¹ Yina lodo pentakosta badukini, tanga kohada nedi nola ha wuyo hadoyo. ² Mono, kode ngodiya ba neni harongo kawali la langto, punyina meranani hauppu haringi bongata, mono yika punyi na bonu kohani tangana na ihi umma noyo ha doyo ngododa. ³ Mono, da iteyi hitu loma kamera derko api kama hobara mono na hebora-heborayi la ponu katokuda diha-diha. ⁴ Moka, tangada na bonudi Waddi Katengo mono da kapungengo hanewe wango heheka hanewe, kahengo hawodadi Waddi Katengo bada tokiyi. ⁵ Atu na lodona, nejaladi toyo Yahudi kaengango la Yerusalem, toyo ka kapewe tangana toyo kanengo la kabu langto. ⁶ Mono, ba rongoya yika punyi, iha kalibbo toyo da maronga dobba mono daha ngotora orongo diha toyo- diha toyo ba rongoyi bada wadi hanewe daguda. ⁷ Da dudara mono hangotora, mono wedda, " tangada hitu kaha newe ja toyo Galilea kaduyi? ⁸ Mono, aha nyikna diha-diha bada rongoyi bada hanewe wango hitu hanewe hadayo dadi da itango? ⁹ Toyo Partia, mono media, mono Elam, mono toyo Mesopotamia, Yudea, mono Kapadokia, Pontus, mono Asia, ¹⁰ Frigia, mono Famfilia, Mesir, mono hitu hadoyo la Libia la bara Kirene, mono toyo kamayo wali la Roma, wali hitu toyo Yahudi koha hitu toyo proselit, ¹¹ toyo kreta mono Arab. da rongoyi bada hanewe wani naha neweda tutuna yina harayina ka langngo yitui Allah. ¹² Mono, tangada da dudara mono daha ngotora hagapengo bada hanewe donga wuda diha-diha, "Aha neni artina tangana yitu?" ¹³ Tabollo, toyo hawadeka da maktodi mono wedadi, "Mabuk dadi oro anggur bayo." ¹⁴ Taidoya, Petrus na dede dongadi ka buldihango rasul, na keketaya na lina mono na hanewe la barada wenena, "Hai tangami toyo Yahudi mono tangami kaengo la Yerusalem, kamtajayala mono kamrongo gani hatokigu. ¹⁵ orona, hitu toyo je mabuk madadi, kahengo noyo paha ngadamu orongo abu jam ka tolnani, ¹⁶ idokala hatoki mowa ledeni yitui Nabi Yoel: ¹⁷ 'Mono, yila kaduka lodo na dadi, Allah na woya na Lina: Yayo gu haburu kani na Waddi-Gu la jongada hitu tangada kadadi toyo, mono ana kabani-ana kabanimu mono ana mawine-ana mawinnemu da rayingo kadadi, mono anamu kabod hongo dengo ha iteda, mono toyo katongo la jongami na naga nipiyi ha naga nipida. ¹⁸ Loppo, la jongada hitu ata-ata-Gu kabani mono ata-ata-Gu mawinne atu nalodona, Yayo guhaburini yina Waddi-Gu, mono da nengo harayida. ¹⁹ Mono, Gu patingodi hitu jeka moda la langto, ka doyo ponu, mono tadjko-tadjko la ponu tana, ka doyo wawa, rutto, mono api, mono koto api. ²⁰ na mata lodo da hajeluni dadi kapogto mono da wulla na dadi rutto, toma abu nemeni yina lodo nai Mori ka bokola mono magebora ba nemeni. ²¹ Mono, nenni kadadi, tangana na toyo ka wullo ni na ngara nai Mori da hamalogayi."' ²² "Hai tangami toyo Israel, rongoya yitu hatoki. Yesus, Toyo Nazaret, yina toyo paha tingoda la barami yitui maroba Allah ledengo hitu tadjko bokola, jekamoda, mono tajka-tajka paha tingo mowanai Allah lajomi ledena Iyo, kahengo hataja dagu jalami. ²³ Yitui Yesus, paha jola kahengo paha gona mowa mono hatja mowanai Allah kapungena, yomim hamateya manom kadello-Ya ledena limada hitu toyo japata. ²⁴ Tabollo iyo, Allah naha kodde habali-Ya mono napa holla-Ya wali yina mayilla matena orona jena dadi nekmala la bara-Na na taloya hamate donga. ²⁵ Orona, Daud nengo bana tokiya tutnai Yesus, 'Yayo gu iteyai Mori dejuwani la arogu, orongo Iyo banenni la tabara kawanagu, iya yayo maje kedok maga. ²⁶ Oro ineya, na doha na ategu, mono na lomagu na kalelolaka. Pola toggu na engango nola hamone ate, ²⁷ orongo Yoyo jem jekmagani na dewagu bana engango nola hadoyo toyo kamate, ato jem jekmada hitu pola todda hitu toyo Muraha-Mu bada iteya na mayila jeka hadukka. ²⁸ Yoyo mu toki mowa gani na lara ha morho donga. Yoyo mu rayigani habonu nonga nada magebora wagani na mata-Mu.' ²⁹ Bagu ole begimi, yayo na dadi bagu toki gimini la barami wango kadongko ate tutu da hitu bapa waikada, Daud, orongo iyo na mate mowa mono tano mowani, mono na watu hodi nehoni la jongada koha hena lodo. ³⁰ orona, Iyo ba nabiya mono na tajaya Allah bana hagona wani haro la barana kana ngodo yina hawuyo hadoyo kaburu wali lai Daud yila pono parehana. ³¹ Oro ineya, Daud ka iteya yitu kapungena, iyo na dulkoya tutu morha habali nai Kristus yitu: 'Iyo ja hajekmaya yila hadoda toyo kamate, mono na pola to-Na jena itekmaya yina mayila jeka hadukka. ³² Yitui Yesus idokala hakode habali nai Allah mono yama tangama katajaya tutu na yitu. ³³ Oro ineya, ba poja bana keketa wani lima kawana nai Allah mono na hibaya yina rahi kawali lai Bapa tutna Waddi Katengo, Iyo naha buru mowani, wali yitu haitemi koha yitu harongomi. ³⁴ Orona, Daud jena ponekma la surga, tabollo iyo we daguna, "Mori wenna la Morigu, 'Ngodowuka la tabara kawana-Gu, ³⁵ koha bagu rayigudi hitu tangada muhumu da dadi kadekala witi mudi.'" ³⁶ "Oro ineyaka, jekada tangada hitu toyo Israel kada taja hadohani yitui Allah na hadadi mowa-Ni Mori monoi Kristus, idoka yitui Yesus haka dello mowami." ³⁷ Ba poja da rongoya tutuna yitu, na maropoyi ateda, lodongo weda bada tokiya lai Petrus mono la hitu ana lima hawadeka, " Tangami bagu ole begimi, aha nehokini harayima?" ³⁸ Lodona, Petrus wenna la barada iyo, "Joramika moho iho wu dagumi tangami wani na ngaranai Kristus Yesus kaha wali wagimidi doku jalami, mono yomi kam hiba wani yina kanyuru Waddi Katengo. ³⁹ Orona, yina paha rahi dagumini, mono tangada anami, mono tangana na toyo danga kamaroyo, kahengo dangana Maroba Allah bana kamakoda ittango." ⁴⁰ Mono, wadi tangadi hitu kadanga hatoki na hawadeka, Petrus na hanewe wango katena pijja mono na kawullo la barada, wenena, "Haloga wu dagumi wali yila dadi toyo kakalego!" ⁴¹ Tangada toyo kahibanani hatoki nai Petrus daha ihoyi mono yitu na lodo na mataba koha duki nengo tolu rata toyo dangada. Kalibo Tangada Toyo Hatena ⁴² Tangada daha duku yila hatokida hitu ana lima mono yila kalibo, bada hidiyi hitu roti, mono noyo bada kawojo. ⁴³ Mono, nakabohi nemeni la barada diha toyo-diha toyo, mono dangayi kadadi ka akto mono tadjko-tadjko ka dadi lededi hitu ana lima. ⁴⁴ Tangada kaha tena da ole bada makoha mono da dagu dobadi tanga kohadi hadagu daguda. ⁴⁵ lodona, da malaja kohadi tangadi hapoteda mono hadaguda, mono da bawe-bawe yi la tangada hitu toyo, hawada diha-diha. ⁴⁶ Nahi lodo, da wango hawu ate bada makoha nola Bait Allah mono da pera-pera roti wali la diha uma-diha uma. Da hibayi hitu hamuda wango ege ate mono muraha ate, ⁴⁷ hagapengo bada dekkayai Allah, mono da beddi toyo danga. Mono, nahiyi lodo yitui Mori na tabayi dangada, hitu tangada toyo pa hamalogana.