¹ Touk nalabat lasiaeleo siYesus nentamaonye eiKota nuKapernaum ane tetoo no'ipea siYesus umai eisombonua. ² Nabari tetoo neincong eisevi niYesus,jaok jio umai nagana tepe'oroong eivonua he'ua.Eijalang sanu mo'osuk eibamba pentamaong nobu'e tetoo.Lamai he'ua siYesus nonjaritaa teKareva nu'Alata'ala eisiira. ³ Apatoo najook nongomung eisiYesus tetoo sanu noluntoy, eibabok nubail. ⁴ Tapi siira jio maala nongomung eisia karna tepeinconong nutoo he'ua. Siiara nombo'a teatok susuung siYesus. Touk nogutu telulu , siira nenyaua tetoo sanu noluntoy he'ua eibabok nubailnya. ⁵ Watu siYesus ne'ita te'aparcayaong niira, siia nongular eito sanu noluntoy he'ua, "Rurus'U, tedosa ni'oo inampunimo." ⁶ Lasiatoo teguru nuhukum nu'Alata'ala nongodung eiri'ua ane no'utanya eilalong nuambok niira, ⁷ ''Jio mombosi tetoo eini nongulara sima he'ua. siia nonganggap mboto-Nya sima te'Alata'ala! Jio umai tetoo sanu maala nongampuni tedosa. Boi te'Alata'ala maala nongampuni tedosa." ⁸ SiYesus mo'otoi tesapa sanu pinikira niira eilalong nuambok niira, siia nongulara eisiira, "Inyaa si'emiu he'ua eilalong nuambok ni'emiu! ⁹ Tesapa sanu Ugauka eitoo eini antau sia'u mepopo'itaa te'ababaraka'U? Sia'u maala mongular, 'Pe'oromo, ane alamo tebailmu ane pelampamo'? ¹⁰ Tapi nyapoeini Sia'u mepopo'ita eisi'emiu te'Unga nuManusia umai te'ababaraka nongampuni tedosa eijuniaa!'' Siia nongular eitoo sanu noluntoy he'ua, ¹¹ Sia'u nongulara eisi'oo, pembaungo, engkato tebailmu, ane petencilemo eivonuamo!'' ¹² Tetoo he'ua ne'oro, selengaan nongala tebail, ane nesuvung lamai tevonua he'ua. Jojoo tetoo ne'ita. siira neherang ne'ita he'ua ane nomuji te'Alata'ala ane nongulara, "si'ita jiompo umai ne'ita tetoo sanu noluntoy pine'eondok!" ¹³ Lamai he'ua, siYesus nesuvungonye uma'o eipipit nuBonto nuGalilea. Nabari tetoo najaok eiSiia, ane siia nomaguru siira. ¹⁴ Pepees nelampa eipipit nubonto, siia ne'ita siLewi teunga ni'Alveus nongodung eipenginconong teasel lamai tetoo-too antau noveena eipomarenta nuRomawi. SiYesus nonjarita eisiia, "ponuuto sia'u." Touk he'ua siia nesuvung lamai tepenginconong teasel ane nonuut siYesus. ¹⁵ lamai he'ua siYeus concoono temurit-murit-Nya nenginang eivonua niLewi. Mabari tetopongincong teasel ane tetoo-too sanu odosa nonuut siYesus. ¹⁶ Lasiatoo teguru nuhukum nu'Alata'ala, lamai te'anggota tekolompok ke'agama'an sanu tinope teVarisi, ne'ita siYesus nenginang concoono tetoo-too sanu odosa ane tetopongincong teasel. Siira no'utanya eimurit-murit-Nya, "nete'uya siYesus nenginang concoono tetopongincong-topongincong teasel ane tetoo-too sanu odosa? Aipo siia netataguong?" ¹⁷ SiYeus ne'eepe tepo'utanya niira ane Siia nogurapang, "Tetoo-too sanu nesehat jio nomarluua tedokter, boi tetoo-too sanu mepees sanu nomarluua'onya. Sima he'ua valii sia'u jio najaok moleva tetoo-too sanu mondolong, tapi Sia'u najaok moleva tetoo-too sanu odosa." ¹⁸ Vavali seeleo temurit-murit niYohanes ane tetoo-too nuvarisi nepuasa, tapi temurit-murit niYesus jio. Lasiatoo najaok eisiYesus ane no'utanya eiSiia, "Nete'uya temurit-murit niYohanes ane tetoo-too nuVarisi nepuasa tapi temurit-murit-Mu jio?" ¹⁹ SiYesus nonyimbat eisiira, "Maalamo tetagu-tagu nuboti langkai nepuasa pepees teboti langkai concono siira? E'endenya teboti langkai concoono siira, siira jiompo maala nepuasa. ²⁰ Sima he'ua temurit-muritU, karna sia'u ulengi concoono siira. Tapi majaok teeleo, watu teboti langkai noala lamai siira. lamai he'ua siira mepusa eieleo he'ua. ²¹ Jio otoo monampol tenaus sanu vuou eibaju sanu nopuungo, karna ane nengkorot tenaus sanu vuou, tebaju sanu nopuung he'ua majari melabi mejeak. ²² Jio otoo nonubana te'anggur sanu vuou eilalong nupongembeong te'anggur lamai te'uli sanu nopuungo, karna sima he'ua, te'anggur he'ua nojuang ane pongembeongnya norampaka. Tapi te'anggur vuou kana no'embea'onya eilalong nupongembeong sanu vuou." ²³ Najarimo eieleo pongondok nutoo-too nuYahudi, siYesus ane temurit-murit-Nya nalabat eitanga nujo'ong nugando. Temurit-murit-Nya nompamula nelolu tegando. ²⁴ Tapi lasiato tetoo nuVarisi ne'ita tesapa sanu ginauka niira ane no'utanya eiSiia, "Itai! Nete'uya temurit-murit Ni'oo jio nonuut tepangajar nu'agama ni'ita? siira nokarajaa eieleo pengondok." ²⁵ Tapi siYesus nonyimbat eisiira, " Jiompo umai si'emiu nombasa sima tesapa sanu ginauka tepuang siDaud? ²⁶ Watu te'Imam sanu mooge he"ua siAbyatar, siDaud ane tetoo-too sanu nonuut siia noorok ane siira kanaboi menginang. Siia nentama eilalong nuVonua nu'Alata'ala jinao'inya si'Abyatar, nomongi nenginang. siDAud nenginang sanggaat lamai teroti sanu vineena'omo ei'Alata'ala sanu maala no'inang boi te'imam-imam. siia valii nombeena sanggat teroti he'ua eitoponuut-toponuutnya ane siira valii nenginang. Tapi te'Alata'ala jio nomikir siDaud nonggauka tedosa." ²⁷ Lamai he'ua siia nongulara eitoo-too nuVarisi, "Teeleo pengondok pinogutu nu'Alata'ala nondulu temanusia. Temanusia jio pinogutu nonuut te'aturan-aturan nueleo pengondok. ²⁸ Karna he'ua Sia'u, teUnga nuManusia nabaraka monantua jojoo tesapa sanu maala nopogugauk eieleo pongondok."