¹ Lamai he'ua siYesus nompamula nomaguruonye eipipit nuBonto nuGalilea. siia nesave tepayangan karna nabari tutuu tetoo neincong aisevi-Nya Siia nongodung eilalong nupayangan eibonto. Siia maala momaguru siira. Jojoo tetoo he'ua ne'oro eibaowan eipipit nubonto. ² SiYesus nomaguru nabari tepangajar eisiira nepake tepogurapanong. Lamai he'ua siia nonjarita eisiira eilalong nupangajar-Nya, ³ "Po'inepea tejarita eini. Umai tetopongambur uma'o nongambura. ⁴ Pepees siia nongambur, sanggaat tevu'u nugando he'ua nanavu eijalang. Lamai he'ua temamanuk najaok nenginangnya. ⁵ Umai sanggaat nanavu eitana sanu menimpis ane ovatu-vatu. Nolongkang tevu'u nugando he'ua netuvu, karna tetana he'ua menimpis. ⁶ Tapi watu teeleo noondako, tetutudaong he'ua nalante ane naate, karna jio umai arari melenda. ⁷ Umai sanggaat nanavu eiolot nuvumbu nurui, lamai he'ua tevumbu nurui he'ua netuvu ane inipitinya jaok tetutudaong he'ua jio nevua. ⁸ Umai sanggaat nanavu eitana sanu nombosi. sanggaat he'ua netuvu norumbang ane nevua. Umai sombu'u ngajari sagatusmbu'u." ⁹ Touk nonjarita tepogurapanong he'ua, siia nonjarita, "Jojoo tetoo po'inepea tututuu tejarita'U!" ¹⁰ Lamai he'ua watu tepeinconong nutoo netencilemo, tetoo-too concoono siYesus, ane sompulu rotoo temurit-Nya, no'utanya eiSiia tebatua nupogurapanong sanu jinaritaa'o-Nya eisiira. ¹¹ SiYesus nonjarita, "Si'emiu inulara sima tepomarenta nu'Alata'ala, tapi ulengi sinoyoka lamai tetoo-too sanu ntaninya. Eisiira Sia'u nepake tepogurapanong mongulara sima tepomarenta nu'Alata'ala. ¹² Antau najarimo sanu tinulis eijarita nu'Alata'ala, 'Siira nongingita nengkaning-kaning tesapa sanu Ugauka tapi jio me'ita. Siira ne'eepe nengkaning-kaning tesapa sanu Uulara tapi siira jio mo'otoi tebatuanya. Antau siira jio matoba ane jio no'ampuni nu'Alata'ala.' " ¹³ Lamai he'ua siYesus no'utanya eisiira, ''Si'emiu jio mo'otoi tebabtuanya tepogurapanong eini? Ane sima he'ua, iama'o si'emiu mo'otoi tebatuanya jojoo tepogurapanong sanu ntaninya? ¹⁴ Sia'u mongulara tebatuanya eisi'emiu. Tetopongambur he'ua sima sotoo sanu nongulara tejarita nu'Alata'ala. ¹⁵ Umai tetoo-too sima tevu'u sanu inambura eijalang. Siira ne'eepe tejarita nu'Alata'ala. Selengaan tepuang nuseetan najaok nogutu siira nelingani tejarita sanu inulara eisiira. ¹⁶ Umai tetoo-too sima tevu'u sanu inambura eitana sanu ovatu-vatu. Siira ne' eepe tejarita he'ua, selengaan siira nomarcaya ane nadandalan. ¹⁷ Tapi siira jio umai te' aparcayaong sanu mo'uig, sima tetutudaong sanu jio arari, ane boi nontaang sampalai. Watu siira masesa atau jinajaati karna nomarcaya terjarita he'ua siira selengaan jio nomarcayaonye terjarita nu'Alata'ala. ¹⁸ Umai tetoo-too sima tevu'u sanu inambura ietanga nuvumbu nurui. Siira ne'eepe tejarita nu Alata'ala, ¹⁹ tapi siira nogoyong, nomikira te'otutuvu niira eijuniaa eini. Siira boi seilu mongincona tesasagara nujuniaa eini, ane nabari nengangaya te' eseseilu umai eilalong nuambok niira. Karna siira nogoyong, siira nongelingana tejarita nu'Alata'ala. Siira jio nonggauka te'eseseilu nu'Alata'ala. ²⁰ Umai tetoo-too sima tevu'u sanu inambura eitana sanu nombosi. Siira ne'eepe tejarita nu'Alata'ala, ane nomarcayainya lamai he'ua siira netuvu sima tetudaong sanu nohasila nabari. Umai sanu tolumpulungkaning te'ababarinya, ane ntaninya onompulukaning te'ababarinya, ane ntaninya sagatuskaning te'ababarinya." ²¹ Lamai he'ua siYesus nonjarita eisiira, "Tetoo jio mongembea tetoga sanu vinaa eiangkop nu'urong atau eiangkop nupo'oturuong, tapi mongembea eibabok nupongembeong nutoga antau jojoo tetoo maala me'ita. ²² karna jojoo sanu sinoyoka sima tepomarenta nu'Alata'ala nopo'itaa. Jojoo sanu irahasiaa noulara. ²³ Jojoo tetoo po'inepea tututuu tejarita'U!" ²⁴ Lamai he'ua siYesus nonjarita eisiira, "Pikira mombosi tesapa sanu inepe ni'emiu lamai sia'u. Ane si'emiu tututuu nomikir tesapa sanu Upagurua eisi'emiu, te'Alata'ala mogutu si'emiu mo'otoi tebatuanya. Lamai he'ua te'Alata'ala mogutu melabi mabari mo'otoi! ²⁵ Tetoo-too sanu mo'otoi ane nonuuto tesapa sanu inepe lamai Sia'u, te'Alata'ala mogutu siira melabi mabari mo'otoi. Tapi tetoo-too sanu jio mo'otoi ane jio nonuut tesapa sanu inepe lamai sia'u, sanu siira mo'otoi no'elingani niira." ²⁶ Lamai he'ua siYesus nonjarita eisiira, 'Tepomarenta nu'Alata'ala sima sotoo sanu nongambura tevu'u-vu'u nugando eitana. ²⁷ siia no'oturu ndoungnya ane eleonya siia nembaung. E'endenya he'ua tevu'u-vu'u nugando he'ua nonyuvuna teumbuk ane teumbuk he'ua noniang napangkat. Tapi tetopongambur jio mo'otoi tesapa sanu nogutu tetudaong he'ua netuvu. ²⁸ Maampo jio dinului nutupejo'ong he'ua, tetana nogutu tevu'u-vu'u he'ua netuvu. Pamulanya tetudaong he'ua neumbuk, lamai he'ua tepupuyanongnya nesuvung, lamai he'ua tegando eilalong nupupuyanong he'ua najari nooge. ²⁹ Lamai he'ua, watu tevuanya nelilimo, tetopejo'ong he'ua selengaan uma'o nonyarengko, karna tewatunya tepelolu najaoko." ³⁰ Lamai he'ua siYesus nonjarita, "Iama'o si'ita maala paselio-lio tepomarenta nu'Alata'ala, atau tepogurapanong tesapa maala nopake ni'ita nopeselio-lio? ³¹ Tepomarenta nu'Alata'ala he'ua, sima tesapa sanu najari eivu'u nubololaia watu pinombula eitana. Tevu'u nubololaia he'ua sanu nelabi nede'i lamai jojoo tevu'u ntaninya eijuniaa. ³² Tapi touk si'ita nonuda, tetudaong he'ua netuvu ane najari nelabi nooge lamai tetudaong ntaninya. Tetudaong he'ua nonuyuvuna tepanga-panga sanu nooge jaok temamanuk maala mogutu tejumungnya eipanga-panga he'ua karna mbinoluninya." ³³ Nepake mabari tepogurapanong sima he'ua siYesus nokarevaa eipeinconong nutoo tejarita nu'Alata'ala. siia nomaguru siira, monurut siira maala mo'otoi. ³⁴ siYesus boi nepake tepoguropanong nokarevaa eisiira sima tepomarenta nu'Alata'ala. Tapi watu siYesus boi concoono temurit-murit-Nya, siia nombatuaa eisiira jojoo tepoguropanong he'ua. ³⁵ Eieleo he'ua, watu beimbengi, siYesus nonjarita eimurit-murit-Nya, "Maemo si'ita uma'o eisantava nubonto." ³⁶ SiYesus nesave tepayangan. Temurit-murit-Nya nonuut Siia ane nolinjo'imo tepeincono nutoo he'ua nongomung siYesus concoono siira. Lasiangkolo tepayangan nonuut siia. ³⁷ Watu siira uma'o eisantava nubonto he'ua, najaok tebarat sanu nakancang ane tebalayang nentama eilalong nupayangan, tepayangan he'ua sede'ipo molodong. ³⁸ Tapi siYesus no'oturu no'osuk eitampak nupayangan. teva'i-Nya eibabong nutambangon. Lamai he'ua temurit-murit-Nya nongguguri siia ane nongular eiSiia, " Guru, nete'uya nopatuvaya Ni'oo si'ita molodongo?" ³⁹ SiYesus nembaung ane nomarentaa tebarat he'ua ane nongular eibonto he'ua, "pengondoko ane poodoy!" Tebarat nengondok ane jiongo umai teibalayang valii eibonto. ⁴⁰ Lamai he'ua siYesus nongular eimurit-murit-Nya, "Nete'uya si'emiu nobule sima he'ua? Neteuya si'emiu jio nomarcaya Sia'u nomiara si'emiu?" ⁴¹ Tapi siira nobule ane neherang tutuu ane nejajaritaong, "Okuasa tutuu tetoo eini, tebarat ane tebalayang nonuru'i Siia."