¹ Yina lodo kalongango, bana matabayi hitu ana limada kadokudi, neni paoha na hawuyo paha lohoda hitu toyo Halenis, la aroda hitu toyo Ibrani pijja orongo hitu mawinne baluda ba jedda woddi hamuyo diha lodo-diha lodo. ² Mokka, kabulu dungo ana lima da kamakodi ana limada mono wedda, "jena tena nekma yama jenna yina tutna linai Mori oro orhoya na tutu hamuyo donga. ³ Oro ineya, bagu ole beggimi, piddemi pittu toyo wali la jongami ha itte mowa rayingo kadoha, ha bonna Waddi Katengo mono magawa ate hakeketama kana hayillini yiha paha yilli. ⁴ Lajonga, yama engango bama kawojo mono hayilini yitu talarani linai Mori." ⁵ Yitu hatoki na hadoha dadi ateda tangada hitu toyo. Mono, da piddeya yitui Stefanus, na toyo kabunungo hatena mono Waddi Katengo, lopoi Filipus, Prokhorus, Nikanor, Timon, Parmenas, monoi Nikolaus, toyo proselit kawali la Antiokhia. ⁶ Hitu da ngodiyi la aroda hitu Rasul, mono bada poja ha kawojo, da tayi limada la ponu katokuda hitu kapittungo toyo. ⁷ Linai Allah naha kitango matalara mono dangada hitu ana lima hitu la Yerusalem na hakitadi mataba. Bawopayai Stepanus ⁸ Monoi, Stefanus, na bonuni kanyuru mono kuaha, na rayi mowani yitu langngo mono tadjko-tadjko la jonga toyo danga. ⁹ Tabollo, kapirango toyo ka wali la sinagoge toyo Libertini hawengo, wali hitu toyo kirene loppo toyo Aleksandria, mono hawadeka kawali la Kilikia mono Asia, da kodde mono da hataji dongani hanewe yitui Stefanus ¹⁰ Ta idoya, idango jeda ruktok mani gobani yina taja mono na Waddi ka oli-Ni Stefanus bana hanewe. ¹¹ Lodona, da halako karingi da wuddayi hitu toyo hawadeka kawedda, "Yama ma rongo mowaya yina toyo bana hawihoka yilai Musa monoi Allah!" ¹² Mono, da orokadi hitu toyo danga, toyo katungo, Toyo kapewengo Taurat, kada dukini yitui Stefanus, kada wopaya, loppo da ngodiya la aroda Sanhedrin. ¹³ Idango daha orokadi hitu toyo katoki-toki awa kawedda, "Yina toyo jena ngahu hingmango hanewedi hitu hatoki ka gobani yina hadoyo katengngo mono Pata Taurat. ¹⁴ Orona, yama marongo mowaya iyo bana tokiya ba yitui Yesus kawali la Nazaret na mohhoni yina hadoyo, mono na hajeluni yina pata paha buru mowanai Musa la barada." ¹⁵ Mono, bada hamatarani na mata nai Stefanus, tangada toyo danga da ngodonla Sanhedrin da itte nani na matana meranani mata malaikat.