¹ SiYesus concoono temurit-murit-Nya najaok eisantava nuBonto nuGalilea eitana nutoo-too nuGerasa. ² Touk siYesus nenyau lamaitepayangan,sotoo telankai sanu pinentamai nu'alus sanu majaat najaok lamai pekuburong nolaboti siYesus. ³ Tetoo he'ua nomoia eipekuburong.Tetoo-too nonyo'arai nomungui siia,tapi siia no'uig tutuu,maampo nepake terante,jio umai sotoo maala nomungui siia. ⁴ Karna nabari ngkaningo tetoo-too nomungui telima ane tepaanya nepake terante ,tapi terante he'ua inuduta'onya.Jio otoo sanu mo,uig nera,op siia. ⁵ Eleo ndoung siia umai eipekuburong he'ua ane eibubuut oroa-roa ane nombobogi te'alaenya nepake tevatu. ⁶ Lamai he'ua siia ne'ita siYesus lamai te'avarong,siia nelinjok, ane nopotu'u eitolo niYesus nonujua te'o'ongkonya. ⁷ Tetoo he'ua neroroa, " Yesus teUnga nu'Alata'ala sanu mabaraka, nete'uya Si'oo najaok eisia'u? sia'u nomongi Si'oo mojanji ei'Alata'ala, inyaa Si'oo monyesai sia'u!" ⁸ SiYesus nongular eisiia, "Te'alus sanu majaat, pesuvungo lamai tetoo eini!" ⁹ SiYesus no'utanya eisiia, "Sisee tetopemu?" Siia nonyimbat, "Tetope'u siLegion karna si'ami nabari." ¹⁰ Lamai he'ua siia nomongi tutuu eisiYesus antau Siia jio monuju siira mesuvung lamai tetana he'ua. ¹¹ Eibuut he'ua umai tepeinconong nuvavi sanu mabari pepees nonyumt. ¹² Siira nomongi eisiYesus, "Tujumo si'ami mentama eilalong nivavi-vavi he'ua, patuvayaa si'ami mentamainya!" ¹³ Lamai he'ua siYesus nomatuvaya te'alus-alus sanu majaat nesuvung lamai tetoo he'ua ane nentama eilalong nuvavi-vavi he'ua, nelinjok nenyau eipampang uma'o eilalong nubonto. Tevavi-vavi naate eilalong nubonto. ¹⁴ Tetoo-too sanu nomiara tevavi-vavi he'ua ne'ita sanu najari he'ua siira nelinjok eikota ane eijo'ong-jo'ong. Siira nongulara eitoo-too tesapa sanu najari. ¹⁵ Tetoo sanu mabari he'ua najauk eisiYesus ane siira ne'ita tetoo sanu pinentamai nu'alus sanu majaat. Siia nongodung odo-odoy, nepakeano ane ne'epikirano sanu nonoto. lamai he'ua siira najaari nobule. ¹⁶ Tetoo-too sanu ne'ita sanu nnajarimo, nongulara eitoo mabari tesapa najarimo eitoo pinentamai. siira valii nonngulara tesapa sanu najari eivavi-vavi he'ua. ¹⁷ Tetoo-too lamai tekota he'ua nomongi siYesus molinjo'itetana niira. ¹⁸ Lamai he'ua siYesus nesave tepayangan, tetoo sani pinentamai nu'alus sanu majaat he'ua nomongi eisiYesus antau siia maala monuut concoono siYesus. ¹⁹ Tapi siYesus jio nombeena siia monuut. SiYesus nongular eisiia, "Na'omo eivonuamu ane ulara eirurusmu jojoo sanu ginauka nuSiopu Alata'ala eisi'oo ane iama'o Siia nongagalani eisi'oo." ²⁰ He'uapa tetoo he'ua uma'o eiTana nuDekapolis nokarevaa eitoo-too jojoo tegauk sanu ginauk niYesusneisiia. Jojoo tetoo sanu ne'eepe neherang. ²¹ Touk siYesus ane temurit-murit-Nya nesave ane netencile uma'o eisantava nuBonto nuGalilea, mabari tetoo neincong eipapalit niYesus. Watu Siia eipipit nubonto he'ua, ²² najaok sotoo tetopomimpin nupongganeong nuYahudi, tetopenya siYairus. Watu siia ne'ita siYesus, siia nopotu'u no'osuk eipaa-Nya ²³ ane nomongi tutuu eisiYesus, " Teunga bengkelu nepees novoat. Maemo concoono sia'u uma'o eivonua'u ane monggamai siia antau siia nopa'asalamat ane tetaap netuvu!" ²⁴ He'uapa siYesus ane temurit-murit-Nya nelengkat concoono siYairus uma'o eivonuanya. pepees siira nelampa, nabari tutuu tetoo nonuut siYesus ane siira neipipitong eipapalit niYesus. ²⁵ Umai valii sotoo tebengkel eipeinconong nutoo he'ua sanu nasesa sompulu rontoung inanggasi nuraa lamai te'oungaong. ²⁶ Siia nasesa tutuu, inomung eidokter-dokter ane nonouka jojoo tedoinya nombayar siira, ane jio umai na'aala tesasapa, tapi boi nelabi nepees. ²⁷ Karna siia ne'eepe siYesus nepe'eondok tetoo-too, lamai tatangga tepeinconong nutoo he'ua siia nongosu'i lamai eite'e niYesus. lamai he'ua siia nonggama tebaju niYesus. ²⁸ He'ua ginauka'onya karna siia nongular eilalong nuamboknya, "Ane sia'u monggama tebaju-Nya, sia'u meondok." ²⁹ Watu siia nonggama tebaju niYesus, teraanya selengaan neondok ane irasainya eilalong nu'alaenya tepeesnya neondok. ³⁰ Watu irasai niYesus umai te'uig nesuvung lamai te'alae-Nya nepe'eondok, Siia negois nongita eipeinconong nutoo he'ua ane no'utanya eisiira, "Sisee nonggama tebaju'U?" ³¹ Temurit-muri-Nya nongular eisiYesus, "Si'oo ne'ita tepeinconong nutoo sanu neipipitong eipapalit ni'oo. Nete'uya Si'oo no'utanya, 'Sisee nonggama sia'u?' Karna nabari tetoo nonyompul si'oo." ³² Tapi siYesus nonyiling tarus papalit nelolo tetoo sanu nonggauka'onya. ³³ Tebengkel he'ua nobubuleong ane gugugur, siia mo'otoi siYesus nepe'eondok. siia najaok nopotu'u eitolo niYesus. Siia nongulara eisiYesus, siia sanu nonggamanya-Nya ane neondok. ³⁴ Lamai he'ua siYesus nongular eibengkel he'ua, "Teaparcayaaongmunnepe'endok si'oo. Petencile eilalong nu'ombombosiong. si'oo jio mepeesonye sima he'ua." ³⁵ Watu siYesus nongular eibengkel he'ua, lasiatoo najaok lamai tevonua niYairus ane nonjarita eisiYairus, " Teungamu naatemo. Jio porluu si'oo monggoyonionye siYesus ane moleva uma'o eivanuamu!" ³⁶ Tapi jio tinotoli niYesus tekareva niira ane nongular eisiYeirus, "Inyaa mobule, parcay boi eiSia'u." ³⁷ SiYesus nonarusa tepelampa-Nya uma'o eivonua niYairus, tapi siYesus jio nombee tetoo ntaninya monuut siira. Boi siYakobus ane siYohanes montolituai, ane siPetrus maala monuut. ³⁸ Siira najaok eivonua niYairus, siYesus ne'ita tepeinconong nutoo ane ne'eepe tetoo-too no'ogoriok ane notumagis noporos. ³⁹ SiYesus nentama eilalong nuvonua he'ua ane siia nonjarita eisiira, " Nete'uya si'emiu no'goriok ane notumagis? Teunga eini jio naate, tapi no'oturu." ⁴⁰ Tapi siira nengisii siYesus karna niira teunga he'ua naatemo. Lamai he'ua siYesus nonuju jojoo tetoo nesuvung lamai tevonua he'ua, ane tolutoo temurit-Nya sanu concoono siia nentama eilalong nukmar nuunga he'ua. ⁴¹ SiYesus nindiit telima nuunga he'ua ane nongular eisiia, " Talita ku," sanu tebatunya " Lei, Sia'u nongular eisi'oo, pembaungo!" ⁴² Selengaan teunga bengkel he;ua nembaung ane nelampa, karna te'umurnya sompulumo rontoung. Jojoo tetoo sanu umai eiri'ua neherang tutuu. ⁴³ Tapi siYesus nontuuna tutuu eisiira antau inyaa luulu mokareva eito ntaninya tesapa sanu ginauka'o-Nya. Lamai he'ua siYesus nonuju siira mombenii te'aniong eiunga he'ua.