ane nomongi, "Sia'u seilu nyapoeini si'oo mombeena eisia'u teva'i niYohanes teTopombaptis eibabok nubaki!" ²⁶ Lamai he'ua tututuu noondong teambok nupuang, tapi siia jio seilu malabat tesumpanya karna tetamu-tamunya ne'epe tesumpanya. ²⁷ Tepuang selengaan nonuju sotoo tetoponyambale mongala teva'i niYohanes. Tetoo he'ua uma'o ane nonyambale teva'i niYohanes eipanjara. ²⁸ Tetoponyambale he'ua nongomung teva'i he'ua eisombo'a tebaki ane vineena'onya eirandaa he'ua. Siia valii nombeena eisiinanya. ²⁹ Watu temurit-murit niYohanes ne'eepe tegauk he'ua siira najaok ane nongala tebatangnya, lamai he'ua dinulina'onya eilalong nukubur. ³⁰ Lamai he'ua tetoo-too sanu tinuju niYesus netencle lamai tepelampaong. siira neincong concoono siYesus ane nongulara eiSiia jojoo sanu ginauka ane pinagurua niira. ³¹ Lamai he'ua siia nonjarita eisiira, "Maemo si'ita molinjo'i tepeinconong nutoo ane montani eitana sanu modooy, ane mengundok sampalai!" Siira jio maala menginang, karna nabari tetoo sanu najaok ane sanu uma'o. ³² Lamai he'ua siira nasave tepayangan ane uma'o eitana sanu noodoy. ³³ Tapi watu siira nelengkat, nabari tetoo ne'ita ane mo'otoi tetolo nupayangan niira. tetoo-too lamai jojoo tekampung eitana he'ua nelampa nolongkang eibaowan nongaliurui siira. ³⁴ Watu nenyau lamai tepayangan, siYesus ne'ita tetoo nabari neincong, noondong teambok-Nya eisiira, karna siira sima tedomba sanu ijo otopomiara. lamai he'ua nompamula siia nomagurua nabari tesaba eisiira. ³⁵ Watu nompamulmo mondoung, najaoko temurit-murit-Nya eiSiia ane nongular, "Tetana einimoodoy ane nompamulamo mondoung. ³⁶ Tujumo siira uma'o eikampung-kampung sanu mo'osuk eini, antau siira maala mongoli te'aniong niira." ³⁷ Tapi sinambati-Nya, "Si'emiu kanaboi mombenii siira menginang!" Inulara eiSiia, "Tesapa sanu noveena eisiira? ane si'ami mongoli teroti, teolinya rogatus dinar." ³⁸ Tapi siia no'utanya eisiira, "So'uya teroti sanu umai eisi'emiu? Arai paresa!" Touk siira nomaresa siira nongular, "Limabua teroti ane rombaang tebau.' ³⁹ Lamai he'ua siia nonuju jojoo tetoo he'ua mongodung seselibok eibabok nugugus sanu monobulung. ⁴⁰ Siira nongodung seselibok, umai sanu sagatustoo, ane umai sanu limampulutoo. ⁴¹ Touk nongala limabua teroti ane rombaang tebau he'ua, Siia nopongaring eilangit ane nonggane. Lamai he'ua Siia nonomping-nomping teroti he'ua ane nombeena'onye eimurit-murit-Nya, antau nototolala'onya eitoo-too he'ua. Sima he'ua valii siia notitila'onya rombaang tebau eisiira jojoo. ⁴² Siira jojoo nenginang jaok novosu. ⁴³ Lamai he'ua siira nongincona tetoro nuroti ane nubau te'ababarinya sompulu rokaranji nobu'e. ⁴⁴ Sanu menginang teroti he'ua umai limaributoo langkai. ⁴⁵ Touk he'ua siYesus nonuju temurit-murit-Nya nesave tepayangan ane melengkat mongaliuru eisantava eiBetsaida, pepees he'ua Siia nonuju tetoo bari metencile. ⁴⁶ Touk ne'a'antaong lamai siira, Siia uma'o eibuut ane nonggane. ⁴⁷ Watu nondoungo, tepayangan murit-murit niYesus umaimo eitatanga nubonto, pepees siYesus nomoia simotoonya eibaowan. ⁴⁸ Watu he'ua Siia ne'ita siira nandasa nongkaung karna nongeva tebarat. lamai he'ua kira-kita ati totolu ndoungnya Siia najaok eisiira nelampa eibabok nuogo ane seilu molabata siira. ⁴⁹ Watu siira ne'ita siia melampa eibabok nuogo, siira nomikir siia he'ua te'alus, ane siira neroroa, ⁵⁰ Karna siira jojoo ne'ita sia ane siira tututuu nobule. Tapi selengaan Siia nongular eisiira, " Pa'asanang teambok! Eini Sia'u, inyaa nobule!" ⁵¹ Lamai he'ua Siia nasave tepayangaan niira, ane tebarat nengondok. Siira tututuu netetarigut, ⁵² karna siira jiompo valii mo'otoi te'ababaraka niYesus. maampo nongitamo siYesus nogutu mabari teori he'ua, siira nabata-bata momarcaya eisiYesus. ⁵³ Watu siYesus ane temurut-murit-Nta oma'o eisantava, siira najaok eibaowan nuGenezaret ane nonavua tetapu eiri'uan. ⁵⁴ Watu siira nenyau lamai tepayangan, tetoo-too selengaan mo'otoi siYesus. ⁵⁵ lamai he'ua siira nelinjok uma'o eikampung-kampung sanu mo'osuk. Siira nompamula nevuntu tetoo-too nepees eibabok nubailnya eipao siira ne'eepe siYesus ampi he'ua. ⁵⁶ Eipapao Siia uma'o eikota-kota atau eikampung-kampung, tetoo-too nongembea tetoo-too sanu nepees eipasar ane nomongi eiSiia, atau siira maala monyompul maampo boi tetampak nubaju-Nya. Jojoo tetoo sanu nonyompul-Nya, tepees niira neondok.