¹ Lamai he'ua siYesus nentamaonye eilalong nupongganeong nuYahudi ane eiri'ua umai sotoo sanu noluntoy telimanya. ² Soso'uya tetoo nuVarisi nongingitai siYesus, mepe'eondok telima nutoo atau jio, eieleo Pengondok nutoo-too nuYahudi. Siira seilu monyalai siYesus monggauka sanu jio maala eieleo Pengondok. ³ SiYesus nongulara eitoo sanu noluntoy telimanya he'ua, "Maemo, pe'oro eitolo jojoo nutoo." ⁴ Lamai he'ua siYesus no'utanya eisiira, "Eileo Pengondok tesapa maala si'ita monggauka? Sanu mombosi atau sanu majaat eitooo-too? Monyalamata tetoo lamai te'amateong atau momate?" Siira boi mopoodoy. ⁵ SiYesus nonyiligi siira ane nongoungkul. SiYesus noondong karna siira jio seilu nomarcaya eiSiia. Siia nongulara eitoo sanu noluntoy telimanya he'ua, "Uluga telimamu." Siia noguluga telimanya ane najari neondok. ⁶ Lamai he'ua tetoo-too nuVarisi nesuvung noniat concoono tetoo-too niHerodes, antau siYesus nopatei. ⁷ Touk he'ua siYesus concoono temurit-murit-Nya uma'o eiBonto nuGalilea. Nabari tutuu tetoo nonuut siYesus lamai teTana nuGalilea ane teTana nuYudea, ⁸ Lamai teYerusalem, teTana nu'Idumea, eitana eisantava nuBangkalang nuYordan ncoono tetana papalit teKota nuTirus ane teKota nuSidon. Siira najaok eisiYesus, karna siira no'inepea jojoo snu ginauka niYesus. ⁹ Karna tepeinconong nutoo he'ua nabari, siYesus nonuju temurit-murit-Nya monyadiaa songkolo tepayangan antau siira jio mongipiti Siia. ¹⁰ Siia nepe'eondok nabari tepees nutoo, karna he'ua jojoo tetoo sanu nepees neipipitong seilu monggama-Nya antau tepees niira valii nope'eondok. ¹¹ Watu tetoo-too sanu pinentamai nu'alus sanu majaat ne'ita siYesus, siira nopotu'u eitolo-Nya ane neroroa, "Si'oo teUnga nu'Alata'ala!" ¹² Tapi siYesus tututuu nomarentaa siira, inyaa mongulara eitoo-too sanu ntaninya. ¹³ Lamai he'ua siYesus nolala'e eibuut. Siia noleva tetoo-too sanu pinilei-Nya ane siira valii najaok eiSiia. ¹⁴ Siia nomile sompulu rotoo, sanu valii tinopei-Nya tetoo-too sanu tinuju. Siira uma'o concoono Siia ane tinuju-Nya mokarevaa taKareva sanu Mombosi ¹⁵ ane vinenii-Nya te'ababaraka mombugo te'alus-alus sanu majaat. ¹⁶ Sompulu rotoo sanu pinilei-Nya: siSimeon, sanu vinenii-Nya tetope siPetrus, ¹⁷ siYakobus teunga niSebedeus, ane siYohanes tetuai niYakobus, (sanu roroto vineii-Nya tetope siBoanerges, tebatunya teunga-unga nugorung ne'ati) ¹⁸ si'Andreas, siPilipus, siBartolomeus, siMatius, siTomas, siYakobus teunga ni'Alveus, siTadeus, siSimon tetoo lamai tekolompok nuSelot, ¹⁹ ane siYudas Iskariot, sanu mobaluk siYesus eimusu-musu-Nya ²⁰ Lamai he'ua siYesus nentama eilalong nusombonua. Tetoo nabari najaok ane neincongonye, jaok siYesus ane temurit-murit-Nya jio maala nenginang valii. ²¹ Watu terururus-Nya ne'eepe tesaba he'ua, siira najaok seilu mongala Siia, karna siira nongular Siia jio umai monoto. ²² Umai teguru-guru nuhukum nu'Alata'ala sanu najaok lamai teYerusalem. Siira nonjarita, "Siia pinentamai niBe'elsebul," ane, "Nepake tekuasa niBe'elsebul, tepuang nuseetan, Siia nombugoy te'alu-alus sanu majaat." ²³ SiYesus noleva siira, lamai he'ua nonjarita tepogurapanong eisiira, "Jio umai tepuang nuseetan nombugo te'alus-alus sanu majaat. ²⁴ Ane tepomarenta notilal majari rokolompok sanu meeva-evaong, tepomarenta he'ua jio maala montaang. ²⁵ Ane sorurus notilal majari rokolompok sanu meeva-evaong, sorurus he'ua jio maala montaang. ²⁶ Ane tepuang nuseetan mongeva te'alus-alus sanu majaat sanu nonuut siia, tepomarenta nupuang nuseetan jio maala montaang, tapi majaoko ponou'ongnya. ²⁷ Tepuang nuseetan sima tetoo sanu no'uig. Ane sotoo seilu mentama eivonua nutoo sanu no'uig ane mongala tesasagaranya, siia kanaboi momungui tetoo sanu no'uig he'ua luulu. touk he'ua siia maala mongangga tesasagara eilalong nuvonua he'ua. Ane sia'u mombugo te'alus-alus sanu majaat, tebatunya sia'u mondaag tepuang nuseetan. ²⁸ Tutuunya sia'u nonjarita eisi'emiu, ane tetoo-too mogutu tedosa ane monjaati te'Alata'ala tedisa niira no'ampuni. ²⁹ Tapi sisee-see monjaati te'Alus sanu Mapancing jio ma'aala no'ampuni seende-endenya, karna monggauka tedosa sanu sende-endenya." ³⁰ Siia nonjarita sima he'ua karna siira nongulara Siia pinentamai nu'alus sanu majaat. siira jio momarcaya te'ababaraka niYesus lamai te'Alus sanu Mapacing. ³¹ Lamai he'ua najaok siina ane tetuai-tuai niYesus. Pepees siira ne'oro eiaangnya, siira nonuju tetoo moleva Siia. ³² Umai tetoo nabari nongodung eipapalit Siia, ssiira nonjarita, eiSiia, "Guru, itaipo, siina ane tetuai-tuai Ni'oo umai eiaangnya ane seilu monjao'i Si'oo." ³³ Nonyimbat siYesus eisiira, "Sisee siina'U ane sisee terururusU?" ³⁴ Siia ne'ita eitoo-too sanu nongodung eipapali-Nya he'ua ane nonjarita, "Einimo siina'U ane terururus'U! ³⁵ Siise-see nonggauka te'eseseilu nu'Alata'ala, siia terurusU langkai, terurusU bengkel ane siina'U."