¹ diha lodo, hitu la jongada hitu toyo Antiokhia, nabi-nabi mono hitu guru-guru, hitui Bernabas, Simeon yitui Niger hawengo, Lukius kawali la Kirene, Manahem yitu oe matuna Herodes, raja hadoyo, monoi Saulus. ² tongroda hitu toyo bada ka ngote la aronai Mori mono da tahini na karebada, Waddi katengo wenena, "Hatuba gadi yayo hitui Barnabas monoi Saulus tutuna yina pahayila paha kamako donga gudi." ³ Lodona, bada poja hatahini na karebada mono bada kawojo, loppo bada hajoladi limana yitu lai Barnabas monoi Saulus, iyo na hawedeyi hitu kadungo. Barnabas monoi Saulus yila nuha Siprus ⁴ Moka, ba poja na hawedeya Waddi katengo, Barnabas monoi Saulus da burru la Seleukia, mono wali habali da halako pala la Siprus. ⁵ Kole bada duki nola Salamis, da talarani na linai Allah yila be umada hitu toyo Yahudi, mono da maronga jalani yitui Yohanes yina toyo hayilida. ⁶ Kole bada halako nola nuha Pafos, da dukini yini toyo kapewengo kabali mata, yina toyo nabi kawohokada toyo Yahudi, kangarango Baryesus. ⁷ Iyo na oledi hitu toyo hanewe Sergius Paulus, yina hawuyo toyo hanewe, kakareyi hitui Barnabas monoi Saulus kada mayo la barana orongo bana bengo rongo nani na linai Allah. ⁸ Taboloi, Elimas, yina toyo kabali mata, henena ngara ba tokikaya tutunai Barnabas monoi Saulus, bana wani atena pahelorani naha tenana yina toyo hanewe. ⁹ Tabollo, Saulus, yitui Paulus hawengo hatajaya, na bonuni Wadi Katengo, na hamatarani yitui Elimas, ¹⁰ Mono wena, "Hei yoyo, habonuna matipu mono tangana kajapata, yoyo ana karehi wolowu, yoyo muhu nagu yitu katena, jena dakma bamu ngahuwu pahelorani yina lara nai Mori ka lurho? ¹¹ Bahenaka, pahorani, limanai Mori nemeni la todumu mono na dukigu morowu mono jemu ittemakmaya yina mata lodo koha kapira lodongo." Nomemaka, habong mono kapogto na buru la toduna mono iyo na halako woletango mayegango toyo ka kete nani na limana. ¹² Lodona, yina Toyo Hanewe na hatena orongo bana iteya yitu kadadi orona bana ege na atena ledena yina li hanuwa nai Mori. Paulus monoi Barnabas da halako la harona Antiokhia yila tana Pisidia ¹³ Yitu hadaka, Paulus mono tangada hitu toyo olena pala wali yila Pafos koha la Perga, yila Pamfilia, tabolo Yohanes na ujakadi bana halako bali la Yerusalem. ¹⁴ Tabollo, Saulus monoi Barnabas da hakitani na halakoda yila Perga koha duki nola Antiokhia, yila Pisidia. Mono, yila lodo sabat , dahalako nola uma hori mono da ngodo noha bali. ¹⁵ Bapoja habahaya yina Hurata Taurat mono huratada hitu nabi, hitu kapala uma hori da hawedeyi hitu toyo kada hanewe yila aroda hitu ka dungo rasul, "Bagu ole begimi, banekango hanewe ege atemi tangana hitu toyo, toki kakmoyi." ¹⁶ Moka, Paulus na dede mono na wodi tadjko wani na limana mono wenadi, "Tangami toyo Israel mono tangami toyo ka kabohini yitui Allah, rongoyaka! ¹⁷ Allah da hitu toyo Israel na pidde mowayika hitu obu waikada mono na keketayi hitu todda ba enga hoda nola tana Mesir mono wango bana keke taya na kana, Ia na kododi lohongo wali nola hadoyo. ¹⁸ Nengo pato kabulu doyo, Iyo naha maloyani atena hitu harayida yila maroda gilro. ¹⁹ Mono, bana poja hapudahayi hitu ka pitungo toyo la tanah kanaan, iyo na woiya nona tana. ²⁰ Tangana yitu na dadi nengo 450 dona. Poja noka, Allah na wodi la barada hitu kapareha koha dukini na parehanai nabi Samuel ²¹ Lodona, da kareya yina hawu toyo na raja, monoi Allah na wadani Saul, ana kabani nai Kish, yina toyo wali la Kabihu nai Benyamin, koha pato kabulu dongo. ²² poja Allah mana hikalani yitui Saul, Allah na keketayai Daud kana dadi raja la jongada, yila tutuna Allah na ite mowaya mono wenena, 'Yayo gu toboka mowaya yitui Daud, ana kabani nai Isai, yina Toyo kawona ngo la ate-Gu, karayigadi tangada hitu habeg-Gu.' ²³ Wali yila duwuna yina toyo, Allah, kahengo hatoki mowa-Na, na ngodiya la jongada toyo Israel na hawu toyo kapa hoiloyi, yitui Yesus. ²⁴ Bajeneme honi yitui Yesus, Yohanes na toki mowaya kapungena tutuna yina pa iho jora wango yila barada tanagada toyo Israel. ²⁵ Mono, batongroda Yohanes bana hayilidi hitu taguna iyo na toki pakitani, 'paha ngadami garani wemiga? Yayo je Inekma. Tabollo, pahoranenika, Naha wu toyo na mayo la liwugu, langka kope witi kana-Di yayo jegu roka nekmadi hali nadi.' ²⁶ Bagu ole begimi, kaburu wali yilai Abraham mono tangami ka kabohini yitui Allah, daha duki mowadanika yina li mahigo. ²⁷ Orona, hitu ka engango la Yerusalem mono hitu kapala da, jeka tajaya Iyo mono jeda tajakmaya yiha hatokida hitu nabi, yitu habaha yila diha lodo sabat-diha lodo sabat, na ha tangangoka noha tokida hitu nabi ledena bada hamayila yai Yesus. ²⁸ Mono, lopo janekngo hatoboka dani jala pa hamayila mate donga dani, da kareya yitui Pilatus ka hamate-Ya. ²⁹ Mono, ba poja bada patutuni yitu hatulho mowada tutu-Na, da haburu-Ni wali la yayu paka dello mono da kuglo-Ni nola rate. ³⁰ Ta idoyaka, Allah na hamorho habaliya Iyo wali lajongada toyo kamate, ³¹ mono, kapira lodongo, Yesus napatingo wuna yila toyo ka ole jua-Ni yila Galilea koha la Yerusalem, kanoyo bahena kadadi saksi-Na tutuda hitu toyo. ³² Mono, yama mangodiguni dagumi yina Li Doha tutu paha katuku nai Allah yila obu waikada, ³³ orona, Allah na ponu mowaya yina hakatukuna la barada, tanada anada, mono na hamorho habali yai Yesus, kahengo kamatulho nola kitab Mazmur kawuku kadungo: 'Yoyo Ana gu-Gu Yina lodo, Yayo gu dadi Bapa-Mu.' ³⁴ Tutunai Allah kaha morho yai Yesus wali yila jonga toyo kamate, jahilunekmanika yina mayilla, Allah na toki mowaya, 'Yayo gu wokagu kanyuru yitu kamuraha mono na dadi baha tenaya, yitu hawodani yitui Daud.' ³⁵ Idoyika orodi, Iyo wejalana nola Mazmur hawadeka, 'Yoyo jemu jenekmana yina Toyo Muraha-Mu iteya yina mayila.' ³⁶ Oronai, Daud, bana poja hayini tangada hitu rojana oro habenani Allah, lodona na mate, mono da kuglani la jonga obu waikana, mono na iteya yina mayilla, ³⁷ Tabollo yitui Yesus paha Morho habali nai Allah wali yila jogada hitu toyo mate, jena itekamaya yina mayila. ³⁸ Oro ineyaka, kam taja wakakmoni, bagu ole begimi, ledena Iyo idoka yina mahigo wali yila doku jala paha tuba dagimi, ³⁹ mono ledena-Iyo, tangana na toyo ka hatena na pama higoya wali yila tangana, kawali yila Iyo yomi dadi bada pama higogimi wali yila Hurata Taurat Musa. ⁴⁰ Bahenaka, haateni kaabuna dadi hitu kanengo nola huratada hitu nabi la baramu: ⁴¹ 'Pahoranika, yomi katagungo hatereko! Kadadako mono mojangoka, orona Yayo gu rayini yi paha yila lodomu, yina paha yilli je paha tenamu, lopo ba nekango toyo kadulkagimini la barami."' ⁴² batongroda hitui Paulus monoi Barnabas bada lohongo, hitu dangayi toyo kahadukini tutuna yina liyola lodo hori piyo. ⁴³ ba poja nona makoha, dangayi hitu toyo Yahudi mono hitu toyo proselit kaka bohini Mori kadokuni Paulus monoi Barnabas, hitu kahanewe la barada mono naha nokayi ka enga hakitango nola kanyurunai Allah. ⁴⁴ yila lodo hori piyo, kamha tangana toyo kaengango nola harona ka rongoya na linai Mori. ⁴⁵ Ta idoyaka, hitu toyo Yahudi bada iteye maneni karame, na bonuni hakiri ate mono walngo bada gobani apani yiha tokinai Paulus hagapengo bada wihokaya. ⁴⁶ Lodona, Paulus monoi Barnabas da dadi balehayi mono weneda, "Tutuna yitu na rokaneni oronani yina linai Allah ba wane hingkani toki ulu nehogimini labarami kapungena. Oro ineyaka, yomi mam tularani mono kawongko wumu na pola tomu jena wonakmango bamkoleni yina morho jeka haduka, Pahoranika, yama ma poterango yila toyo hawadeka. ⁴⁷ Orona, wenenka yitui Mori bana wogama pareha yila yama: 'Yayo gu hadadi mowagu magakaha lajongada hitu diha toyo kana dadi ngodiya yina hoilo koha duki nola haduka tana."' ⁴⁸ hitu toyo Yahudi bada rongoya tutuna yitu, na egeyi ateda mono na mageboraya linai Mori. Mono, heda dangada hitu poja paha tutu mowa kaneni na morho jeka haduka, dadi baha tena. ⁴⁹ Moka, linai Mori na matalaro yila tangana nona hadoyo. ⁵⁰ Ta idoyaka, hitu toyo yahudi da wudayi hitu mawinne hatena paha aka mono toyo hawayo nola harona, mono na hakodeya yina mayila la arodai Paulus mono Barnabas, loppo da wugayi nola bali hodi lohongo nola diri tana. ⁵¹ Loppo, hagapengo bana kobahayi hitu kobko walila lawitina la arona hoyo toyo Yahudi, Paulus monoi Barnabas da halako nola Ikonium. ⁵² Mono, hitu ana limana na bonudi ege atemono yitu Waddi Katengo.