Hajaladaniy to Yahudi nela bara nay Paulus ¹ Lima lodo nela aro, Ngora To Taghanet Bokolo burnan oled heto katuda olen hawu na PENGACARA kangarangoy Tertulus. He iyo tokdad jala nay Paulus nela ngora to. ² Pojakay Paulus kamakon, Tertulus halege nanka hajalayya neha tokna," Orongo, ledem ha Bapa, neyama podan namaring mono apan kaha jelngo yi laha do orongo tajam ha Bapa, ³ yama hibaya tangnga ngara hada manela tangkohana hadoyo bon ngo maringngo. Kamanadangoy Feliks. ⁴ Tabolo idoka, abhil poja awagun naka rejam, yagha ohan na ate manawaram ne rongo hokma yama. ⁵ Orongo, neyama kole mowanka yina to hawu ya kaha wolongo olena, kaha buklon jaka doha nola jonga to Yahudi nela tangkohana pontana. Mane iyo, hawuya kapareha kalingora to Hatena. ⁶ Ne idomol mayegan jadohana Uma Kamawol Kamaray idoka bama wopaya. [ Neyama hakab atema dolun jalana dokngo ukpatama yama. ⁷ Tabolo, ney Lisias ngora to ban, manan karaman wal nela limama wango patango, ⁸ dukngo prehay heto kaha jalaya nemayo julaw yoyo] Wango pahora dagun, neyo taja dagmun walnela barana tutna tangana neyama paha jalaman nela barana." ⁹ To Yahudi domol kunjodan nedalo paha jaladan dukngo hadida raya heyo bana tenay. Balehanay Paulus nela aronay Feliks ¹⁰ Nena ngora to bana wo tadko tutnay Paulus hanewe, Paulus balehan nan," Kole bag tajaya bido bido kalango neyo bam tagud kejuy tutda hi toyo, ya wagun muraha ate bag jedon. ¹¹ Yom dad pewen baja reh walnela kabul du lodo kalongango yag halakowa nela Yerusalem loka wojo. ¹² He iyo jada toboka memak mawa yayo bag hajeke wungo magba garakan monel hawolongo nela to danga, magba nela Umana Kamawol Kamaray, uma doka wojo, molka nela harona hakar. ¹³ He idomol jada dadma hatingon nela baram apan neha paha jala daga bahena. ¹⁴ Tabolo, yag ngon nela baram, dokun nena Laram, hepa dulkoda hawuya kalingora, yag kawojowa nela Kamawol Kamarayda nuh weikada, nepa tenaya apa apango wango Ukpata mo kama tulho nedalo la hurata horda ana paha wedena, ¹⁵ hanyongan wo kaha monengo nedalo la Kamawol Kamaray, nepa rema alada, banen natolko, tutda toha tena molka jaka hatena ¹⁶ Yiyo, yag mayegan hatenaya na ate dagug kamuraha, magba nela arona Kamawol Kamaray molka nela kadad toyo. ¹⁷ Nebahena, pojaka kepira dongo, yag mawa ngod manuta nela kalingorag tut wog maraka. ¹⁸ Tongrog bag karejan, he ida dukga ya, kole bada hamurahagga nela Umana Kamawol Kamaray, ja dangakma to molka neka dad. Tabolo, nohabal ned hawu du to Yahudi kawalngo nela Dikoroyo. ¹⁹ Badokkan, he idoka kanengo nela arom tokya paha jaladan, he iyo bada mang kango ahango neka gobaga yayo. ²⁰ Molka, magba he idag katokya apan he iyo pa tobo kada neya dag nela aroda Toka Wohoka, ²¹ helengo hawu hanewe ne paka wulog nebag dede dagwa nola jongada," Orongo tolkoda toka mate, yayo daha jalawa nela arom hena lodo."' ²² Taboloy Feliks, kareh taja hodi tutna nena Lara, hadikin nena mayila ne tokdan," Ney Lisias, nena ngora to, bur, yag pohtoya nama yilam." ²³ Halegeya, Feliks prehaya nena to bantanam ney Paulus kada podya, tabolo wango kalewara ma jana hagakmad olena tut hanetun iyo. Paulus Hanewe tutna Hatenana Dalo nela Ananaha ²⁴ Poja kapirango lodo, Feliks manan oled arawena, Drusila, kato Yahudingo maha weyay Paulus mayo mana rongo yay Paulus hanewe tutna hatenana nedalo la Ananaha. ²⁵ Lodongo, tongronay Paulus hanewe tutna neka tena, pod wungo, mono kolengo dokjala kanemengo, Feliks dukin kaboh maha tokna," Halakow bahena. Nebag kolengo mahigo, yag kamako neg." ²⁶ Nona rah kahamera, Feliks hamonena ney Paulus nawoga omaha. Ne orok nanka, Feliks domangoy Paulus hawedeya mayo hanewe nela barana. ²⁷ Tabolo idoka, pojaka du doka longango, Perkius Festus jelyay Feliks. Orongo kab atengo hadoha dad ateda to Yahudi, Feliks halakoniy Paulus nedalo lagol.