¹ Mono, Saulus naha doku jala baha mateya yitui Stefanus. Saulus naha joloroyi hitu toyo hatena kanengo la Yerusalem Atu diha lodo, neni namayila ka dadi labarada hitu toyo hatena kanengo la Yerusalem, mono tanga kohada da matalara atula Yudea mono Samaria, heleda hitu rasul. ² Nedi kapira toyo doha ate ka tanoni yitui Stefanus mono na duki dongani mayila pahangada la arona. ³ ta idoya, Saulus engango bana pakawohokayi hitu toyo hatena na tama la diha uma- diha uma. Iyo na yoroyi kabani mono mawine, mona naha tamadi la golu. Filipus na talarango le tengngo la Samaria ⁴ Lodona, tangana hitu kamatalara da halako hagapengo bada ngodiya yina Li katengngo. ⁵ Filipus na buru yila hawuyo harona mono na talarani tutunai Kristus. ⁶ Mono, hitu toyo danga daha wungo ate hamatarani hatokinai Filipus ba poja da iteyi mono rongoyi hitu tajko ha rayina. ⁷ orona, hitu wadi japata na lohodi wali hila toyo hatamana, hagapengo bada kawullo-kawullo, mono dangayi toyo kaliku mono kabeko paha togahana. ⁸ Oro ineyaka, neni na magebora ate noyo la harona. ⁹ tabollo, neni na hawu toyo ka ngarangoi Simon yila kapungena ka patingongo kabali mata nola harona mono na paka ngakkoyi tangada toyo la Samaria, mono bana tokiya iyo ba toyo bokoloya. ¹⁰ Tangada toyo, wali kahoda moraha koha kahoda bokola, weda bada hanewe, "Yina toyo wali la Kuaha Allah ya kabokola hawengo'." ¹¹ Mokka, engango bada hamatarani orongo kahelango mojana bana rayini ha paka ngakko donga wadi hitu kabali matana. ¹² Tabollo, ba poja hitu toyo bada poja hatenaya yitui Filipus ka talarango Li katengo tutuna hadonai Allah mono na ngara nai Kristus Yesus, iyo na ihoyi, wali kabani koha mawinne. ¹³ Loppo, Simon dagu naha hatena mono iyo na ha ihoya, iyo enga hakitana la baranai Filipus, mono poja bana itteyi tangadi itu mukjizat mono tajko ka langngo kadadi, na dukini bangara. ¹⁴ Atu diha lodona, hitu rasul la Yerusalem bada rongoya ba neni na toyo Samaria kahiba mowaya na linai Allah, daha wediyi hitui Petrus monoi Yohanes labara hitu toyo habali, ¹⁵ kamayo mono ka kawojo taguda kada hibawa wani na Waddi Katengo. ¹⁶ Orona, Waddi Katengo jene hingma hongo ka buru labarada, iyo ha iho neyo pedadi wani yina ngara nai Maroba Yesus. ¹⁷ Lodona, Petrus mono Yohanes na pajoladi limada laponu katokuda mono kada hibaya na Waddi Katengo. ¹⁸ Yitui Simon bana iteya yina Waddi Katengoba woya ledengo pa pajoladi limmada hitu rasul-rasul la ponu katokuda, simon na tawaradi omaha hitu rasul-rasul, ¹⁹ wena bana toki dani, "Wojalagani dugu yina kuaha ledena hitu toyo bagu pajola kadi lima kada hibaya yina Waddi Katengo." ²⁰ Ta idoya, Petrus wena la bara nai Simon, "wakaukala hitu omahamu na pajolorakawu orongo la paha ngadamu hitu omaha na dadi bakole wani yina karunia Allah! ²¹ Yoyo jemu kole nekmango nagumu tutuna yitu orongo na atemu jena lurha nekma la aronai Allah. ²² Bahenaka, jorawu wali yila japatamu mono kawojo newu yilai Mori, ba roga yina muraha atemu na dadi kado ba hawaligu. ²³ orona, yayo bagu ittewu yoyo mu engango no dalo la podu ranga kahoda podu mono engango raddigu kajapata." ²⁴ tabollo, Simon wenna bana baleha, "Kawojo kiga tutugu la bara nai Mori ka tangadi hitu toki muga abu na pittawa." ²⁵ Mokka, poja hitui Petrus monoi Yohanes bada tokiya ka hepijango tutuna na li nai Mori, iyo da bali la Yerusalem hagapengo bada talarani na Liyo la deh-deha da toyo Samaria. Filipus na haihoyi toyo Etiopia ²⁶ Lodona, malaikat nai Mori daha newe lai Filipus, wenena, "Kodewuka mono kamu halakowu la Selatan, yila lara kaburu wali la Yerusalem ka aro la Gaza. Nona lara naka hiko." ²⁷ Filupus na kode mono na halako. Mono, na iteya na toyo Etiopia kawali yila kapareha Sri Kandake, Ratu kerajaan Etiopia. Iyo katagu kohadi balehayi tangada daguna yina ratu. iyo na mayo wali la Yerusalem ma kangote, ²⁸ mono la laraya bali, ngodo nani la karetana hagapengo bana baha ya na huratana nabi Yesaya ²⁹ Lodona, Waddi na hanewe lai Filipus, "Halakowu mono ha ole wungo nola kareta." ³⁰ Moka, Filipus na palayo nola kareta mono na rongoya nona toyo ba baha nani na hurata Yesaya. Filipus naka patani, "Muwopakakya mori noha bahamu?" ³¹ Mono, nona toyo na balehaya, "aha nyikana bagu tajaya helena banengo toyo kaha tutugani?" Moka, na kamako ni Filipus pone mono hawedeya ngodo dongani. ³² Atna na, tutna nona hurata ha bahana iyo, "Iyo da ngodiya habalini bebbe nola hadoyo ropoya, mono naha tuja nola ana bebbe jeha gutti po wullu ihhina, kakadona loppo jena wangakmaya na woba-Na. ³³ Nola la jetidda-Na, jedibaka da karamani wali bara-Na. Garani ka dulkonani tutu duwu-Na? Orona, na morho-Na da kara mowanani wali yila ponu tana." ³⁴ Lodona, yina sida-sida na baleha mono wena lai Filipus, "Yayo gu paohawu labaramu, tutu garaneya yina nabi bana hanewe, tutu dagunani ato tutu toyo hawadekaya?" ³⁵ Lodona, Filipus na bugerani na wobana, mono na kpungeni wali yila hurata hori, iyo na kajallani tutu nai Yesus la barana. ³⁶ Mono, ba tongroda halakoni nona lara, da dukini naha doyo kaha wengo, mono yina sida-sida wenena, "Horaponi, neni na weyo! aha widdi poni jeha dadi dongana ba haihowa?" ³⁷ [lodona, Filipus wenani, "bamu hatena wali ate nekakngo mori, na dadi mori." Lodona, iyo na baleha mono wenani, " Yayo gu hatena yitui Kristus Yesus ba ana nani Allah."] ³⁸ Lodona, yina sida-sida na parehayi kada hadedeya na kareta. Mono, noka dungo toyo da tama la weyo, Filipus mono yina sida-sida, monoi Filipus naha ihoya. ³⁹ bada poja halongo wali laweyo hitu kadungo toyo, Waddi nai Mori na ngodi ya Filipus halako, mono yina sida-sida jehilu na itekmaya, mono na halako hakitango wanga magebora ate. ⁴⁰ Tabollo, Filipus na taja wuna ba noni la Asdod, mono bana poja hahepoya nona hadoyo, iyo na talarani na Liyo la tangada harona koha bana duki nola Kaisarea.